46. ପାଉଲୁସ୍ ମାସୀହିସ୍ ବିଶ୍ୱାସି ମାନ୍ଦାସ୍ କାଦାସ୍ ।
Listen to this story Audio file · 5.5 MB
The words of this recording are below, in Kisan.
ଶାଉଲ୍ ନାମେ ଘି ଅନ୍ଟା ଆଲ୍ ରାଦାସ୍ ନେର୍ ଯିଶୁସିନ୍ ବିଶ୍ୱାସ୍ ମା କାମ୍ଚାକାଚାସ୍ । ଯେତେ ବାକେନ୍ ହୁସ୍ ଜୁଆନ୍ ରାଚାସ୍, ବାକେନ୍ ସ୍ତିଫ୍ନୁସ୍ ସିନ୍ ପିଟ୍ନା ବାଲାର୍ ଆଲ୍ଲାର୍ ଘି ଚିଢାବନ୍ ଏରାହୋଜ୍ଜାଲାସ୍ , ପାଛଲି ହୁସ୍ ବିଶ୍ୱାସି ଗୁଠିରିନ୍ ସାତାବାଲାସ୍ । ହୁସ୍ ୟେରୁସାଲେମ୍ନୁ ଏଡ୍ପା ଏଡ୍ପା କାଇକିରି ମେତା ଆରୁ ମୁକ୍କାରିନ୍ ଦୁହିରିନ୍ ଗିରଫ୍ଦାର୍ କାମିକିରି ଜେଲ୍ନୁ କର୍ତାଚାଲାସ୍ । ବାକେନ୍ ବାଡ୍କା ୟାଜକ୍ ଜାମାର୍ ଶାଉଲ୍ସିନ୍ ଦାମିଶକ୍ ରାଜିଗେ କାଲାଗେ ଆନୁମୋତି ଚିଚାର୍ ହୁସ୍ ହୁସାନ୍ତା ମାସିହି ରିନ୍ ଗିରଫ୍ତାର୍ କାମନା ଆରୁ ହୁବ୍ଡାରିନ୍ କିରତା ଗେ ଅନ୍ଦ୍ରାରାର୍ ୟେରୁଶାଲମ୍ ଶାଉଲ୍ସିନ୍ ତେଙ୍ଗିୟାର୍ ।
ଶାଉଲସ୍ ଦାମିଶକ୍ କାଲାଗେ ଶୁରୁ କାମ୍ଚାସ୍ । ହୁ ରାଜିଗେ ଆଣ୍ସ୍ନା ଘି କାଟେ ଆଘ୍ଲି ,ହୁସ୍ଘି ଚାରି ପାଖା ବାଦ୍ ଲିନୁ ଅନ୍ଟା ବିଲ୍ଲି ଚାମ୍କାରଚାଦ୍,ଆରୁ ହୁସ୍ ଏହେଲାନୁ ଖାତରାସ୍ କେରାସ୍ ,“ ହେ ଶାଉଲ୍ସ୍, ହେ ଶାଉଲ୍ସ୍ ନିନ୍ ଏଙ୍ଗାନ୍ ଏନ୍ଦେର୍ଗେ ସାତାବାଲ୍ ଦାଏ ? ଶାଉଲ୍ସ୍ ମେନ୍ଚାସ୍, ହେ ପ୍ରଭୂ ନିନ୍ନେର୍? ଯିଶୁସ୍ ହୁସିନ୍ ଜାବାବ୍ ଚିଚାସ୍,“ଏନ୍ ଯିଶୁସ୍ । ନିନ୍ ଏଙ୍ଗାନ୍ ସାତାବଲ୍ଦାଏ ।”
ଯେତେବାକେନ୍ ଶାଉଲ୍ସ୍ ଚୋଚାସ୍ ହୁବାକେନ୍ ହୁସ୍ ଏରାଗେ ପଲ୍ଲାଲ୍ଗାସ୍ । ହୁସ୍ଘି ସାଙ୍ଗେର୍ ହୁସିନ୍ ଦାମିଶକ୍ ଅଚାର୍କେରାର୍ । ଶାଉଲ୍ସ୍ ତିନ୍ଦିନ୍ ତକ ଏନ୍ଦେର୍ ଭି ମାଲ୍ଲା ଅନୁସ୍ ଆରୁ ମାଲ୍ଲା ହାପକାରୁସ୍ ।
