39. ଯୀଶୁସ୍ ଘି ମିୟାଁ ମୁକଦ୍ଦମା ଚାଲାବାଚାର୍

ଆକ୍‌କୁନ ଇଦ୍ ଆଧା ମାହାଁ ଘି ସମୟ ରାଚାଦ୍ । ହୁବ୍ଡ଼ାର୍ ସେନାର ଯୀଶୁସିନ୍ ମାହାୟାଜକସ୍ ଘି ଏଡ଼ପା ଗେ ଅଚ୍‌ଚାର୍ କେରାର, ଏନ୍ଦେର୍ ଗେ କା ଯୀଶୁସିନ୍ ପୁଛ୍ ତାଛ୍ କାମାଗେ ଚାହାଲାର୍ । ପାତ୍‌ରାସ୍ ଗେଛାନ୍‌ନ୍ତି ହୁବ୍ଡ଼ାରିନ୍ ପିଛା କାମାଲାସ୍ । ଯେ ବାକେନ୍ ସେନାର୍ ଯୀଶୁସିନ୍ ଏଡ଼ପାନୁ ଅନ୍ଦରାର୍ ବାର୍‌ଚାର୍ ତା ପାତ୍‌ରାସ୍ ବାହାରି ରୁକ୍‌ରା କିରି ଚିଚ୍‌ଚୁ ସେକ୍‌ରାଲାସ୍ ।

ଏଡ଼ପା ଉଲାନୁ, ଇହୁଦିଇ ଆଗୁଆର୍ ଯୀଶୁସ୍ ଘି ମିୟାଁ ମୁକଦ୍ଧମା ଚାଲାବାଚାର । ହୁବ୍ଡ଼ାର୍ ହୁସ୍ ଘି ବିରୁଦ୍ଧନୁ ଝୁଠା କାତ୍‌ଥା ଗୁଠିବୋନ୍ ତେଙ୍ଗାଗେ ଲାଗାନ୍ ଜୁକ୍‌କୁ ଗୁଡ଼େ ଝୁଠା ଗାୱାହାରିନ୍ ଅନ୍ଦରାର୍ । ହାଲେ ହିଁ, ହୁବ୍‌ଡାର୍ ଘି କାତ୍‌ଥାଦ୍ ଏକ୍ ଦୁସ୍‌ରେ ଘି ସହୋମତ୍ ମା ରାଚାଦ୍, ଇଦ୍ ଘି ଲଗାନ୍ ଇହୁଦୀର ଆଗୁୱାର ଇବୋନ୍ ଶାବିତ୍ କାମାଗେ ମା ପଲ୍ଲୀୟାର୍ କା ହୁସ୍ କିଛି କାତ୍‌ଥା ଘି ଲାଗାନ୍ ଦୋଶିସ୍ ରାଚାସ୍। ଯୀଶୁସ୍ ଏନ୍ଦେର୍ ହି ମା ତେଙ୍ଗିୟାସ୍।

ଆଖିର୍ ନୁ, ମହାୟାଜକ୍‌ସ୍ ସିଧା ଯୀଶୁସ୍ ତାରା ଏରା କିରି ଢ଼େଙ୍ଗିୟାସ୍ ଏଙ୍ଗାନ୍ ତେଙ୍ଗା, “ଏନ୍ଦେର୍ ନିନ୍ ହି ଜିବିତ୍ ପାରମେଶ୍ଵର୍‌ସ୍ ଘି ହାହ୍‌ଦୁ ମାସିହିସ୍ କା ?“

