2. ପାପ୍ ଦୁନିୟାଁନୁଁ କରାଲି

ଆଦାମ୍ ଆରୁ ହୁସ୍ ଘି ଆଲିବୋନ୍ ପାରମେଶ୍ୱରସ୍ ଘି ସ୍ତିନ୍ ହୁବଡାର୍ ଘିଲାଗାନ୍ କାମ୍ ଚାକା ରାଇଦ୍ ହୁ ବାନେ ବାଟ୍ କିନୁ ରାଇ କିରି ମୁରୁକ୍ ଖୁସିନୁ ରାଚାର୍ । ହୁନୁନ୍ ନ୍ତାର ନେର୍ ଭି ଚିଢ଼ା ମାଲ୍ଲା ଆତ୍କାରୁର୍, ହାଲେ ଭି ଇ କାଥ୍ଥାନୁ ହୁବ୍ ଡ଼ାର ଗେ ଲାଜ୍ଜେ ମା ରାଚା । ଏନ୍ଦେର୍ ଗେ କା ଦୁନିୟାଁ ନୁ ପାପ୍ ମାଁ ରାଚାଦ୍ । ହୁବ୍ ଡ଼ାର୍ ସବୁ ବାକେନ୍ ହୁ ବାଟ୍ କିନୁ କୁଦ୍ଦାରାଲା ଆରୁ ପାରମେଶ୍ୱରସ୍ ଗାନେ କାତଥା କାମଲାର୍ ।

ଲେକିନ୍ ହୁବାଟ୍ କିନୁ ଅଣ୍ଟା ନେର୍ରୁ ରାଚାଦ୍ । ହୁଦ୍ ବାଗ୍ ଗେ ଚାଇଁଚର୍ ରାଚାଦ୍ । ହୁଦ୍ ହୁ ଆଳିବୋନ୍ ମେନ୍ ଚା ,” ଏନ୍ଦେର୍ ଗେକା ସଥେନ୍ ପାରମେଶ୍ୱରସ୍ ନିମାରିନ୍ ଇ ବାଟ୍ କିନ୍ ନ୍ତା ଏନ୍ଦେରିନ୍ ଭି ମାନ୍ନୁନ୍ତା ଫାଡ଼ୁବୋନ୍ ମୋହା ଗେ ମାନା କାମ୍ ଚାକା ଦାସ୍ ?”

ହୁ ଆଲିଦ୍ ଉତର୍ ଚିଚ୍ ଚାଦ୍,”ପାରମେଶ୍ୱରସ୍ ଏମାରିନ୍ ତେଙ୍କାଦାସ୍ କା ଏମ୍ ହୁ ବାନେ ଆରୁ ଖାରାପ୍ ବୁଦ୍ଧି ଘି ମାନ୍ନୁବୋନ୍ ଆମ୍ବିକିରି ଏନ୍ଦ୍ରିନ୍ ଭି ମାନ୍ନୁ ଘି ଫାଡ଼ୁବୋନ୍ ମୋହା ଅଙ୍ଗତ୍ । ପାରମେଶ୍ୱରସ୍ ଏମାରିନ୍ ତେଂକାଦାସ୍ କା ହାଲେ ଭି ନିମ୍ ହୁ ଫାଡ଼ୁବୋନ୍ ମୋକକାର୍ ଆରୁ ହୁବୋନ୍ ଏଁସ୍ କାର୍ ହାଲେ, ତା ନିମ୍ ଖିୟର୍ କୋର୍ ।“

