47. ଫିଲିପି ନୁ ପାଉଲୁସ୍ ଆରୁ ସିଲାସ୍
Listen to this story Audio file · 5.8 MB
The words of this recording are below, in Kisan.
ଯେ ବାକେନ୍ ଶାଉଲସ୍ ପୁରା ରୋମି ସାମ୍ରାଜ୍ୟ ନୁ କୁଦିୟାସ୍ ତା ହୁସ୍ ନିଜୋର୍ ରୋମି ନାମେ ବୋନ୍ “ପାଉଲୁସ୍ “ଘି ବ୍ୟବହାର କାମାଗେ ସୁରୁ କାମଚାସ୍ । ଅଣ୍ଟା ଉଲାନୁ, ପାଉଲୁସ୍ ଆରୁ ହୁସଘି ସାଂଗେସ୍ ସିଲାସ୍ ଫିଲିପ୍ ରାଜି ନୁ ଯିଶୁସ୍ ଘି ବାରେ ନୁ ବାନେ ସାଂଦେସ୍ ସୁନାବାଗେ ଲାଗାନ୍ କେରାର୍ । ହୁବଡାର୍ ପାଡ଼ା ଘି ବାହାରି ଜୋଡୁ ଘି ଖାଣିନୁ ଅଣ୍ଟା ଜାଗାଗେ କେରାର୍ ଏକାସାନ ଆଲାର୍ ବିନ୍ତି କାମାଗେ ଜୁମରାକ୍ ଚାର୍ । ହୁସାନ୍ ହୁବ୍ଡ଼ା ଲୁଦିଆ ନାମେଘି ଅଣ୍ଟା ମୁକାକ୍ ରାଚାଦ୍ । ହୁଦ୍ ପାରମେଶ୍ୱର ସିନ୍ ବାନେ ହାକ୍ଖାଲ୍ଦ ଆରୁ ହୁସ୍ଘି ଆରାଧାନା କାମାଲାଦ୍ ।
ପାରମେଶ୍ୱରସ୍ ଲୁଦିୟାବୋନ୍ ଈଶୁ ଘି ବିଷୟନୁ ବାଚାନୁ ବିଶ୍ୱାସ କାମାଗେ ଲାଏକ୍ କାମ୍ଚାର୍ । ପାଉଲୁସ୍ ଆରୁ ସିଲାସ୍ ହୁସିନ୍ ଆରୁ ହୁଦ ଘି ପରିବାରରିନ୍ ବୋନ ବାପ୍ତିସ୍ମା ଚିଚାର୍ । ହୁସ୍ ପାଉଲୁସ୍ ଆରୁ ସିଲାସ୍ ସିନ ନିଜର୍ ଏଡ଼ପାନୁ ରାଗେ ନେୱତା କାମ୍ଚାଦ୍ , ଇଦ୍ଘି ଲାଗନ୍ ହୁବ୍ଡ଼ାର୍ ହୁସାନ୍ ରାଚାକେରାର୍ ।
ପାଉଲୁସ୍ ଆରୁ ସିଲାସ୍ ଆଲାରିନ୍ ସବୁ ବାକେନ୍ ହୁ ଜାଗନୁ ଭେଟ୍ ମାନଲ୍ଗାର୍ ଏକାସାନ୍ ଇହୁଦି ଆଲାର୍ ବିନ୍ତି କାମାଲ୍ଗାର୍ । ସବୁଦିନ୍ ଯେତେବାକେନ୍ ହୁବ୍ଡ଼ାର୍ ହୁସାନ୍ କାଲ୍ଗାର୍ ବାକେନ୍ ଅଣ୍ଟା ଦାସୀ କୁକାୟ ଯେନ୍ଟାଦ୍ ଦୁଷ୍ଟ ଆତ୍ମା କାବ୍ଜା ନୁ ରାଚା । ହୁବ୍ଡ଼ାର୍ ଘି ପିଛା