41. ପାରମେଶ୍ୱରସ୍ ଯୀଶୁସିନ୍ କେଚ୍‌କାସ୍ତିନ୍ ଉଜ୍‌ତା ଦାସ୍

ସେନାର୍ ଦୋବାରା ଚାଲତେ ଯୀଶୁସିନ୍ କ୍ରୁସ୍ ନୁ ଆରାତାନାଘି ପାଛ୍‌ଲି, ୟହୂଦୀ ଆଗୁଆର ପିଲାତୁସ୍ ସିନ୍ ତେଙ୍ଗିୟାର୍,“ ହୁସ୍ ଝୁଠାସ୍, ଯୀଶୁସ୍ ତେଙ୍କାଚାସ୍ କା ହୁସ୍ ତିନ୍ ଦିନ୍ ନୁ କେଚ୍‌କା ସ୍ତିନ୍ ଉଜ୍‌ଜୋସ୍ । ନେକି ନିନ୍ ଇବୋନ୍ ବେଏ ଫିକିର୍ କାମା ଗେ ଲାଗାନ୍ ମାଣାବୋନ୍ ଜାଗ୍‌ନା ପାଡ଼୍‌ରୋଦ୍ ହୁସ୍ ଘି ଚେଲାର୍ ହୁସ୍ କୀ ମାଣା ବୋନ୍ ହାଡ଼ି କିରି ମା’ ହୋର୍ । ଏନ୍ନେ ହୁବ୍ଡ଼ାର୍ ତେଙ୍ଗର୍ କା ହୁସ୍ କେଚ୍‌କାନ୍ତିନ୍ ଉଜ୍‌କା ଦାସ୍ ।”

ପିଲାତୁସ୍ ତେଙ୍ଗିୟାସ୍,“ କିଛି ସେନା ଜାମାରିନ୍ ହୁଆଁ କାଲା, ଆରୁ ଏସ୍‌କେ ନିମ୍ କାମା ଅଙ୍ଗର୍ ହନ୍ନେ ମାଣା ବୋନ୍ ଜାଗା ।” ଇ ଲେଖା ହୁବ୍‌ଡ଼ାର୍ ହୁ ମାଶାଶ୍ ଘି କୋର୍‌ନ ପାବୁବୋନ୍ ଚାଚାନୁ ଅଣ୍ଟା ଛାପ୍ ଲାଗା ବାଚାର୍ । ହୁବ୍ଡ଼ାର୍ ଜାଗାଗେ ଲାଗାନ୍ ହୁସାନ୍, ସେନାରିନ୍ ଅକ୍‌ତାଚାର୍ କା ନେର୍‌ହି ହୁସ୍ ଘି ଶାରୀର୍ ବୋନ୍ ହାଡ଼ା ପଲ୍ଲନାର।

ଯୀଶୁସ୍ ଘି ଖିନା ଘି ବାଦ୍‌ନୁ ସାତ୍‌ୱା ଉଲ୍ଲାନୁ ରାଚାଦ୍ ନେର୍ ଭି ସାତ୍‌ୱା ଉଲ୍ଲାନୁ ନାଲ୍‌ଖୁ ମା’ କାମୋର୍, ଇଦ୍‌ଘି ଲାଗାନ୍ ଯୀଶୁସ୍ ଘି ସାଙ୍ଗେର୍ ମାଶ୍‌ଣା ସାନ୍ ମାଲ୍ଲା ବାରୁର୍ । ଲେକିନ୍ ସାତ୍‌ୱା ଉଲ୍ଲା ଘି ବାଦେନୁ ପାଇରି ଭୋର୍ ଗେ , କିଛି ମୁକ୍‌କାର୍ ଯୀଶୁସ୍ ଘି ପାଶ୍‌ଣା ଗେ କାଲାଗେ ସାପ୍‌ଡ଼ା ରାଚାର ।ହୁବ୍ଡ଼ାର୍ ହୁସ୍ ଘି ଶାରିର୍‌ନୁ ଆରୁ ଭି ବାଲ୍‌କା, ଇସୁଁଙ୍ଗ୍, ମାସଲା ବୋନ୍ ଲାଗା ବାଗେ ଚାହାଲାର୍ ।

