48. ଯୀଶୁସ୍ ହି ଶପଥ କାମ୍‌ଚ୍‌କା ମାସିହସ୍

ବାକେନ୍ ପାରମେଶ୍ୱରସ୍ ଦୁନିଆଁ ବୋନ୍ ବାନା ବାଚାସ୍ ତା ଜାମା କିଛି ବାନେ ରାଚାଦ୍ । ଏନ୍ଦେର୍ ଭି ପାପ୍ ମାଲ୍ଲା ରୁଦ୍ । ଆଦାମ୍ ଆରୁ ହାୱା ଦୁହିଁ ଲୋକ ବାନେ ହାଖ୍‌ଲ୍‌ଗାର୍, ଆରୁ ହୁବ୍ଡ଼ାର୍ ପାରମେଶ୍ୱରସିନ୍ ବାନେ ହାଖ୍‌ଲ୍‌ଗାର୍ । ଏନ୍ଦେର ଭି ବେମାର୍ ୟା ଖିନା ମାଲ୍ଲା ରୁଦ୍ । ପାରମେଶ୍ୱରସ୍ ଏନ୍ନେ ଦୁନିଆଁନ୍ ବେଦ୍‌ଦାଲାସ୍ ।

ସାଇତାନ୍‌ଦ୍ ନେର୍‌ରୁ ଘି ଚାଲତେ ବାଟ୍‌କୀନୁ ହାୱା ଗାନେ କାଚ୍‌ଲେଖ୍‌ରା, ଏନ୍ଦେର୍ ଗେ କା ହୁଦ୍ ହୁବନ୍ ଧୋଖା ଚିଇୟା ବେଦଲ ଗା । ବାକେନ୍ ହାୱା ଆରୁ ଆଦମ୍‌ସ୍ ପାରମିଶ୍ୱରସ୍ ଘି ବିରଧ୍‌ନୁ ପାପ୍ କାମ୍‌ଚାର । ଏନ୍ଦେର୍ ଗେ ହୁବ୍ଡ଼ାର୍ ପାପ୍ କାମ୍‌ଚ୍‌ଚାର ଇଦ୍‌ଘି ଲାଗାନ୍ ଦୁନିଆନ୍ତାର୍ ରାନା ବାଲା ଜାମା ଆଲାର୍ ଖିନାର୍ ।

ଏନ୍ଦେର୍ ଗେକା ଆଦମ୍ ଆରୁ ହାୱା ପାପ କାମ୍‌ଚ୍‌କାଚାର୍ , ଇଦ୍‌ଘି ଲାଗାନ୍ କିଛି ଆରୁ ଭି ବୁରା ମାଞ୍ଚା । ହୁବ୍ଡ଼ାର୍ ପାରମେଶ୍ୱରସ୍ ଘି ଶତ୍ରୁ ମାଞ୍ଚା କେରାର୍ । ଇଦ୍‌ଘି ପରିଣାମ୍ ଘି ରୂପନୁ , ହୁବାକେନ୍‌ନ୍ତି ଜାମା ଆଲାର୍ ପାପ କାମ୍‌ଚାର । ହା ଜାମା ଅଣ୍ଟା ଆଲାର୍ ଜନମ୍‌ସ୍ତିନ୍ ହି ପାରମେଶ୍ୱରସ୍ ଘି ଶତ୍ରୁର । ପାରମେଶ୍ୱର ଆରୁ ଆଲାର୍ ଘି ମାଝାନୁ ଶାନ୍ତି ମାଲ୍ଲା ରୁଦ୍ । ଲେକିନ୍ ପାରମେଶ୍ୱରସ୍ ଶାନ୍ତିନୁ ଉଇୟାଗେ ବେଦ୍‌ଦାସ୍ ।

