9. ପାରମେଶ୍ୱରସ୍ ମୁସାସିନ୍ ମେହାଲଦାସ୍

ୟୁସୁଫସ୍ ଖିନା ଘି ବାଦନୁ ହୁସ୍ ଘି ଜାମା ରିସ୍ତାଦାର୍ ଗୁଠିର୍ ମିସ୍ରି ରାଜିନୁ ବାସ୍ରାର୍ କେରାର୍ । ହୁବଡାର୍ ଆରୁ ହୁସ୍ ଘି ବଂଶର୍ ଗୁଠିର୍ ବାଗଗେ ବଛର୍ ତୋକ୍ ମିସ୍ରି ରାଜିନୁ ରାଚାର୍ ଆରୁ ହୁବଡାର୍ ଘି ଯୁକ୍‌କୁ ହାଦ୍‌ଦୁର୍ ବୋଚ୍ଚ ଜନମ୍ ମାନ୍‌ଚାର୍ । ହୁବଡ଼ାରିନ୍ ଇସ୍ରାଏଲି ତେଂଗା କେରାଦ୍ ।

ଇୟଁ ଶହେ ବଛର୍ ଘି ବାଦନୁ ,ଇସ୍ରାଏଲ୍ର୍ ଗୁଠିର୍ ଘି ସଂଖ୍ୟା ଜୁକକୁ ଗୁଡେ ବାଢ଼ରା କେରକିଚା । ଆରୁ ମିସ୍ରି ରାଜି ଘି ଆଲର୍ ଆକକୁନ୍ ତୋକ୍ କାଥ୍ ଥା ଘି ଲାଗାନ୍ ଏହେସାନ୍ ମାଲ୍ଲା ରୁର୍ କା ହୁବଡାର୍ ଘି ସାହାୟତା କାମାଗେ ୟୁସୁଫସ୍ ବହୁତ୍ କିଛି କାମକାଚାସ୍ । ହୁବଡା ର୍ଇସ୍ରାଏଲ୍ ଗୁଠିରିନ୍ ସ୍ତିନ୍ ଏଲଚିୟାର୍ କେରକାଚାର୍ ଏନ୍ଦେର୍ ଗେ କା ହୁବଡାର୍ ଘି ସଂଖ୍ୟା ବୋଦ୍ ହୁବଡାର୍ ସ୍ତିନ୍ ଜୁକକୁ ରାଚାଦ୍ । ହୁବାକେନ୍ ହୁ ସାମୟଁ ନୁ ମିସ୍ରି ଘି ମିୟାଁ ଶାସନ୍ କାମନା ବାଲା ଫିରୋନ୍ସ୍ ଇସ୍ରାଏଲ୍ ଜାମାରିନ୍ ମିସ୍ରିଆର୍ ଘି ଦାସ୍ କାମଚେଚାସ୍ ।

ମିସ୍ରି ର୍ ଇ ର୍ସ୍ରାଏଲ୍ ଗୁଠିରିନ୍ ଜୁକକୁ ଗୁଡେ ବାଡେ଼-ବାଡ଼େ ଏଡ଼ପା ଗୁଠିନ୍ ଆରୁ ୟଁ ତୋକ୍ କା ଜୁକକୁ ଗୁଡ଼େ ସହର୍ ଗୁଠି ବାନାବାଗେ ମାଜବୁର୍ କାମକାଚାର୍ । ହୁ କଠିନ୍ ପରିଶ୍ରମ ନୁ ହୁବଡାର୍ ଘି ଜିୟା ଗୁଠି ବଡ଼କା ଦୁଃଖି କାମଚେଚାର୍ ,ଲେକିନ୍ ପାରମେଶ୍ୱରସ୍ ହୁବଡାରିନ୍ ଆଶିଷ୍ ଚିଚାସ୍ ଆରୁ ହୁବଡାର୍ ଘି ଆରୁ ଜୁକକୁ ହାଦ୍‌ଦୁର୍ ବଚ୍ ଚୋର୍ ଜନମ୍ ମାନଚାର୍ ।