ଯୀଶୁସ୍ ଢ଼େଙ୍ଗିୟାସ୍, “ଏନ୍ ଅତଲ୍‌ଦାନ୍ ଆରୁ ନିମ୍ ଏଙ୍ଗାନ୍ ପାରମେଶ୍ଵର୍‌ସ୍ ସାଙ୍ଗେନୁ ଅକ୍‌ନା ରାଚାକା ଆରୁ ସରଗ ସ୍ତିନ୍ ବାରନା ବୋନ୍ ଭି ଏରୋର୍।“ ମହାୟାଜକ୍‌ସ୍ ନିଜର ଚିଢା ବୋନ୍ ଚାର୍‌ରେଇ ଚିଚ୍‌ଚାସ୍ ଏନ୍ଦେର୍ ଗେକା ଯୀଶୁସ୍ ଜେନ୍ କାଢ଼୍‌ଥା ବୋନ୍ ଢ଼େଙ୍ଗିୟାସ୍ ହୁସ୍ ହୁ କାଢ଼୍‌ଥା ନୁ ମୁରୁଖ୍ ଖିସାରାଚାସ୍। ହୁସ୍ ଦୁସ୍‌ରା ଆଗୁଆର୍ ଘି ମିୟାଁ ଚିର୍‌ରା ରାଚାସ୍। “ଏଙ୍ଘାନ୍ ବାତାବାଗେ ଲାଗାନ୍ ନେଖାର୍ ଘି ଗାୱାହା ଘି ଜାରୁରାତ୍ ମାଲ୍ଲାବିନ୍ କା ଇ ଆଲାସ୍ ଏନ୍ଦେର୍ କାମ୍‌ଚକା ଦାସ୍ ! ନିନ୍ ଖୁଦ୍‌ବୋନ୍ ହୁସିନ୍ ଇ ତେଙ୍ଘତେ ମେଞ୍ଜ୍‌କାଦାସ୍ ଦାର୍ କା ହୁସ୍ ପରମେଶ୍ଵରସ୍ ହାହଦୁସୀ ଇସ୍ ଘି ବାରେ ନୁଏନି ନିମ୍‌ହାର୍ ଘି ଏନ୍ଦେର୍ କାମ୍‌ନା ରାଇଦ୍ ?”

ଜାମା ଇହୁଦି ଆଗୁଆର୍ ମହାୟାଜକ ସିନ୍ ଜାବାବ୍ ଚିଚ୍‌ଚାର୍, “ହୁସ୍ ଖିନା ଘି ଲାଏକସ୍ ଆତଲ୍‌ଦାସ୍।“ ବାକେନ୍ ହୁବଡାର୍ ଯୀଶୁସ୍ ଘି ହାନ୍ନୁ ପାଟି ହିଁଚାର୍, ହୁସ୍ ଘି ମିୟାଁ ଥୁପ୍ ପିୟାର୍, ହୁସିନ୍ ଡେମ୍‌ଚାର୍, ଆରୁ ହୁସ୍ ଘି ମାଜାକ୍ ଉଡାବାଚାର୍।

ଆରୁ ପାତ୍‌ରାସ୍, ଯେ ବାକେନ୍ ହୁସ୍ ଏଡ଼ପା ଘି ବାହାରି ଅକ୍‌ଖାଲାସ୍ ବାକେନ୍ ଅଣ୍ଟା ଦାସି କୁକାଏ ହୁ ସିନ୍ ଏରିୟାଦ୍ । ହୁଦ୍‌ ହୁସିନ୍ ତେଙ୍ଗିୟାଦ୍,” ନିନ୍ ଭି ଯୀଶୁ ଘି ସାଙ୍ଗେନୁ ରାଚ୍‌କାଏ !” ପାଢ଼ରାସ୍ ମାନା କାମ୍‌ଚାସ୍ । ବାଦେନୁଁ, ଦୁସ୍‌ରା କୁକାଏଁହୁ ଇ କାତ୍‌ଥା ବୋନ୍ ତେଙ୍ଗିୟଦ୍, ଆରୁ ପାଢ଼୍‌ରାସ୍ ଫିର୍ ସେ ମାନା କାମ୍‌ଚେଚାସ୍ । ଆଖିର୍ ନୁ, କିଛି ଆଲାର୍ ତେଙ୍ଗିୟାର୍,“ ଏମ୍ ଆହାଲ୍‌ଦାମ୍ କା ନିନ୍ ଯୀଶୁସ୍ ଘି ସଙ୍ଗେନୁ ରାଚ୍‌କାଏ ଏନ୍ଦେର ଗେ କା ନିମ୍ ଦୁଇ ଲୋକ୍ ଗାଲିଲ ସ୍ତାର୍ ।