ପାରମେଶ୍ୱରସ୍ ଶପଥ କାମ୍‌ଚାସ୍ ହାୱା ଘି ଅଣ୍ଟା ବାଉଁଶାର ସେଇତାନ୍ ଘି କୁକ୍‌କୁନ୍ କୁଚୋର । ହୁସ୍ ଏନ୍ନେ ଭି ତେଙ୍ଗିୟାସ୍ କା ସେଇତାନ୍ ହୁଦ୍ ଘି ଗୁଡ଼ିବୋନ୍ ଠୋଠଦ୍ । ଦୁସ୍‌ରା କତ୍‌ଥାନୁ, ସେଇତାନ୍ ମାସିହସିନ୍ ପିଟୋଚଦ୍, ଲେକିନ୍ ପାରମେଶ୍ୱରସ୍ ହୁସିନ୍ ଆରୁ ଅହନ୍ ଉଜ୍‌ତୋଚୋସ୍ । ଇଦ୍‌ଘି ପାଛ୍‌ଲି, ମାସିହସ୍ ସେଇତାନ୍ ଘି ଶକ୍ତିବୋନ୍ ସବୁ ବାକେନ୍ ଘି ଲାଗାନ୍ ଖତମ୍ କାମାଚାସ୍ । କିଛି ବଛର୍ ଘି ବାଦେନୁ ,ପାରମେଶ୍ୱରସ୍ ପ୍ରଗଟ୍ କାମ୍‌ଚାସ୍ କା ହୁସ୍ ମାସିହ ଯୀଶୁସ୍ ।

ପାରମେଶ୍ୱରସ୍ ହୁ ବାଢ଼ିନ୍‌ନ୍ତି ନିଜର୍ ପରିବାର୍ ରିନ୍ ବାଚାବାଚାସ୍ ଜେନ୍‌ଟା ହୁ ବାରନା ବାଲା ରାଚା । ନୁହୁ ସିନ୍ ଅଣ୍ଟା ଡଙ୍ଗା କାମାଗେ ତେଙ୍ଗିୟାସ୍ କା ହୁଦ୍‌ ଇ ଲେଖାନୁ ପାରମେଶ୍ୱରସ୍ ହୁ ଆଲାରିନ୍ ବାଛା ବଚାସ୍ ନେର୍ ହୁସିନ୍ ବିଶ୍ୱାସ୍ କାମାଲ୍‌ଗାର । ଇଦ୍‌ ଘି ଲେଖାନ୍ତି, ହୁବ୍ଡ଼ାର୍ ଜାମାର୍ ପାରମେଶ୍ୱରସ୍ ଘି ତାରତୀ ପିଟନା ଘି ଯୋଗ୍ୟତା ରାଚାର୍, ଏନ୍ଦେର ଗେକା ହୁବ୍ଡ଼ାର୍ ପାପ ନାଚ୍‌କାଚାର୍ । ଲେକିନ୍ ପାରମେଶ୍ୱରସ୍ ହୁବ୍ଡ଼ା ଜାମାରିନ୍ ବାଛା ବାଗେ ଲାଗାନ ଯୀଶୁସିନ୍ ତାଇୟାସ୍ ନେର୍ ହୁସ୍ ଘି ମିଆଁ ବିଶ୍ୱାସ୍ କାମାଲ୍ ନାର୍ ।

ଜୁକ୍‌କୁ ବଛର୍ ତୋକ୍, ୟାଜକସ୍ ପାରମେଶ୍ୱରସ୍ ଘି ଲାଗାନ୍ ବାଲିଦାନ୍ ଚିୟା ଲାର୍ । ଇ ଦାରସାଲିଦ କା ଆଲାର୍ ପାପ କାମ୍‌ଚ୍‌କା ଆରୁ ଇଦ୍ କା ହୁବ୍ଡ଼ାର୍ ପାରମେଶ୍ୱରସ୍ ଘି ତାରତୀ ହୁବ୍ଡ଼ାରିନ୍ ଦଣ୍ଡିତ୍ କାମ୍‌ନା ଘି ଯୋଗ୍ୟ ରାଚାର୍ । ଲେକିନ୍ ହୁବ୍ଡ଼ା ବାଲିଦାନ୍ ହୁବ୍ଡ଼ାର୍ ଘି ପାପ୍ ବୋନ୍ ମାଫ୍ କାମାପଲ୍ ନାର୍ । ଯୀଶୁସ୍ ଜାମସ୍ତିନ୍ ବାଡ଼୍‌କା ମାହା ୟାଜକ୍‌ସ୍ । ହୁସ୍ ହନ୍ନେ କାମ୍‌ଚାସ୍ ଜେନ୍‌ଟା ନେର୍ ହି ୟାଜକସ୍ କାମା ପଲ୍ଲାନାର୍ । ହୁସ୍ ହୁ ଅନ୍‌ଟା ଟୁଖା ବାଲିଦାନ୍ ମାନାଗେ ଲାଗାନ୍ ଖୁଦ୍ ବୋନ୍ ଚିଚ୍‌ଚାସ୍ ଲାଗିୟାସ୍ ଜେନ୍‌ଟା ବୋନ୍ ଜାମାର୍‌ଘି ପାପ୍‌ବୋନ୍ ମିଟା ବାଗେ ଅଙ୍କାରସ୍ ନେ । ହୁସ୍ ସ୍ୱୀକାର କାମ୍ଚାର୍ ପାରମେଶ୍ୱରସ୍ ହୁ ଜାମାର୍ ଘି ପାପିର୍ ଘି ଲାଗାନ ହୁସିନ୍ ଦଣ୍ଡିତ୍ କାମୋର୍ । ଇଦ୍ ଘି ଲାଗାନ୍, ଯୀଶୁ ସୁଧ୍ ବାଡ଼କା ମାହାୟାଜକ୍ ରାଚାସ୍ ।