ହୁ ମୁକାର ଘି ଆଣ୍‌ସ୍‌ନା ଘି ଆଘ୍‌ଲିନ୍, ମାଶ୍‌ଣାନୁ ଅଣ୍ଟା ବାଡ଼୍‌କା ଧାନ୍ତାରି ହିଲ୍‌ରାଦ୍ । ସ୍ୱରଗ୍ ସ୍ତିନ୍ ଅଣ୍ଟା ସ୍ୱରଗ୍‌ଦୂତ୍ ବାରିକିରି ହୁ ଚାଚାବୋନ୍ ହାଟାବାଚା ଚିଚାଦ୍ ଜେନ୍ ମଶ୍‌ଣା ଘି କରନା ପାବୁବୋନ୍ ଢ଼ାପ୍‌ଚକା ରାଚାଦ୍ ଆରୁ ହୁଦ୍ ଘି ମିୟାଁ ଅକିଚାନ୍ । ଇ ସ୍ୱରଗ୍‌ଦୂତ୍ ବିଲ୍ଲି ଲେଖା ଚାମ୍‌କା ରାଲାଦ୍। ମାଶ୍‌ଣାନୁ ଜେନ୍ ସୈନିକ୍ ରାଚାର୍ ହୁବ୍ଡ଼ା ହୁବୋନ୍ ଏରିୟାର୍ । ହୁବ୍ଡ଼ାର୍ ଏତ୍‌କୋ ଏଲ୍‌ଚିୟାର୍ କେର୍‌କାଚାର୍ କା କେଚ୍‌କା ଲେଖା ଏହେଁଲାନୁ ଖାତ୍‌ରାର୍ କେରାର୍ ।

ଯେତେବାକେନ୍ ହୁବ୍ଡ଼ା ମୁକାର୍ ମାଶ୍‌ଣା ଗେ ଆଣ୍‌ସିୟାର୍, ତା ହୁ ସ୍ୱରଗଦୂତ୍ ହୁବ୍ଡ଼ାରିନ୍ ତେଙ୍ଗିୟାଦ୍, “ଆମ୍ବା ଏଲ୍‌ଚା । ଯୀଶୁସ୍ ଇସାନ୍ ମାଲ୍‌କା ସିନ୍ । ହୁସ୍ କେଚ୍‌କାସ୍ତିନ୍ ଉଜିୟାସ୍ କେର୍‌ଦାସ୍, ଏସ୍‌କେ କା ହୁସ୍ ତେଙ୍କାଚାସ୍ କା ହୁସ୍ ଜୀ ଉଠ୍‌ରୋସ୍ ! ମାଶ୍‌ଣାନୁ ବେଦ୍‌ଦା ଆରୁ ଏରା।” ହୁବ୍ଡ଼ା ମୁକ୍‌କାର ମଶ୍‌ଣା ଘି ଉଲ୍ଲା ଆରୁ ଏକାସାନ୍ ଯୀଶୁସ୍ ଘି ଶାରିର୍ ଉଇକାଚାର୍ ହୁସାନ୍ ବେଦିୟାର୍ ଆରୁ ଏରିୟାର୍ କା ହୁସ୍ କୀ ଶାରିର୍ ହୁସାନ୍ ମାଲ୍ଲା ରୁଦ୍ ।

ବାକେନ୍ ହୁ ସ୍ୱରଗଦୂତ୍ ହୁ ମୁକାରିନ୍ ତେଙ୍ଗିୟାଦ୍,“ କାଇକିରି ହୁସ୍ ଘି ଚେଲାରିନ୍ ତେଙ୍ଗା,’ ଯୀଶୁସ୍ କେଚ୍‌କାସ୍ତିନ୍ ଉଜ୍ଜିୟାସ୍ କେର୍‌କାଦାସ୍ ଆରୁ ହୁସ୍ ନିମ୍‌ହାଁଏ ଆଘ୍‌ଲି- ଆଘ୍‌ଲି ଗାଲିଲ୍ ଗେ କୋସ୍ ।”

ହୁବ୍ଡ଼ା ମୁକାର୍ ଚକ୍‌ରାରାର୍ କେରାର୍ ଆରୁ ମୁରୁଖ୍ ଖୁସି ମାଞ୍ଚାର୍ । ହୁବ୍ଡ଼ାର୍ ଚେଲାରିନ୍ ଇ ବାନେ କାତ୍‌ଥାନ୍ ମେନ୍‌ତା ଗେ କୁଦିୟା ରାଚାର୍ ।

ଯେ ବାକେନ୍ ହୁ ମୁକାର୍ ଚେଲାରିନ୍ ଇ ବାନେ କାତ୍‌ଥାନ୍ ତେଙ୍ଗାଗେ ନିଜର୍ ପାବୁନୁ ରାଚାର୍ ତା ଯୀଶୁସ୍ ହୁବ୍‌ଡ଼ାରିନ୍ ଏଡିରିୟାସ୍ । ହୁବ୍ଡ଼ାର୍ ହୁସ୍ ଘି ହେତୁ କିୟାଁ ଖାତ୍‌ରା ବାକେନ୍ ଯୀଶୁସ୍ ତେଙ୍ଗିୟାସ୍,“ଅମ୍ବାଏଲ୍‌ଚା । କାଇକିରି ଏଙ୍ଘା ଚେଲା ଗୁଠୀରିନ୍ ଗାଲିଲ୍ କାଲାଗେ ତେଙ୍କେ । ହୁବ୍ଡ଼ାର୍ ହୁସାନ୍ ଏଙ୍ଘାନ ଏର୍‌ରୋ ।”