ବାକେନ୍ ପାତ୍‌ରାସ୍ ତେଙ୍ଗିୟାସ୍,“ ଆଗାର୍ ଏନ୍ ଇ ଆଲାସିନ୍ ଆହାଲ୍ ଦାନ୍ ହାଲେ ପାରମେଶ୍ୱରସ୍ ଏଙ୍ଗାନ୍ ଶାରାପ୍ ଚିୟୋଚ୍!” ହୁ ବାକେନ୍ ହି ପାତ୍‌ରାସ୍ ଇ ଲେଖାନୁ କସମ୍ ମୋକ୍‌ଖା ଘି ବାଦେନୁ, ଅଣ୍ଟା ହେରୁ ଚିର୍‌ରା ରାଦ୍ । ଯୀଶୁସ୍ ପାଛ୍‌ଲି କିରାର୍ କିରି ପାତ୍‌ରାସ୍ ସିନ୍ ଏରିୟାସ୍ ।

ପାତ୍‌ରାସ ହୁସାନ୍ ନ୍ତି ବୁଙ୍ଗେ ଚିଚ୍‌ଚାସ୍ ଆରୁ ମୁରୁଖ୍ ଅଲ୍‌ହିୟାସ୍ । ହୁ ସମୟନୁ, ଯୀଶୁ ସିନ୍ ଖିୟାଗେ ଲାଗାନ୍ ଇହୁଦା ଏରିୟାସ୍ କା ଇହୁଦିର୍ ଆଗୁଆର୍ ଯିଶୁ ସିନ୍ ଖିୟାଗେ ଦଣ୍ଡ ଚିଚ୍‌ଚାକାନା । ଇହୁଦା ଦୁଃଖି ମାନ୍‌ଚାସ୍ ଆରୁ ଖୁଦ୍ ବୋନ୍ ପିଟ୍‌ଟେ ଚିଚ୍‌ଚାସ୍ ।

ହୁ ରାଜି ନ୍ତା ରାଜ୍ୟପାଳ ପିଲାତୁସ୍ ରାଚାସ୍ । ହୁସ୍ ରୋମ୍ ରାଜି ଗେ ଲାଗାନ୍ ନାଲ୍‌ଖୁ କାମାଲାସ୍ । ଇହୁଦି ଆଗୁୱାର ଇଶୁ ସିନ୍ ହୁସ୍ ଘି ଚାହାଁନୁ ଆଚ୍‌ଚାର୍ । ହୁବ୍ଡ଼ାର୍ ଚାହାଲାର୍ କା ପିଲାତୁସ୍ ହୁ ସିନ୍ ଖିନା ଘି ଦଣ୍ଡ୍ ଚୋସ୍ ଆରୁ ହୁ ସିନ୍ ପିଟୋଚୋସ୍ । ପିଲାତୁସ୍ ଇଶୁସିନ୍ ମେନ୍‌ଚାସ୍,“ ଏନ୍ଦେର୍ ନିନ୍ ଇହୁଦିର୍ ଘି ରାଜଏ କା?”

ଯୀଶୁସ୍ ଜାବାବ୍ ଚିଚ୍‌ଚାସ୍,“ ନିନ୍ ସଥେନ୍ ତେଙ୍ଗାଲ୍ ଦାଏ । ଲେକିନ୍ ଏଙ୍ଘାଁ ରାଜି ଏସାନ ଧାର୍‌ତିନୁ ମାଲ୍ଲା । ଆଗାର୍ ରୋଦନେହାଲେ ଦାସ୍ ଗୁଠିର୍ ଏଙ୍ଘାଁ ଲାଗାନ୍ ଲାଢ଼େଇ କାମୋର୍ ନେ । ଏନ୍ ଧାରତି ନୁ ପାରମେଶ୍ୱରସ୍ ଘି ବାରେନୁ ସାଚ୍ଚାଇ ତେଙ୍ଗାଗେ ଲାଗାନ୍ ବାର୍‌ଚ୍‌କା ଦାନ୍ । ହାର୍ ଅଣ୍ଟା ଆଲାର୍ ସାଚ୍ଚାଇ ବୋନ୍ ପିୟାର୍ କାମ୍‌ନାର୍ ହୁବ୍ଡ଼ାର୍ ଏଙ୍ଘାଁଏ ମେନ୍‌ନାର ।” ପିଲାତୁସ୍ ପୁଛ୍ ଛାସ୍,“ ତା ସାଚ୍ଚାଇ ଏନ୍ଦେରଦ୍?”

