40. ଯୀଶୁ ସିନ୍ କ୍ରୁସ୍‌ନୁ ଆର୍‌ତା କାଲିଦ୍

ଯୀଶୁସିନ୍ ନିନ୍ଦା କାମ୍‌ଚ୍‌କା ଘି ପାଛ୍‌ଲି, ସେନାର୍ ହୁସିନ୍ କୁରୁସ୍ ନୁ ଚାଢ଼ାବାଗେ ଲାଗାନ୍ ଅଚଚାର୍ କେରାର୍ ।ହୁବଡାର୍ ହୁ କୁରୁସ୍ ବୋନ୍ ଚେଡତା ଚାର ଏକାନୁ ହୁସ୍ ଖିୟସ୍ ।

ହୁବ୍ଡ଼ା ସେନାର୍ ଯୀଶୁସିନ୍ ହୁ ଆଡାଗେ ହୁଇକିରି ବାର୍‌ଚାର୍ ଜେନ୍ କି “ଖୋପ୍‌ଡ଼ି” ବନାର୍ ଆରୁ ହୁସ୍‌କୀ ହେଖାନ୍ ଆରୁ ହେଡ଼ୁନ୍ କ୍ରୁସ୍‌ନୁ ଠକ୍‌ଚାର ଚିଚଚାର୍ । ଲେକିନ୍ ଯୀଶୁସ୍ ତେଙ୍ଗିୟାସ୍,“ହେ ବୁଆ, ଇବ୍ଡ଼ାରିନ୍ ମାଫ୍ କାମାଚା ଏନ୍ଦେର୍ ଗେ କା ଇବ୍‌ଡ଼ାର୍ ବାଲ୍‌ନାର୍‌ରିନ୍ ଏନ୍ଦେର୍ କାମ୍‌ଲନାର୍ ।” ହୁବ୍‌ଡ଼ାର୍ ଅଣ୍ଟା ତାକ୍‌ତାବୋନ୍ ହୁସ୍ ଘି କୁକ୍‌କୁଘି ମିଆଁ ଟାଙ୍ଗ୍ ଚାର୍ ଚିଇଚାର୍ । ହୁନ୍‌ନୁ ଲେଖ୍‌ଚ୍‌କା ରାଚା, “ୟହୂଦୀର୍‌ଘି ରାଜା।” ପିଲାତୁସୁସ୍ ହୁବ୍ଡ଼ାରିନ୍ ଏନ୍ନେ ଲେଖାଗେ ତେଙ୍କାଚାସ୍ ।

ଯେ ବାକେନ୍ ସେନାର୍ ଗୁଠିର୍ ଯୀଶୁସ୍ ଘି ଚିଡ଼ା ଗୁଠି ଘି ଲାଗାନ୍ ଚିଠି ଗୁଠି ଡାଲ୍‌ଚାର୍ । ଯେତେ ବାକେନ୍ ହୁବ୍ଡ଼ାର୍ ଏନ୍ନେ କାମ୍‌ଚାର୍ ହୁବ୍‌ଡ଼ାର୍ ହୁ ଭବିଷ୍ୟତାଣୀବୋଦ୍ ପୁରା କାମ୍‌ଚାସ୍ ଜେନ୍ ତେଙ୍ଗାଲାର୍,“ହୁବ୍‌ଡ଼ାର୍ ଏଘାଁ ଚିଡ଼ାଗୁଠିବୋନ୍ ଏକ ଦୁସ୍‌ରେନୁ ହାଟ୍‌ରୋର୍, ଆରୁ ଏଘାଁ ଚିଡ଼ା ଘି ଲାଗାନ୍ ଚିଠିନ୍ ଡାଲୋର୍ ।”