ହୁ ନେର୍ରୁ ବୋଦ୍ କାଥ୍ ଥା ତେଂଗିୟାଦ୍ ,”ଇ ବୋଦ୍ ସଥେନ୍ ମାଲ୍ଲିଦ୍ ! ନିମ୍ ମା ଖିଦାର୍ । ପାରମେଶ୍ୱରସ୍ ଆହାଲ୍ ଦାଶ୍ କା ଏସ୍ କିନ୍ ଭି ନିମ୍ ହୁ ଫାଡ଼ୁବୋନ୍ ମୋହର୍ ହାଲେ, ନିମ୍ ପାରମେଶ୍ୱରସ୍ ଘି ଲେଖା ମାନର୍ କୋର୍ ଆରୁ ହୁସ୍ ଘି ଲେଖା ବାନେ ଆରୁ ଖାରାପ୍ ଘି ବୁଦ୍ଧି ବୁଝୁରା ଲାଗ୍ ଗୋର୍ ।“

ହୁ ଆଲିବୋଦ୍ ଏରିୟାଦ୍ କା ହୁ ଫାଡ଼ୁବୋଦ୍ ଲୋଭ୍ ଲୋଭାନ୍ ଏଥ୍ରାଲା ଆରୁ ଏମ୍ବା ଆତ୍ଲି ଲେଖା ଏଥ୍ରାଲାଦ୍ । ହୁଦ୍ ସାମାଝଦାର୍ ମାନ୍ନା ଚାହାଲାବ୍, ହୁଦ୍ ଘି ଲାଗାନ୍ ହୁଦ୍ ଫାଡ଼ୁବୋନ୍ ଚୋହାକିରି ମାକ୍ ଖା ଚିଚାଦ୍ । ଆରୁ ହୁଦ୍ ନିଜର୍ ଆଲାସିନ୍ ଭି ହୁଦ୍ ଘି ଗାନେ ରାଚାସ୍ ହୁ ଫାଡ଼ୁବୋନ୍ ଚିଚ୍ ଚାଦ୍ ଆରୁ ହୁ ସିସ୍ ମୋକ୍ ଖେ ଚିଚ୍ ଚାସ୍ ।

ହୁ ବାକେନ୍ ହି, ହୁବ୍ଡ଼ାର ଘି ହାନ୍ନୁଗୁଠି ଖୁଲ୍ ରା କେରାଦ୍, ଆରୁ ହୁବ୍ଡ଼ାର୍ ବୁଝୁରାର୍ କେରାର୍ କା ହୁବ୍ଡ଼ାର୍ ଚିଢ଼ା ମାଲ୍ଲା ଆତକା ରୁର୍ , ହୁବ୍ଡ଼ାର୍ ଆଥା ଗୁଠିବୋନ୍ ଅଣ୍ଟାନୁ ସାଟିକିରି ହୁବ୍ଡ଼ାର୍ ଚିଢ଼ା କାମିକିରି ହୁବ୍ଡ଼ାର୍ ନିଜର୍ ମେଦୁବୋନ୍ ଢାପାଗେ କୋଶିସ୍ କାମ୍ ଚାର୍ ।

ବାକେନ୍ ଆଲାସ୍ ଆରୁ ହୁସ୍ ଘି ଆଲି ଗାନେ ହୁ ବାଟ୍ କିନୁ କୁଦ୍ ନା ବାକେନ୍ ପାରମେଶ୍ୱରସ୍ ଘି ଆୱାଜ୍ ବୋନ୍ ମେନ୍ ଚାର୍ । ହୁବ୍ଡ଼ାର୍ ଦୁଇଲୋର୍ ପାରମେଶ୍ୱରସ୍ ସ୍ତିନ୍ ନୁହୁଁରା ବେଦିୟାର୍ । ହୁ ବାକେନ୍ ପାରମେଶ୍ୱରସ୍ ଆଲାସିନ୍ ଚିର୍ ରା ରାଚାସ୍ ।“ ନିନ୍ ଏକାସାନ୍ ରାଦାଏଁ ?” ଆଦାମସ୍ କାତଥା ତେଂଗିୟାସ୍ ,” ଏନ୍ ନିନ୍ ବାଟ୍ କିନୁ କୁଦ୍ ନା ଲେଖା ମେନ୍ଦ୍ରିୟାଦ୍, ଆରୁ ଏନ୍ ଏଲଚକାନ୍ କେର୍ କାନ୍ , ଏନ୍ଦେର୍ ଗେ କା ଏନ୍ ବିନା ଚିଢ଼ାନୁ ରାଚ୍ କାନ୍ ଚାକାନ୍ । ବାକେନ୍ ଏନ୍ ନୁହୁଁରା କାନ୍ ଚିଚ୍ କାନ୍ ।“