ପାରମେଶ୍ୱରସ୍ ଆବ୍ରାହାମ୍ ସିନ୍ ତେଙ୍ଗିୟାସ୍,“ ଏନ୍ ନିଙ୍ଘାଁଏ ତାରତୀ ଦୁନିଆଁନ୍ତା ଜାମା ଜାତି ଗୁଠିରିନ୍ ଆଶିଷ୍ ଚୋନ ।” ଯୀଶୁସ୍ ଇ ଆବ୍ରାହାମ୍‌ସ୍ ଘି ବାଉଁସାର୍ ରାଚାସ୍ । ପାରମେଶ୍ୱରସ୍ ଆବ୍ରାହାମ୍‌ସ୍ ଘି ତାରତୀନ ଜାମା ଜାତି ଗୁଠିରିନ୍ ଆଶିଷ ଚିଇୟାଲ୍ ଦାସ୍, ଏନ୍ଦେର ଗେ କା ନେର୍ ଯୀଶୁସିନ୍ ବିଶ୍ୱାସ୍ କାମ୍‌ନାର୍ ପାରମେଶ୍ୱରସ୍ ହୁ ଜାମାର୍ ଘି ପାପ୍ ସ୍ତିନ୍ ବାଛା ବାଲ୍‌ଦାସ୍ । ଯେତେ ବାକେନ୍ ଇବ୍‌ଡ଼ା ଆଲାର୍ ଯୀଶୁସିନ୍ ବିଶ୍ୱାସ୍ କାମ୍‌ନାର, ତା ପାରମେଶ୍ୱରସ୍ ହୁବ୍ଡ଼ାରିନ୍ ଆବ୍ରହାମ୍‌ସ୍ ଘି ବାଉଁଶର୍ ମାନ୍‌ଦାସ୍ ।

ପାରମେଶ୍ୱରସ୍ ଆବ୍ରାହାମ୍‌ସିନ୍ ତେଙ୍ଗିୟାସ୍ କା ହୁସ୍ ନିଜର ହାଦ୍‌ଦୁସିନ୍, ହୁସ୍ ଘି ଲାଗାନ୍ ବାଲିଦାନ୍ କାମାଚା ସ୍ । ଲେକିନ୍ ପାରମେଶ୍ୱରସ୍ ଇସ୍‌ହାକ୍‌ସ୍ ଘି ବାଦ୍‌ଲିନୁ ବାଲି କାଆମାଗେ ଅଣ୍ଟା ଭେଡ଼ି ଚିଚାସ୍ । ନାମ୍ ଜାମାର୍ ନିଜର ପାପ୍ ଘି ଲାଗାନ୍ ପିଟନା ଘି ଯୋଗ୍ୟ ରାଚାକାତ ! ଲେକିନ୍ ପାରମେଶ୍ୱରସ୍ ଏମାହାଏ ଆଡ଼ାନୁ ଖିୟାଗେ ଲାଗାନ୍ ଯୀଶୁସ୍ ସିନ୍ ବାଲିଦନ୍ ଘି ରୂପନୁ ଚିଚାର୍ । ଇଦ୍ ଘି ଲାଗାନ୍ ନାମ୍ ଯୀଶୁସ୍ ସିନ୍ ପାରମେଶ୍ୱରସ୍ ଘି ଭେଢ଼ି ତେଙ୍ଗ୍‌ନାର୍ ।