ହୁସାନ୍ ଜୋଡ଼େ ଡାକୁର୍ ରାଚାର୍, ହୁବ୍ଡ଼ାରିନ୍ ସେନାର୍ ଜାମାର୍ ହୁ ସମୟ ନୁ କ୍ରୁସ୍‌ନୁ ଆର୍‌ତାଚ୍‌କାଚାର୍ । ହୁବ୍ଡ଼ାର୍ ରିନ୍ ଯୀଶୁସ୍ ଘି ଦୁହି ପଖାନୁ ଉଇକା ଚାର । ହୁନୁନ୍‌ନ୍ତି ଅଣ୍ଟା ଡାକୁସ୍ ଯୀଶୁସିନ୍ ମାଜାକ୍‌ନୁ ଉଡ଼ାବାଚାସ୍, ଲେକିନ୍ ଦୁସ୍‌ରାସ୍ ତେଙ୍ଗିୟାସ୍,“ଏନ୍ଦେର୍ ନିନ୍ ମା’ଆ ଏଲଚ୍‌ଦାୟ କା ପାରମେଶ୍ୱରସ୍ ନିଘାଂନ୍ ଦଣ୍ଡ ଚିଆସ୍ ? ନାମ୍ ଜୁକ୍‌କୁ ଲେଖା ଖରାପ୍ ନାଲଖୂ ଗୁଠିନ୍ କାମ୍‌ନାଘି ଦୋଶିମ୍, ଲେକିନ୍ ଇ ଆଲାସ୍ ନିର୍ଦୋସ୍ ରାଦାସ୍ ।” ଫିର୍ ହୁ୍ ଯୀଶୁସିନ୍ ତେଙ୍ଗିୟାସ୍, “ଯେ ବାକେନ୍ ନିନ୍ ନିଜର୍ ରାଜିନୁ ବାରୟ ବାକେନ୍ ଦାୟା କାମି କିରି ଏଙ୍ଘାନ୍ ୟାଦ୍ ଉଇକେ ।” ଯୀଶୁସ୍ କାତଥା ଚିଇଚାସ୍,“ ଇନ୍ନା ହି ନିନ୍ ଏଙ୍ଘା ସାଙ୍ଗେନୁ ସ୍ୱରଗ୍‌ନୁ ରୋଏ ।”

ୟିହୁଦୀ ଆଗୁଆର୍ ଗୁଠର୍ ଆରୁ ଭିଡ଼୍ ଘି ଦୁସ୍‌ରା ଆଲାର୍ ଗୁଠିର୍ ଯୀଶୁସ୍ ଘୀ ମାଜାକ୍ ଉଡ଼ା ବାଚାର୍ । ହୁବ୍ଡ଼ାର୍ ହୁସିନ୍ ତେଙ୍ଗିୟାର୍ , ଆଗାର୍ ନିନ୍ ପାରମେଶ୍ୱରସ୍ ଘି ହାଦ୍‌ଦୁଇ ,ତା କ୍ରୁସ୍ ସ୍ତିନ୍ କିଆଁ ଏତାବାରା ଆରୁ ଖୁଦ୍‌ବୋନ୍ ବାଛା ବାଆ! ହାଲ ଏମ୍ ନିଙ୍ଘା ମିଆଁ ବିଶ୍ୱାସଶ କାମୋମ ।”

ବାକେନ୍ ହୁ ଜାମା ରାଜି ଘି ଆକାଶ ପୁରା ପୁରି ସ୍ତିନ୍ ବିଲାଏ ମାଞ୍ଚା କେରା, ଭାଲୋ ହି ହୁ ଉଲ୍ଲା ଆଡ଼ତ୍‌ବିଡ଼ ସମୟ ରାଚାଦ୍ ।ଇଦ୍ ଦୁଇ ପହର ଘି ସମୟ ବିଲାଏ ମାଞ୍ଚା କେର୍‌କିଚା ଆରୁ ତିନ୍ ଘାଣ୍ଟା ତୋକ୍ ଏନ୍ନେ ହିଁ ରାଚାଦ୍ ।