ଦାମିଶକ୍ ନୁ ହନନ୍ୟାହ ନାମେ ଘି ଅନ୍ଟା ଚେଲା ରାଲ୍ଗାସ୍ । ପାର୍ମେଶ୍ୱରସ୍ ହୁସିନ୍ ତେଙ୍ଗିୟାସ୍ “ ହୁ ଏଡ୍ପାନୁ କାଲା ଏକାସନ୍ ଶାଉଲ୍ସ୍ ରାଦାସ୍ । ନିଜର୍ ହେକ୍ଖାବନ୍ ହୁସ୍ଘିନୁ ଉଇୟର୍ ହାଲେ ହୁସ୍ ଆରୁ ଏରା ଲାଗୋସ୍ ।” ଲେକିନ୍ ହନନ୍ୟାହସ୍ ତେଙ୍ଗିୟାସ୍,“ ହେ ପ୍ରଭୂ,ଏନ୍ ମେନ୍ଚକାଦାନ୍ କା ଇ ଆଲ୍ଲାସ୍ ବିଶ୍ୱାସି ଗୁଟ୍ଟିରିନ୍ ଏସ୍କେ ସାତାବାଲାସ୍ । “ପାର୍ମେଶ୍ୱର୍ସ୍ ହୁସିନ୍ ଜବାବ୍ ଚିଚାସ୍,” କାଲା ଏନ୍ ହୁସିନ୍ ଇହୁଦିଆରିନ୍ ଆରୁ ଦୁସରା ଜାତିର୍ ଘି ଆଲ୍ଲାରିନ୍ ଏଙ୍ଘାଏ ନାମେ ଘି ପ୍ରଚାର୍ କାମାଗେ ଚାଜ୍କାଦାନ୍ । ହୁସ୍ ଏଙ୍ଗାଏ ନାମେ ଘି ଲାଗାନ୍ ମରୁକ୍ ତାକ୍ଲିବ୍ ସାହୋର୍ ।”
ଆଖିର୍ ହନନ୍ୟାହ ଶାଉଲସ୍ ଘି ଚାହାଁ ଗେ କେରାସ୍, ନିଜର୍ ହେକ୍ ଖାବୋନ୍ । ହୁସ୍ଘି ମିୟାଁ ଉୟାସ୍ , ଆରୁ ତେଙ୍ଗିୟାସ୍, ଯିଶୁସ୍ ଇସାନ୍ ବାରାଗେ ନିଙ୍ଗାଏ ପାବୁନୁ ଏଥ୍ର୍ଚାଚାସ୍ । ଏଙ୍ଗାନ୍ ନିଘାସାନ୍ ତାୟକାଦାସ୍ ହାଲେ ନିନ୍ ଆରୁ ଅହୋନ୍ ଏରାଗେ ଲାଗ୍ଏ ,ଆରୁ ପବିତ୍ର ଆତ୍ମାନୁ ନିଙ୍ଗାନ୍ ଭାରସ୍ଚସ୍ । ହୁ ବାକେନ୍ ହି ଶାଉଲ୍ସ୍ ଫିର୍ସେ ଏରାଗେ ଲାଏକ୍ ମାନସ୍କୋସ୍, ଆରୁ ହନନ୍ୟାହସ୍ ହୁସିନ୍ ବାତିସ୍ମା ଚିଚାସ୍ । ବାକେନ୍ ଶାଉଲ୍ସ୍ ମାନ୍ଡି ଆନ୍ଡାସ୍ ଆରୁ ଶାକ୍ତିସାଲି ମାନ୍ସାସ୍ କେରାସ୍ ।