ଯୀଶୁସ୍ ଘି ସାଙ୍ଗେନୁ କାତ୍‌ଥା କାମ୍‌ନା ଘି ବାଦେନୁ, ପିଲାତୁସ୍ ବାହାରି ଭିଡ଼ ଘି ଚାହାଁନୁ କେରାସ୍ ଆରୁ ତେଙ୍ଗିୟାସ୍,“ ଏନ୍ ଏନ୍ନେ ଏନ୍ଦେର୍ ହି କାରଣ ମା’ ହକ୍‌ଖାନ୍ କା ଇସ୍ ଆଲାସ୍ ପିଟାଗେ ଲାଗାନ୍ ଲାଏକ ରାଦାସ୍ ।” ଲେକିନ୍ ଇହୁଦି ଆଗୁଆର୍ ଆରୁ ଭିଡ଼ ନ୍ତି ଚିର୍‌ରାରା କିରି ତେଙ୍ଗାଲନାର୍,“ ହୁସିନ୍ କ୍ରୁସ୍ ନୁ ଆରତା ଚା!” ପିଲାତୁସ୍ ଜାବ୍‌ବ ଚିଚ୍‌ଚାସ୍,“ ହୁସ୍ ଏନ୍ଦ୍ରିନ୍ ଭି ଗାଲତି କମନା ଘି ଦୋଷୀସ୍ ମାଲ୍‌ଦାସ୍ ।” ଲେକିନ ହୁବ୍ଡ଼ାର୍ ଆରୁ ଭି ଉଚ୍ଚା ଆୱାଜ୍ ନୁ ଚିର୍‌ରା ରାଗେ ଲାଗ୍‌ଗିୟାର୍ । ପିଲାତୁସ୍ ତିନ୍ ଥର ତେଙ୍ଗିୟାସ୍,“ ହୁସ୍ ଦୋଷୀ ମାଲ୍‌ଦାସ୍!”

ପିଲାତୁସ୍ ଏଲ୍‌ଚିୟାସ୍ କେରାସ୍ କା ହୁ ଭିଡ଼ ଦାଙ୍ଗା ଫାସା ସୁରୁ କାମୋର୍ ଚୋର୍, ଇ ଲାଗାନ୍ ହୁସ୍ ନିଜର୍ ସେନା ଗୁଠିର୍ ଯୀଶୁ ସିନ୍ କ୍ରୁସ୍ ନୁ ଆର୍‌ତା ଗେ ଲାଗାନ୍ ମାନ୍‌ଚାସ୍ । ରୋମି ସେନାର ଯୀଶୁସିନ୍ କୋଡ଼ା ଲଗାବାଚାର୍, ଆରୁ ହୁ ସିନ୍ ରାଜାର୍ ଘି ଚିଢ଼ା ଆତ୍‌ତାଚାର୍, ଆରୁ ହୁସ୍ ଘି କୁକ୍‌କୁନୁ ଆଚ୍‌ଚୁ ଘି ବାନା ବାଚ୍‌କା ମୁକୁଟ ଉଇୟାର୍ । ବାକେନ୍ ହୁବ୍ଡ଼ାର୍ ଇ ତେଙ୍ଗା କିରି ମାନାଜ୍ ଉଡ଼ା ବାଗେ ଲାଗ୍ ଗିୟାର୍, “ଏରା, ଇହୁଦିର୍ ଘି ରାଜାସ୍ ?”