ଆରୁ ହି ପାରମେଶ୍ୱରସ୍ ମେନ୍ ଚାସ୍ , “ନିଂଗାନ୍ ନେର୍ ତେଂଗିୟାର୍ କା ନିନ୍ ବିନା ଚିଢ଼ାନୁଁ ଆତଲ୍ ଦାୟ ? ଏନ୍ଦେର୍ କା ନିନ୍ ହୁ ଫାଡ଼ୁବୋନ୍ ମୋକ୍ କା ଦାୟ, ଜେବୋନ୍ ମୋହାଗେ ଏନ୍ ନିଂଗାନ୍ ମାନା କାମ୍ ଚାକାନ୍ ?” ଆଲାସ୍ ଜବାବ୍ ଚିଚାସ୍ ,”ନିନ୍ ଏଂଗାନ୍ ଇ ଆଲିବୋନ୍ ଚିଚ୍ କାୟ ହୁଦ୍ ଏଂଗାନ୍ ଇ ଫାଡ଼ୁବୋନ୍ ଚିଚ୍ଚାଦ୍ ।“ ହୁ ବାକେନ୍ ପାରମେଶ୍ୱରସ୍ ଆଲିବୋନ୍ ମେନ୍ ଚାସ୍ ,”ନିନ୍ ଏନ୍ଦେର୍ କାମ୍କି ଚିଚ୍ କି ?” ହୁ ଆଲିବୋଦ୍ ତେଂଗିୟାଦ୍ ,”ନେର୍ରୁ ବୋଦ୍ ଏଂଗାନ୍ ଧୋଖା ଚିଚ୍ଚାଦ୍ ।“

ପାରମେଶ୍ୱରସ୍ ନେର୍ରୁ ବୋନ୍ ତେଂଗିୟାସ୍ ,”ନିନ୍ ତା ଶ୍ରାପିତ୍ ଆତିଲ୍ ଦି ! ନିନ୍ ନିଜର୍ କୁଲୁ ଘି ବୋଲ୍ ନୁ ଏକୋଏ ଆରୁ ହାଜ୍ଜୁବୋନ୍ ଟାଟୋଏ । ନିନ୍ ଆରୁ ଇ ଆଲିଗାନେ ଏକ୍ ଦୁସ୍ରେ ଘି ଲାଗାନ୍ ବେଇରି କାମୋର୍ ଆରୁ ନିଂଘାୟ ହାଦ୍ଦୁ ଗୁଠିନ୍ ଆରୁ ହୁଦ୍ ଘି ହାଦ୍ଦୁର୍ ଗୁଠିର ଗାନେ ଏକ୍ ଦୁସ୍ ରେ ଘି ଲାଗାନ୍ ବେଇରି କାମୋର୍ । ଇ ଆଲିଘି ଜାତିର୍ ନିଂଘାଏ ବଂଶବୋନ୍ କୁଚୋର୍ , ଆରୁ ନିନ୍ ହୁଦ୍ ଘି ଗୁଢ଼ିବୋନ୍ ଠୋଠୋଏ ।“

ବାକେନ୍ ପାରମେଶ୍ୱରସ୍ ଆଲିବୋନ୍ ତେଂଗିୟାସ୍,”ଏନ୍ ନିଘାଁଏ ହାଦ୍ଦୁ ଜନମ୍ କାମନା ବାକେନ୍ ମୁରୁକ ବାଥା ପିଢ଼ା ବାଢ଼ାବା ଚୋନ୍ ।ନିନ୍ ନିଜର ଆଲାସ୍ ଘି ଲାଗାନ୍ ଲାଲ୍ ରୋୟ କୋୟ, ଆରୁ ହୁସ୍ ନିଘାଁ ମିୟାଁ ଦାୟା କାମୋସ୍ ।“