ହୁ ଉଲ୍ତି,ଶାଉଲ୍ସ୍ ଦାମିଶକ୍ନୁ ରାନାବାଲା ଇହୁଦିର୍ନୁ ପ୍ରଚାର୍ କାମାଗେ ସୁରୁ କାମ୍ଚାସ୍ । ହୁସ୍ ତେଙ୍ଗେୟାସ୍ ଯିଶୁସ୍ ହି ପାର୍ମେଶ୍ୱର୍ସ୍ ଘି ହାଦ୍ଦୁସ୍ ।” ଇହୁଦି ଆଲ୍ଲାର୍ ଆଚମ୍ଭିତ୍ ରାଚାର୍,ଏନ୍ଦେର୍ଗେ କା ଶାଉଲ୍ସ୍ ବିଶ୍ୱାସି ଗୁଟ୍ଟିରିନ୍ ପିଟ୍ନା ଘି କୋଶିଷ୍ କାମ୍ଚ୍କାଚାସ୍, ଲେକିନ୍ ଆକୁନ୍ ହୁସ୍ ଯିଶୁସିନ୍ ବିଶ୍ୱାସ୍ କାମ୍ଚକାଚାସ୍ ।ଶାଉଲ୍ସ୍ ଇହୁଦିୟାର୍ ଗାନେ ବାଦ ବିବାଦ କାମ୍ଚାର୍ । ହୁସ୍ ଏଦିୟାସ୍ କା ଯିଶୁସିନ୍ ମସିହ ରାଚାସ୍ ।
ବାଗେ ଉଲ୍ଲାଗି ବାଦେନୁ, ଇହୁଦିୟାର୍ ଶାଉଲ୍ସିନ୍ ପିଟାଗେ ଯୋଜନା କାମ୍ଚାର୍ । ହୁବ୍ଡାର୍ ହୁସିନ୍ ପିଟାଗେ ମାଡ଼ାନ୍ତା ପାବନୁ ଆଲ୍ଲାରିନ୍ ତାୟ୍ୟାର୍ । କା ହୁସିନ୍ ନିଗରାନି କାମର୍ ଲେକିନ୍ ଶାଉଲ୍ସ୍ ହୁ ଯୋଜନା ବୋନ୍ ମେନ୍ଚ୍କାଚାସ୍, ଆରୁ ହୁସ୍ଘି ସାଙ୍ଗେର୍ ବାଛରିକିରି ଉର୍ଖାଗେ ହୁସ୍ଘି ସାହାୟାତା କାମ୍ଚାର୍ । ଅନ୍ଟା ମାହାଁନୁ ହୁବ୍ଡ଼ାର୍ ହୁସିନ୍ ଝୁଡିନୁ ଅକତିକିରି ରାଜିଘି କାଥିନ୍ତି ହୁସିନ୍ କିଆଁ ଏତ୍ତାର୍ଚାର୍ । ଦମିଶକ୍ତି ବାଛରିକିରି ଉର୍ଖାନା ଘି ପାଛଲି ଶାଉଲ୍ସ୍ ଯିଶୁସ୍ ଘି ବିଷୟନୁ ପ୍ରଚାର୍ କାମ୍ତେ ରାଚାସ୍ ।
ଶାଉଲ୍ସ୍ ପ୍ରେରିତ୍ ଗୁଟ୍ଟିରିନ୍ ଭେଟ୍ ମାନାଗେ ୟେରୁଶାଲେମ୍ କେରାସ୍ ।, ଲେକିନ୍ ହୁବ୍ଡାର୍ ହୁସିନ୍ ଏଲ୍ଚାଲ୍ଗାର୍ ।ବାକେନ୍ ବର୍ନବାସ୍ ନାମେ ଘି ଉର୍ତୁ ବିଶ୍ୱାସି ଶାଉଲ୍ସିନ୍ ପ୍ରେରିତ ଗୁଟ୍ଟିର୍ ଘି ଚାହାଁ ଅଚ୍ଚାସ୍ କେରାସ୍ । ହୁସ୍ ହୁବ୍ଡାରିନ୍ ତେଙ୍ଗିୟାସ୍ କା ଶାଉଲ୍ସ୍ ଏସ୍କେ ସାହସି ମାନିକିରି ଦାମିଶକ୍ନୁ ପ୍ରଚାର୍ କାମ୍ଚ୍କାଚାସ୍ ହୁଦ୍ଘି ପାଛଲି ପ୍ରେରିତ ଗୁଟ୍ଟିର୍ ଶାଉଲ୍ସିନ୍ ଗ୍ରହଣ୍ କାମ୍ଚାର୍ ।