ଯେ ବାକେନ୍ ପାରମେଶ୍ୱରସ୍ ମିଶ୍ରିନୁ ଆଖ୍‌ରୀ ବିପଦ୍ ତାଇୟାସ୍ ତା ହୁସ୍ ହାର୍ ଜାମା ଅଣ୍ଟା ଇସ୍ରାଏଲିର୍ ପରିବାର ରିନ୍ ତେଙ୍ଗିୟସ୍ କା ହୁବ୍ଡ଼ାର୍ ଭେଢ଼ି ବୋନ୍ ବାଲି କାମୋର୍ । ହୁ ଭେଢ଼ିନୁ ଅଣ୍ଟା ହି ଦୋଷ୍ ମା’ ରାନା କତ୍‌ଥା । ବାକେନ୍ ନିଜର ଘୁମା ଘି ଚଖୁଟ୍ ଘି ମିଆଁ ଆରୁ ଏଡ଼୍‌ପାନୁ ହୁବ୍‌ଡ଼ାର୍ ହୁଦ୍‌ଘି ହେସୁଁ ବୋନ୍ ଲାଗାବାଗେ ରାଚଦ୍ । ବାକେନ୍ ପାରମେଶ୍ୱରସ୍ ହୁ ହେସୁଁବୋନ୍ ଏରିୟାସ୍ ତା ହୁସ୍ ହୁବ୍ଡ଼ାର୍ ଘି ଏଡ଼୍‌ପାନ୍‌ନ୍ତି ଆଘ୍‌ଲି ବାଢ଼ରାସ୍ ଆରୁ ହୁବ୍‌ଡ଼ାର୍ ଘି ବାଡ଼୍‌କା ହାଦ୍‌ଦୁରିନ୍ ମା’ ପିଟ୍ ଚାସ୍ ବାକେନ୍ ଏନ୍ନେ ମାଞ୍ଚାଦ୍‌ ତା ପାରମେଶ୍ୱରସ୍ ଇବୋନ୍ ଫସହ ପରବ୍ ତେଙ୍ଗିୟାସ୍ ।

ଯୀଶୁସ୍ ଫସହ ପରବ୍ ଅଣ୍ଟା ଭେଢ଼ି ଘି ଲେଖାନୁ । ହୁଦ୍ ଏକ୍‌ଲା ହି ପାପ୍ ମା’ କାମ୍‌ଚିକ୍‌ଚା, ଇଦ୍ ଘି ଲାଗାନ୍ ହୁନୁନ୍‌ତି କିଛି ଭି ଗାଲ୍‌ତି ମାଲ୍ଲା ରୁଦ୍ । ହୁଦ୍ ଫସହ ଘି ପରବ୍ ସମୟ ଗେ କେଚ୍ ଚାଦ୍ । ବାକେନ୍ ନେର୍ ଯୀଶୁସିନ୍ ବିଶ୍ୱାସ୍ କାମ୍‌ନାର୍, ବାକେନ୍ ଯୀଶୁସ୍ ଘି ହେଁସୁ ହୁ ଆଲାସ୍ ଘି ପାପ ଗୁଠିବୋନ୍ କିମତ୍‌ବୋନ୍ ଚୁକା ବାଦାସ୍ । ଇବ୍‌ଦ୍ ଏନ୍ନେଦ୍ ଇ ଲେଖା କା ପାରମେଶ୍ୱରସ୍ ହୁ ଆଲାସ୍ ଘି ଚାହାଁନସ୍ତିନ୍ ଆଘ୍‌ଲି ବାଢ଼ରାସ୍ , ଏନ୍ଦେର୍ ଗେ କା ହୁସ୍ ହୁସିନ୍ ଦଣ୍ଡ ମା’ ଚିଦାସ୍ ।