ପାରମେଶ୍ୱରସ୍ ଆଲାସିନ୍ ତେଂଗିୟାସ୍ ,”ନିନ୍ ନିଜର ଆଲି ଘି କାତ୍ ଥା ମେନ୍ ଚାକାଏ ଆରୁ ଏଂଘାଁଏ କାଥାବୋନ୍ ମା ମେନ୍ଚାକାଦାଏ । ହୁଦ୍ ଘି ଲାଗାନ୍ ଏଁହେଲାଦ୍ ଶ୍ରାପିତ୍ ମାନ୍ଚା କେର୍ କି ଚିଦ୍, ଆରୁ ନିଂଗାଗେ ମୋହାଗେ ଉବ୍ ଜାନା ବାକେନ୍ କଠିନ ପରିଶ୍ରମ କାମାଗେ ପାଡ଼୍ରଦ୍ । ଆକ୍ କୁନ୍ ନିନ୍ ଖିୟଏ କୋୟ , ଆରୁ ନିଂଘା ଶାରିର୍ ବୋଦ୍ ଧୂଲିନୁ ମିଶ୍ରକୋଦ୍ ।“ ହୁ ଆଲାସ୍ ନିଜର୍ ଅଲି ଘି ନାମେ ହାୱା ଉଇୟାସ୍ , ଇଦ୍ ଘି ମାନେ “ଜିୟା ଚିନା ବାଲା “ ,ଏନ୍ଦେର୍ ଗେ କା ହୁଦ୍ ଜାମା ଜାତି ଗୁଠିର୍ ଘି ଆୟାଂଗ୍ ମାନୋଦ୍ । ଆରୁ ପାରମେଶ୍ୱରସ୍ ଆଦାମ୍ ଆରୁ ହାୱା ବୋନ୍ ଜାନ୍ତୁ ଘି ଛାଲା ସ୍ତିନ୍ ଚିଢ଼ା କାମାକିରି ହୁବ୍ଡ଼ାରିନ୍ ଆତ୍ ତା ଚାସ୍ ।

ଆରୁ ପାରମେଶ୍ୱରସ୍ ତେଂଗିୟାସ୍ ,” ଆରୁ ବାନେ ଖାରାପ୍ ବୋନ୍ ଆହାନ୍ନା ଗେ ମାନୁୱାର୍ ଏଘାଁ ଲେଖା ମାନ୍ ଚାର୍ କେରାର୍, ବାକେନ୍ ହୁବ୍ଡ଼ାରିନ୍ ହୁ ଜିୟା ଘି ମାନ୍ନୁ ଘି ଫାଡ଼ୁବୋନ୍ ମୋହାଗେ ମା ଚିନା କାତଥା କା ହୁବ୍ଡ଼ାର୍ ସବୁବାକେନ୍ ଉଜ୍କାକାରୋର୍ ।“ ବାକେନ୍ ପାରମେଶ୍ୱରସ୍ ଆଦାମ୍ ଆରୁ ହାୱାବୋନ୍ ବାଟ୍ କିନ୍ ନ୍ତିନ୍ ବାହାରି ଆଥ୍ରେଇ ଚିଚ୍ ଚାସ୍ । ଆରୁ ପାରମେଶ୍ୱରସ୍ ଏକ୍ ରିନ୍ ଭି ହୁ ଜିୟା ରାନା ମାନ୍ନୁ ଘି ଫାଡ଼ୁବୋନ୍ ମୋହାଗେ ରୋକାଗେ ଲାଗାନ୍ ହୁ ବାଟ୍ କି ଘି କୋର୍ନା ପାବୁବୋନ୍ ତାକତ୍ ବୋର୍ ସରଗ୍ ଦୁତ୍ ବୋନ୍ ଉଇୟା ଚିଚ୍ ଚାସ୍ ।