କିଛି ବିଶ୍ୱାସିର୍ ଯେନ୍ଟା ଯେରୁଶାଲେମ୍ ଘି ସାତାବାନାନ୍ତି ବୁଙ୍ଗିୟାର୍ କେର୍କାଚାର୍ । ହୁବ୍ଡାର୍ ଗେଛା ଆତାଙ୍କିୟା ରାଜିନୁ ବୁଙ୍ଗେର୍ ଚିଚ୍କାଚାର୍ ଆରୁ ଯିଶୁସ୍ ଘି ବିଷୟନୁ ପ୍ରଚାର କାମାଲ୍ଗାର୍ । ଆତଙ୍କିୟାନୁ ରାନାବାଲା ଅଲ୍ଲାର୍ ବାଗ୍ଗେ ଇହୁଦିର୍ ମାଲ୍ଲାରୁ, ଲେକିନ୍ ଶୁରୁନୁ , ହୁନୁନ୍ନ୍ତା ଜୁକ୍କୁ ଆଲ୍ଲାର୍ ବିଶ୍ୱାସି ମାନ୍ଚାର୍କେରାର୍ । ବର୍ନବାସ୍ ଆରୁ ଶାଉଲ୍ସ୍ ଇବ୍ଡା ପୁନା ବିଶ୍ୱାସି ଗୁଟ୍ଟିରିନ୍ ଯିଶୁସ୍ ଘି ବିଷୟ୍ନୁ ଆରୁ ଜୁକ୍କୁ ଶିଖାବାଗେ ହୁସାନ୍ କେରାର୍ । ଆରୁ କଲିସିୟାବନ୍ ମଜବୁତ୍ କାମ୍ଚାର୍ । ଯିଶୁସିନ୍ ବିଶ୍ୱାସ କାମନାବାଲା ଶୁରୁନୁନ୍ ଆତାଙ୍କିୟାନୁନ୍ “ମାସିହି” ତେଙ୍ଗରାକେରାଦ୍ ।
ଉନ୍ଦୁଲ୍, ଆତଙ୍କିୟାର୍ ମସିହି ଆଲ୍ଲାର୍ ଉପବାସ୍ନୁ ବିନ୍ତି କାମାଲ୍ଗାର୍ । ପବିତ୍ର ଆତ୍ମାଦ୍ ହୁବ୍ଡାରିନ୍ ତେଙ୍ଗୟା,“ଏଙ୍ଗାଏ ଲାଗାନ୍ ବର୍ନବାସ୍ ଆରୁ ଶାଉଲ୍ସିନ୍ ହୁ ନାଲ୍ଖୁବୋନ୍ କାମାଗେ ଆଲ୍ଗା କାମାଚା । ଯେନ୍ବୋନ୍ କାମାଗେ ଏନ୍ ହୁବ୍ଡାରିନ୍ ମେହେକାଦାନ୍ । ଇଦ୍ଘିଲାଗାନ୍ ଆତାଙ୍କିୟାନ୍ତା କଲିସିଆନୁ ବର୍ନବାସ୍ ଆରୁ ଶାଉଲ୍ସି ଘି ଲାଗାନ୍ ବିନ୍ତି କାମ୍ଚାର୍ ଆରୁ ହୁବ୍ଡାର୍ ଘି ନୁ ନିଜର୍ ହେକ୍ ଖାବନ୍ ଉୟାର୍ ।ବାକେନ୍ ହୁବ୍ଡାର୍ ଦୁସରା ଅନ୍ଜୁକୁ ଜାଗାନୁ ଯିଶୁସ୍ ଘି ବିଷୟନୁ ସୁସମାଚାସ୍ ଘି ପ୍ରଚାର୍ କାମାଗେ ତାୟାର୍ ରାଚାର୍ । ବର୍ନବାସ୍ ଆରୁ ଶାଉଲ୍ସ୍ ଦୁସରା- ଦୁସରା ଜାତିନ୍ତା ଆଲ୍ଲାରିନ୍ ଶିକ୍ଷା ଚିଚାର୍ ଆରୁ ଅନ୍ଜୁକୁ ଆଲ୍ଲାର୍ ଯିଶୁସିନ୍ ବିଶ୍ୱାସ୍ କମ୍ଚାର୍ ।
प्रेरितों के काम 8:3; 9:1-31; 11:19-26; 13:1-3 से एक बाइबल की कहानी
Free to use, adapt, and share under an open license (CC BY-SA 4.0).