କାମଲଗାଦ୍ । ଇ ଦୁଷ୍ଟ ଆତ୍ମା ଘି ତାରତି ହୁଦ୍ ଆଲାର୍ ଘି ଭବିଷ୍ୟ ତେଙ୍ଗାଲାଗ୍ଗିଦ ଇଦ୍ ଘି ଲାଗାନ୍ ହୁଦ୍ ଭବିଷ୍ୟ ଦେଙ୍ଗ୍ନା ବାଲି ଘି ରୂପ ନୁ ନିଜର ମାଲିକ୍ଗୁଠିର୍ ଗେ ଅନ୍ଜୁକ୍ ଧାନ୍ନୁ କାମାବାଲଦ୍ ।
ହୁବ୍ଡ଼ାର୍ ଘି କାନା ସମୟନୁ ଇ ଦାସୀ କୁକାୟ ଚିର୍ରା ରାଲଗାଦ୍ , “ଇ ଆଲାସ୍ ପରମ ପ୍ରଧାନ ପାରମେଶ୍ୱରସ୍ ଘି ସେବକ । ଇସ୍ ନିମାହାରିନ୍ ଉଦ୍ଧାର୍ ହାକ୍ନାଗି ପାବୁ ତେଙ୍ଗଗାଲ୍ନାର୍ ।“ ହୁଦ୍ ସବୁଦିନ୍ ଏନ୍ନେ କାମାଲ୍ ଗାଦ୍ ଯେନ୍ଟା ବୋନ୍ ପାଉଲୁସ୍ ନିରାସ୍ ମାନଚାସ୍ କେରାସ୍ ।
ଆନ୍ତ ବାକେନ୍ ନୁ, ଉନ୍ଦୁଲ୍ ଯେତେବାକେନ୍ ହୁ ଦାସି କୁକାଏଁଦ୍ ଚିର୍ରାରାଗେ ସୁରୁ କାମଚାଦ୍ ବାକେନ୍ ପାଉଲୁ୍ ହୁଦ୍ଘି ତାରାହ ମୋଡ଼ରିକିରି ହୁଦ୍ଘି ଉଲ୍ତାନ୍ତା ଦୁଷ୍ଟ ଆତ୍ମାନ୍ ତେଙ୍ଗିୟାସ୍,”ଯୀସୁସ୍ ଘି ନାମେନ୍ତି ଇସ୍ ନ୍ତି ନିକଲାରୁକାଲ୍।”ହୁ ସାମାୟନୁ ହୁ ଦୁଷ୍ଟ ଆତ୍ମାଦ୍ ହୁଦିନ୍ ଆମ୍ବିକିରି ବୁଙ୍ଗେଚିଚ୍ଚାଦ୍ ।
ହୁ ଦାସୀ କୁକାଏ ଘି ଘି ମାଲିକସ୍ ମୁରୁକ୍ ଖିସାରାସ୍ । ହୁସ୍ ଆହା ଅଙ୍ଗିୟାର୍ କା ବିନା ହୁ ଦୁଷ୍ଟ ଆତ୍ମାଘିନ୍ତି ହୁ ଦାସୀ କୁକାୟ ଆଲାର୍ ଘି ଭବିଷ୍ୟ ପଲ୍ଲିଦ୍ ତେଙ୍ଗାଗେ । ଇଦ୍ଘି ଅର୍ଥ ରାଚାକା ଆଲାର୍ ଆକ୍କୁନ୍ ହୁଦ୍ଘି ମାଲିକ୍ସ ଗେ ପାଇସା ମା ଚିନାର୍ କା ହୁଦ୍ ହୁବ୍ଡ଼ାରିନ୍ ଭବିଷ୍ୟ ତେଙ୍ଗଦ୍ କା ହୁବ୍ଡ଼ାର୍ ଗାନେ ଏନ୍ଦେର୍ ମାନୋ ।
ଇଦ୍ଘି ଲାଗାନ୍ ହୁ ଦାସୀ କୁକାୟ ଘି ମାଲିକ୍ ପାଉଲୁସ୍ ଆରୁ ସିଲାସ୍ ସିନ ରୋମୀ ଆଧିକାରୀ ଘି ଚାହାଁନୁ ଅଚ୍ଚାର୍ । ହୁବ୍ଡ଼ାର୍ ପାଉଲୁସ୍ ଆରୁ ସିଲାସ ସିନ୍ ଡ଼େମ୍ଚାର୍, ଆରୁ ହୁବ୍ଡ଼ାରିନ୍ ଜେଲ୍ନୁ ଗୁଡ଼େଚିଚ୍ଚାର୍ ।