ଫିରୋନ୍ ଏରିୟାସ୍ କା ଇସ୍ରାଏଲ୍ ଗୁଠିର୍ ଯୁକ୍କୁ ଗୁଡ଼େ ହାଦ୍ଦୁ ବୋଚ୍ର୍ ଜନମ୍ ମାନାଲାର୍ ,ବାକେନ୍ ହୁସ୍ ନିଜର୍ ଆଲାରିନ୍ ଇସ୍ରାଏଲ୍ ଗୁଠିର୍ ଘି ଜାମା କୁକକୋ ହାଦ୍ଦୁ ଗୁଠିରିନ୍ ନୀଲ୍ ଜୋଡୁ ନୁ ପିଟାକିରୀ ଖେବଡାଗେ ଲାଗାନ୍ ହୁକୁମ୍ ଚିଚକାଚାସ୍ ।

ଅଣ୍ଟା ଇସ୍ରାଏଲ୍ ମୁକ୍କା ଅଣ୍ଟା ହାଦ୍ଦୁନ୍ ଜନମ ଚିଚ୍ କିଚାଦ୍ । ହୁଦ୍ ଆରୁ ହୁସ୍ ଘି ଆଲାସ୍ ଗାନେ ଯେତକୋ ମାନା ଅଂଗୀୟାର୍ ହୁ ହାଦ୍ଦୁ ବୋନ୍ ଛୁପାଵା କିରୀ ଉଇକାଚାର୍ ।

ଯେ ବାକେନ୍ ହୁ କୁକକୋ ଘି ଆୟଂଗ୍-ବାଂଗ୍ର୍ ବାଗଗେ ଉଲ୍ଲ ତୋକ୍ ନୁଣା ଗେ ପଲ୍ଲିୟାର୍ ,ତା ହୁବଡାର୍ ହୁସିନ୍ ପିଟନା ନ୍ତି ବାଛାବାଗେ ଅଣ୍ଟା ପହଁରନା ବାଲା ଝୁଡି ନୁ ନୀଲ୍ ଯୋଡୁ ଖାଣି ନୁ ସାର୍‌କାଣ୍ଡେ ଘି ମାଝାନୁ ଉଇଏ ଚିଚଚାର୍ ।ହୁଦଘି ବାଡକା ବୁହୁଣୀ ବୋଦ୍ ଇ ବୋନ୍ ଏରାଗେ ଲାଗାନ୍ ନଜର୍ ନୁ ଉଇକି ଚାଦ୍ କା ହୁଦଘି ଗାନେ ଏନ୍ଦେର୍ ମନୋଦ୍ ।

ଫିରୋନ୍ସ୍ ଘି କୁକାଏଦ୍ ହୁ ଝୁଡି ବୋନ୍ ଏରାଗେ ଲାଗାନ୍ ହୁ ଉଲାନୁ ଡୋଂଗ୍‌ଚେଚେ ଏରିୟାଦ୍ ବାକେନ୍ ହୁଦ୍ ଅଣ୍ଟା ହାଦୁବୋନ୍ ଏରିୟାଦ୍ ବାକେନ୍ ହୁସିନ୍ ନିଜର୍ ହାଦ୍‌ଦୁ ଘି ରୁପ ନୁ ଅଚ୍ଚା କେରାଦ୍ । ହୁଦ୍ ଅଣ୍ଟା ଇସ୍ରାଏଲ୍ ଆଲିବୋନ୍ ହୁସିନ୍ ଗୁରସ୍ ହାପ୍‌ତାଗେ ଲାଗାନ୍ ନାଲଖୁନୁ ଉଇୟାଦ । ମା’ ଆହିକିରୀ ହୁଦ୍ ହୁ ହାