26. ଯୀଶୁସ୍ ନିଜର୍ ସେବା ସୁରୁ କାମାଦାସ୍

ସାଇତାନ୍ ଘି ବିଡ଼ନାନ୍ ଇନ୍‌କାର୍ କାମ୍‌ନା ବାଦେନୁ, ଯୀଶୁସ୍ କିରି କିରି ଗାଲିଲ୍ ଗେ ବାରଚାସ୍ । ଇଦ୍ ହୁ ଆଡ଼ାଦ୍ ଏକାସାନ୍ ହୁସ୍ ରାଆଲାସ୍ । ପବିତ୍ର ଆତ୍ମାଦ୍ ହୁସିନ୍ ମୁରୁଖ୍ ଶକ୍ତି ଚିୟାଲାଦ୍, ଆରୁ ଯୀଶୁସ୍ ଅଣ୍ଟା ଆଡ଼ାସ୍ତିନ୍ ଦୁସ୍‌ରା ଆଡ଼ାଗେ କେରାସ୍ ଆରୁ ଆଲାରିନ୍ ବୁଦ୍ଧି ଚିତ୍‌ଚାସ୍ । ଜାମାର୍ ହୁସ୍‌କୀ ବାରେନୁ ବାନେ କାତ୍‌ଥା ତେଙ୍ଗିୟାର୍ ।

ଯୀଶୁସ୍ ନାସ୍‌ରାତ୍ ପାଡ଼ାଗେ କେରାସ୍ । ଇଦ୍ ହୁ ପାଡାଦ୍ ଏକସାନ୍ ହୁସ୍ ନିଜର୍ ଛୋଟେ ବାକେନ୍ ରାଆଲାସ୍ । ସାତ୍ ଦିନ୍ ଘି ଉଲ୍ଲା, ହୁସ୍ ପ୍ରାର୍ଥନା କାମ୍‌ନା ଘି ଆଡ଼ାଗେ କେରାସ୍ ।ଆଗୁଆର୍ ହୁସିନ୍ ଯିଶାଇୟସ୍ ଭବିଷ୍ୟତବକ୍ତାସ୍ କି ଖବର୍ ଘି ଅଣ୍ଟା ବହି ଚିଚ୍‌ଚାର୍ । ହୁବ୍ଡ଼ାର୍ ସୋଚାଲାର୍ କା ହୁସ୍ ହୁସ୍‌ତିନ୍ତି ପାଡ଼ସ୍ । ଆଖ୍‌ରିନୁ, ଯୀଶୁସ୍ ହୁ ବହିବୋନ୍ ଖୋଳିକିରି ହୁଦ୍ ଘି ଅଣ୍ଟା ଭାଗ୍‌ବୋନ୍ ଆଲାର୍ ଘି ଲଗାନ୍ ପାଢ଼୍‌ଚାସ୍ ।

ଯୀଶୁସ୍ ପାଢ଼୍‌ଚାସ୍,“ପାରମେଶ୍ୱରସ୍ ଏଂଗାନ୍ ନିଜର୍ ଆତ୍ମାବୋନ୍ ଚିଚ୍‌କା ଦାସ୍, ହୁଦ୍ ଘି ଲାଗାନ୍ ଭୁଖାର୍‌ଗେ ସୁସମାଚାର୍ ପ୍ରଚାର୍ କାମାଗେ ଅଂଗନ୍ । ହୁସ୍ ଏଂଗାନ୍ ଇଦ୍ ଘି ଲାଗାନ୍ ତାଇୟାସ୍ କା ଜେଲ୍‌ନୁ ରାନାରିନ୍ ଅଥରନ୍, ଅନ୍ଧାରିନ୍ ଏରାଗେ ହାନ୍ନୁ ଚିୟା ଅଂଗନ୍, ଆରୁ ହୁବ୍ଡ଼ାରିନ୍ ଛୁଟ୍‌କାରା ଚୋନ୍ ହୁବ୍ଡ଼ାରିନ୍ ଦୁସ୍‌ରା ଆଲାର୍ କୁଚାଲ୍‌ନାର୍ । ଇଦ୍ ହୁ ସମୟଦ୍ ଯେ ବାକେନ୍ ପାରମେଶ୍ୱରସ୍ ନାମା ମିଆଁ ଦାୟା କାମୋସ୍ ଆରୁ ଜାମାରିନ୍ ସାହାୟାତା କାମସ୍ ।”

ଫିର୍ ଯୀଶୁସ୍ ଆକିୟାସ୍ । ଜାମା ଆଲାର୍ ହୁସିନ୍ ବାଡ଼େ ମନ୍ ଧ୍ୟାନ୍ ସ୍ତିନ୍ ଏରାଗେ ଲାଗିୟାର୍ ।ହୁବ୍ଡ଼ାର୍ ଆକ୍‌ଖିୟାର୍ କା ପବିତ୍ର ଶାସ୍ତ୍ର ଘି ଯେନ୍‌ଭାଗ୍ ହୁସ୍ ଆକ୍‌କୁନ୍ ପାଢ଼୍‌ଚାସ୍ ହୁଦ୍ ମାସିହସ୍ ଘି ବାରେ ନୁ ରାଚାଦ୍ । ଯୀଶୁସ୍ ତେଂଗିୟାସ୍, “ଜେନ୍ କାତ୍‌ଥା ଏନ୍ ଆକ୍‌କୁନ୍ ନିମାଗେ ପାଢ଼ଚ୍‌କାଦାନ୍ ହୁଦ୍ ଇ ସମୟ ଘାଟ୍‌ରାଲି ।” ଜାମା ଆଲାର୍ ଚକିତ୍ ମାଞ୍ଚାର୍ କେରାର୍ । ହୁବ୍ଡ଼ାର୍ ତେଂଗିୟାର୍, ଏନ୍ଦେର୍ ଇସ୍ ୟୁସୁଫ୍‌ସି ଘି ହାଦ୍‌ଦୁ ମାଲ୍‌ଦାସ୍ ?”

ବାକେନ୍ ଯୀଶୁସ୍ ତେଂଗିୟାସ୍,“ଇଦ୍ ସଥେନ୍ କା ଆଲାର୍ ଏନ୍‌ନେ ଭବିଷୟତବକ୍ତାସିନ୍ ଏକ୍‌ଲା ହିଁ ଗ୍ରହଣ୍ ମା କାମ୍‌ନାର୍ ଯେନ୍ କା ହୁବ୍ଡ଼ାରି ଘି ପାଁଡ଼ାନୁ ପାର୍‌ଦାରୋସ୍ । ଏଲିହା ଭବିଷ୍ୟତବକ୍ତାସ୍ କି ସମୟନୁ, ଇସ୍ରାଏଲନୁ ଜୁକୁକେନ୍ ରାଣ୍ଡି ଆଲାର୍ ରାଚାର୍ । ଲେକିନ୍ ଯେତେ ବକେନ୍ ସାଢ଼େ ତିନି ବଛର୍‌ତୋକ୍ ଚେପୁ ମାଲ୍ଲା ମାନୁଦ୍ ପାରମେଶ୍ୱରସ୍ ଏଲିହାବୋନ୍ ଇସ୍ରାଏଲନୁ ଏକା ରାଣ୍ଡି ଘି ସାହାର୍ଯ୍ୟ କାମାଗେ ତାଇୟାସ୍ । ଇଦ୍ ଘି କାରଣ, ହୁସିନ୍ ଏଲିହାସିନ୍ ଆରୁ ଏକାଦୁସ୍‌ରା ରାଜିନ୍‌ନ୍ତା ରାଣ୍ଡି ଘି ଚାହାଁ ଗେ ତାଇୟାସ୍ ।”

ଯୀଶୁସ୍ ତେଂଗ୍‌ତେ କେରାସ୍,“ ଆରୁ ଏଲିସା ଭବିଶ୍ୟତବକ୍ତାସ୍ ଘି ସମୟନୁ, ଇସ୍ରାଏଲନୁ ଜୁକୁକେନ୍ ଆଲାର୍ ଚାମ୍‌ଡ଼ା ଘି ବେମାରତି ଖାତ୍‌ରକାଚାର୍ । ଲେକିନ୍ ଏଲିସାସ୍ ହୁନୁନ୍‌ତି ନେକିନିନ୍ ଭି ବାନେ ମାଲ୍ଲା କାମୁସ୍ । ହୁସ୍ ଖାଲି ଇସ୍ରାଏଲ ଘି ଶତ୍ରୁ ଗଠିର୍ ଘି ସେନାପତି ନାମାନ୍ ସିନ୍ ବାନେ “ନାନ୍‌ଚାସା” ଲେକିନ୍ ଯେନ୍ ଆଲାର୍ ଯୀଶୁସ୍ ଘି ମେନାଲାର୍ ହୁର୍‌ୟୁହୁଦୀ ରାଚାର୍ । ଇଦ୍ ଘି ଲାଗାନ୍ ଯେନ୍ ହୁବ୍ଡ଼ାର୍ ହୁସ୍ ଏନ୍‌ନେ ତେଂଗ୍‌ନା ମେନ୍‌ଚାର୍ ହୁସ୍ ଘି ମିଆଁ ଖିସାରାଚାର୍ ।