ହୁବ୍ଡ଼ାର୍ ପାଉଲୁସ୍ ଆରୁ ସିଲାସ୍ ସିନ୍ ଜେଲ୍ ଘି ଏନ୍ନେ ଜାଗାନୁ ଉଇୟାର୍ ଏକାସାନ୍ ସାଫାତିନ୍ ବେଶି ସିଫାହିର୍ ରାଚା । ଏତ୍କୋତୋକ୍ କା ହୁବ୍ଡ଼ାର୍ ହୁବ୍ଡ଼ା ଘି ହେଡ୍ଡୁବୋନ୍ କାଙ୍କୁନୁ ଘି ବାଡ଼୍କା ଟୁକ୍ଡାନୁ ଜୋଡ଼େଇ ଚିଚ୍ଚାର୍ । ଲେକିନ୍ ପାଉଲୁସ୍ ଆରୁ ସିଲାସ୍ ଆଧା ମାହାଁନୁ, ପାରମେଶ୍ୱରସ୍ ଘି ସ୍ତୁତି ଗି ଗୀତୁ ପାଡ଼ାଲଗାର୍ ।
ହଠାତ୍, ଅଣ୍ଟା ଭାୟାନାକ୍ ଭୁମିକମ୍ପ ମାନ୍ଚାଦ୍ ! ଜେଲ୍ତା ଜାମା ବାଲି ଖୁଲ୍ରାକେରା, ଆରୁ ଜାମା କୋଇଦିର୍ ଘି ଶିକ୍ଡ଼ି ଖୋଲରାଦ୍ ଖାତରାକେରା ।
ହୁବାକେନ୍ ଜାଗୁଆସ୍ ଏଜ୍ରାସ୍ କେରାସ୍ । ହୁସ୍ ଏରିୟାସ୍ କା ଜେଲ୍ଖାନାନ୍ତା ବାଲି ଗୁଠି ଖୁଲ୍ରା କେର୍କିଚି । ହୁସ୍ ସୋଚ୍ଚାସ୍କା ଜାମା କେଇଦିର୍ ବାଛ୍ରିକିରି ବୁଙ୍ଗାର୍ ଚିଚକାନାର୍ । ହୁସ୍ ଏଲିଚିୟାସ୍ କେରାସ୍କା ହୁବ୍ଡ଼ାର୍ ଘି ବୁଙ୍ଗନାଘି କାରଣନ୍ତି ରୋମୀ ଆଧିକାରୀ ହୁସ୍ନି ପିଟୋଚର୍ , ଇଦ୍ଘି ଲାଗାନ୍ ହୁସ୍ ଖୁଦ୍ ସିନ୍ ପିଟାଗେ ତିଆର୍ ମାନ୍ଚାସ କେରାସ୍ । ଲେକିନ୍ ପାଉଲୁସ୍ ହୁସିନ୍ ଏରିକିରି ଚିର୍ରାରାଚାସ୍, “ଠାହାରାରାକାଲା “ ! ଖୁଦ୍ ସିନ୍ ନୁକ୍ସାନ୍ ଆମା ଆଣସ୍ତା । ଏମ୍ ଜାମାମ୍ ଇସାନ୍ ଆତଲ୍ଦାମ୍ ।“
ହୁ ଜାଗୁଆସ୍ ଥାର୍ଥାର୍ତେ ପାଉଲୁସ୍ ଆରୁ ସିଲାସ୍ ଘି ଚାହାଁ ବାରିକଗିରି ମେନ୍ଚାସ୍, “ଉଦ୍ଧାର୍ ହାକ୍ଖାଗେ ଏନ୍ ଏନ୍ଦେର୍ କାମନ୍ ?