ପାରମେଶ୍ୱରସ୍ ଇସ୍ରାଏଲି ଆଲାର୍ ଘି ସାଙ୍ଗେନୁ ଅଣ୍ଟା ଶପଥ୍ କମ୍‌ଚାସ୍ , ଏନ୍ଦେର ଗେ କା ହୁବ୍ଡ଼ାର୍ ଏନ୍ନେ ଆଲ ରାଚାର୍ ନେକାରିନ୍ ପାରମେଶ୍ୱରସ୍ ନିଜର୍ ମାନ୍ନା ଘି ଲାଗାନ୍ ଚୁନ୍ କାଚାସ୍ । ଲେକିନ୍ ଆକୁନ୍ ପାରମେଶ୍ୱରସ୍ ଅଣ୍ଟା ଏନେଏ ୱାଦା କାମ୍‌ଚ୍‌କା ଦାସ୍ ଜେନ୍‌ଟା କୀ ଜାମାର୍ ଘି ଲାଗାନ୍ । ଲେକିନ୍ ଏକିନ୍ ଭି ଜାତି ଘି ନେଏ ଦିନ୍ ଭି ଆଲର ଇ ପୁନ୍ନା ୱାଦା ବନ୍ ଗ୍ରହନ୍ କାମ୍‌ନାର୍, ତା ହୁସ୍ ପାରମେଶ୍ୱରସ୍ ଘି ଆଲାରସାନ୍ ସାମିଲ୍ ମାନ୍ଦାସ୍ କାଦାସ୍ । ହୁସ୍ ଏନେଏ ଇଦ୍ ଘି ଲାଗାନ୍ କାମ୍ ଦାସ୍ ଏନ୍ଦେର୍ ଗେ କା ହୁସ୍ ଯୀଶୁ ସିନ୍ ବିଶ୍ୱାସ୍ କାମ୍‌ଦାସ୍ ।

ମୁସା ଅଣ୍ଟା ଏନ୍ନେ ଭବିଷ୍ୟତବକ୍ତା ରାଚାସ୍ ନେକାନ୍ ପାରମେଶ୍ୱରସ୍ ଘି କାତଥା ବୋନ ବାଡ଼େ ଶକ୍ତି ଘି ସାଙ୍ଗେନୁ ପ୍ରଚାର କାମ୍‌ଚ୍‌କାଚାସ୍ । ଲେକିନ୍ ଯୀଶୁସ୍ ଜାମା ଭବିଷ୍ୟତବକ୍ତା ରିନ୍‌ସ୍ତି ଜାମାର ନ୍ତି ବାଡ଼କାସ୍ । ହୁସ୍ ପାରମେଶ୍ୱରସ୍, ଇଦ୍‌ଘି ଲାଗାନ୍ ଜେନ୍‌ଟା ଭି ହୁସ୍ କାମ୍‌ଚସ୍ ଆରୁ ତେଙ୍ଗିୟାସ୍ , ହୁସ୍ ପାରମେଶ୍ୱରସ୍ ଘି ନାଲ୍‌ଖୁ ଆରୁ କାତଥା ରାଚାଦ୍ । ଇଦ୍ ଘି ଲାଗାନ୍ ପବିତ୍ର ଶାସ୍ତ୍ରନୁ ଯୀଶୁସ୍ ଘି ପାରମେଶ୍ୱରସ୍ ଘି କାତଥା ତେଙ୍ଗ୍‌ନାର ।

ପାରମେଶ୍ୱରସ୍ ରାଜା ଦାଉଦ୍ ସ୍ତିନ୍ ଶପଥ କାମ୍‌କା ଚାସ୍ କା ରାଜାସ୍ ଘି ରୂପନୁ ହୁସ୍ କୀ ଅଣ୍ଟା ବାଉଁସାର ପାରମେଶ୍ୱରସ୍ ଘି ଆଲାର୍ ଘି ମିଆଁ ସବୁ ବାକେନ୍ ଘି ଲାଗାନ୍ ଶାସନ୍ କାମାଗେ ଅଙ୍ଗସ୍ ।

ଦାଉଦ୍ ତା ଇସ୍ରାଏଲ୍ ଘି ରାଜା ରାଚାସ୍, ଲେକିନ୍ ଯୀଶୁ ଜାମା ଦୁନିଆଁ ଘି ରାଜାସ୍ ! ହୁସ୍ ଫିର୍ ସ୍ତିନ୍ ବାରସ୍ ଆରୁ ଜାମା ବାକେନ୍ ଘି ଲାଗାନ୍ ବିଚାର ଆରୁ ଶାନ୍ତି ଘି ସାଙ୍ଗେନୁ ନିଜର୍ ରାଜିବନ୍ ଶାସନ୍ କାମସ୍ ।