ନାସ୍‌ରାନ୍‌ନ୍ତ ଆଲାର୍ ଯୀଶୁସିନ୍ ଧାର୍‌ଚାର୍ ଆରୁ ପ୍ରାର୍ଥନା ଘି ଆଡ଼ାସ୍ତିନ୍ ଘେସ୍‌ରାରାକିରି ବାହାରି ଅଥ ରେଇଚାର୍ । ହୁବ୍ଡ଼ାର୍ ହୁସିନ୍ ପିଟା ବେଦାଗେ ଲାଗାନ୍ କିୟାଁ ଖେବ୍ଡ଼ା ଗେ ଆଣ୍ଟା ଚାଟ୍‌ଣି ଘି ମିଆଁ ଆଚାର କେରାର୍ । ଲେକିନ୍ ଯୀଶୁସ୍ ଭିଢ଼୍ ସ୍ତିନ୍ ଉର୍‌ଖାସ୍ କେରାସ୍ ଆରୁ ନାସ୍‌ରାଦ୍ ପାଡ଼ାବନ ଆମ୍ବିକିରି ବୁଂଗିୟା ଚିଚାସ୍ ।

ଫିର୍ ଯୀଶୁସ୍ ଜାମା ଗାଲିଲ୍ ଘି ଆଡ଼ାଗେ କେରାସ୍, ଆରୁ ବାଡ଼୍‌କା ଭିଡ଼୍ ହୁସିକି ଚାହାଁଗେ ବାର୍‌ଚାର୍ । ହୁବ୍ଡ଼ାର୍ ଏନ୍ନେ ଜୁକ୍‌କୁ ଆଲାରିନ୍ ହୁଆଁକିରି ବାର୍‌ଚାର୍ ଯେ କା ବେମ୍‌ରିହାର୍ ଆରୁ ଲେଙ୍ଗଡ଼ା ରାଚାର୍ । ହୁନୁସ୍‌ସ୍ତିନ୍ କିଛିର୍ ଏରାଗେ, ଏକାଗେ, ମେନାଗେ ଆରୁ କାଚ୍‌ଲେଖରା ପଲ୍‌ନାର୍, ଆରୁ ଯୀଶୁସ୍ ହୁବ୍ଡ଼ାରିନ୍ ବାନେ ନାଚାସ୍ ।

ଇଦ୍ ଘି ବାଦ୍‌ଲେନୁ ଜୁକ୍‌କୁନ୍‌ସ୍ତିନ୍ ଏନ୍ନେ ଆଲାର୍ ଯୀଶୁସ୍ ଘି ଚାହାଁଗେ ଅନ୍ଦ୍‌ରାର୍ ନେର୍‌ସାନ୍ ଖରାପ୍ ଆତ୍ମା ରାଚାଦ୍ । ଯୀଶୁସ୍ ଖରପ୍ ଆତ୍ମା ବୋନ୍ ହୁସ୍‌ସ୍ତିନ୍ ଉର୍‌ଖାଗେ ଅନୁମୋତୀ ଚିଚାସ୍ । ହୁ ଖରାପ୍ ଆତ୍ମା ଗୁଠିଦ୍ ଜାମାବାକେନ୍ ଚିରର୍‌ରାଦ୍, ନିନ୍ ପାରମେଶ୍ୱରସ୍ ଘି ହାଦୁ !“ ଭିଡ଼ନ୍ତା ଆଲାର୍ ଚାକ୍‌ରାର୍ କେର୍‌ରାର୍, ଆରୁ ହୁବ୍‌ଡ଼ାର୍ ପାରମେଶ୍ୱରସ୍ ଘି ସ୍ତୁତି ନାନ୍ ଚାର୍ ।

ଫିର୍ ଯୀଶୁସ୍ ବାରଟା ଆଲାରିନ୍, ଚାଜିୟାସ୍ ହୁବ୍ଡ଼ାରିନ୍ ହୁସିନ୍ ନିଜର୍ ପ୍ରେରିତ୍ ତେଂଗିୟାସ୍ ହୁ ପ୍ରେରିତ୍ ଜାମାର୍ ହୁସ୍ ଘି ସାଂଗେନୁ କେରାର୍ ଆରୁ ହୁସ୍‌ସ୍ତିନ୍ ବୁଦ୍ଧି ଗ୍ରହଣକାମ୍‌ଚାର୍ ।