ବାକେନ୍ ଯୀଶୁସ୍ ଚିଇରା କିରି ତେଙ୍ଗିୟାସ୍,“ ପୁରା ମାଞ୍ଚାଦ୍ ! ହେ ବୁଆ, ଏନ୍ ଏଙ୍ଘା ଜିୟାନ୍ ନିଙ୍ଘା ହେକ୍‌ଖାନୁ ଚିୟାଲ୍‌ଦାନ୍ ।” ବାକେନ୍ ହୁସ୍ ନିଜର୍ କୁକ୍‌ବୋନ୍ ଝୁକା ବାଚାସ୍ ଆରୁ ନିଜର୍ ଜିଆ ବୋଦ୍ ଉର୍‌ଖା କେରା । ଯେ ବାକେନ୍ ହୁସ୍ କେଚ୍‌ଚାସ୍ ହୁ ବାକେନ୍ ଧାନ୍ ନ୍ତାରିନ୍ ହିଲ୍‌ରା କେରା । ହୁ ବାଡ଼୍‌କା ପାର୍‌ଦା ଯେନ୍ ପାରମେଶ୍ୱରସ୍ ଘି ରାଚ୍‌କାସ୍ତିନ୍ ଆଲାରିନ୍ ଆଲ୍‌ଗା କମାଲ୍‌ଗାର୍ ମିଆଁନ୍ତିନ୍ କିଆଁତୋକ୍ ଗେ ଏଟ୍‌ଟ୍ରା ଆରୁ ଦୁଇ ଭାଗ୍ ମାଞ୍ଚା କେରାଦ୍ ।

ନିଜର୍ କେଚ୍‌କା ଘି ଚାଲାତେ, ଯୀଶୁସ୍ ଆଲାର୍ ଘି ଲାଗାନ୍ ପାରମେଶ୍ୱରସ୍ ଘି ଚାହାଁ ବାର୍‌ନା ପାବୁ ଖୋଲ୍‌ଚା ଚିଚ୍‌ଚାସ୍ । ଯେ ବକେନ୍ ଯୀଶୁସ୍ ଘି ନିଗରାନୀ କାମନା ବାକେନ୍ ଅଣ୍ଟା ସେନାସ୍ ଏନ୍ଦ୍ରିନ୍ ଭି ମାଞ୍ଚାକିଚା ଜାମାନ୍ ଏରିୟାସ୍ ତା ହୁସ୍ ତେଙ୍ଗିୟାସ୍, ସଥେନ୍‌ନୁ ଇ ଆଲାସ୍ ଦୋଷିସ୍ ମା ରାଚାସ୍ । ଇସ୍ ପାରମେଶ୍ୱରସ୍ ଘି ହାଦ୍‌ଦୁସ୍ ।”

ବାକେନ୍ ଯଶେଫ୍‌ସ୍ ଆରୁ ନିକୁ ଦେମୁସ୍ ନାମେ ଘି ଜଡ଼େ ଯିହୂଦୀ ଆଗୁ ଆର୍ ବାର୍‌ଚାର୍ । ହୁବ୍ଡ଼ାର୍ ବିଶ୍ୱାସ୍ କାମାଲାର୍ କା ଯୀଶୁସ୍ ହୁ ମାସିହ ରାଚାସ୍ । ହୁବ୍ଡ଼ର୍ ପିଲାତୁସ୍ ସିନ୍ ଯୀଶୁ ଘି ଶରୀର୍ ବୋନ୍ ନିଚାର୍ । ହୁବ୍ଡ଼ାର୍ ହୁସ୍ ଘି ଶରୀର୍ ବୋନ୍ ଚିତାନୁ ଗୁଡୁମୁଟୁ କାମ୍‌ଚାର୍ । ହୁବ୍ଡ଼ାର୍ ଆରୁ ଚାଟ୍‌ଣୀବୋନ୍ ଖୋଦା କିରି ମାଶଣା ବାନାବାଚା ରାଚାଦ୍ ଆରୁ ହୁଦ୍‌ଘି ଉଲାନୁ ଉଇୟାର୍ ଚିଚ୍‌ଚାର୍ । ହୁବ୍ଡ଼ାର୍ ହୁ ମାଶ୍‌ଣା ଘି ପାବୁବନ୍ ଢ଼ାପାଗେ ଅଣ୍ଟା ବାଡ଼୍‌କା ଚାଚାବୋନ୍ ତୁକ୍‌କା କିରି ଢ଼ାପାଚେଚାର୍ ।