“ ପାଉଲୁସ୍ ଜାବାବ୍ ଚିଚ୍ଚାସ୍, “ପ୍ରଭୁ ଈଶୁସ୍ ସିନ ବିଶ୍ୱାସ୍ କାମାର୍ ତା ନିନ୍ ଆରୁ ନିଙ୍ଘାୟ ଏଡ଼ପାନ୍ତାର ଉଦ୍ଧାର୍ ହାଖ୍କରୋ, “ବାକେନ୍ ହୁ ଜାଗୁଆସ୍, ପାଉଲୁସ୍ ଆରୁ ସିଲାସ୍ ନିଜର ଏଡ଼୍ପା ଅଚଚାସ୍ କେରାମ୍ ଆରୁ ହୁବ୍ଡ଼ାର୍ ଘି ଖାଦିବୋନ୍ ନୋଡ଼ିୟାସ୍ ପାଉଲୁସ୍ ହୁସ୍ଘି ଏଡ଼୍ପାନ୍ତା ଜାମା ଆଲାରିନ୍ କୁରୁଶ ଗି ବିଷୟନୁ ସୁସାମାଚାର୍ ମେନ୍ତାଚାସ୍ ।
ଜାଗୁଆସ୍ ଆରୁ ହୁସ୍ଘି ଜାମା ପାରିବାରଦ୍ ଈଶୁସିନ୍ ବିଶ୍ୱାସ୍ କାମ୍ଚାର୍ ଇଦ୍ଘି ଲାଗାନ୍ ପାଉଲୁସ୍ ଆରୁ ସିଲାସ୍ ହୁବ୍ ଡାରିନ୍ ବାପ୍ତିସ୍ମା ଚିଚାର୍ । ହୁବାକେନ୍ ଜାଗୁଆସ୍ ପାଉଲୁସ୍ ଆରୁ ସିଲାସ୍ ସିନ୍ ମାଣ୍ଡି ଅନ୍ତାଦାସ୍, ଆରୁ ହୁବ୍ଡ଼ାର୍ ସାଙ୍ଗେନ୍ ଖୁସି ମାନ୍ଚାର୍ ।
ଆଘ୍ଲି ଉଲ୍ଲା ରାଜିନ୍ତା ଆଗୁଆର୍ ପାଉଲୁସ୍ ଆରୁ ସିଲାସ୍ ସିନ୍ ଜେଲ୍ନ୍ତି ଆଜାଦୀ କାମ୍ଚାର୍ ଆରୁ ଫିଲିଫସ୍ ତିନ୍ କାଲାଗେ ତେଙ୍ଗିୟାର୍ । ପାଉଲୁସ୍ ଆରୁ ସିଲାସ୍ ଲୁଦିୟା ଆରୁ କିଛି ଦୁସ୍ରା ସାଙ୍ଗେର୍ ଗାନେ ଭେଟ୍ରାର୍ ଆରୁ ହୁଦ୍ଘି ପାଛ୍ଲି ରାଜିନ୍ତି ଉରଖିୟାର୍ କେରାର୍ । ଈଶୁଘି ବିଷୟନୁ ସୁସାମାଚାର୍ ଫୌଲାରାତେ କେରାର୍, ଆରୁ କାଲିସିୟା ବାଢ଼ର୍ତେ କେରା ।
ପାଉଲୁସ୍ ଆରୁ ଦୁସ୍ରା ମାସିହି ଆଗୁଆର୍ ଢ଼େର୍ ରାଜି ଗେ କୁଦିୟାର୍ । ହୁବ୍ଡ଼ାର୍ ଆଲାରିନ୍ ଈଶୁଘି ବି୍ଷୟନୁ ସୁସମାଚାର୍ ମେନ୍ତାଚାର୍ । ହୁବ୍ଡ଼ାର୍ କାଲିସିୟାନ୍ତା ବିଶ୍ୱାସିରିନ ଉତ୍ସାହିତ କାମ୍ନା ଆରୁ ଶିକ୍ଷାଚିୟାଗେ ଇୟଁ ବହି ଲେଖ୍ଚାର୍ । ଇନ୍ନୁତା କିଛି ବହି ବାଇବେଲ୍ ନ୍ତା ବହି ମାନଚାକେରାଦ୍ ।
ପ୍ରେରିତ ୧୬:୧୧-୪୦ ସ୍ତିନ୍ ଅଣ୍ଟା ବାଇବେଲ୍ ଗି କାଥ୍ନି
Free to use, adapt, and share under an open license (CC BY-SA 4.0).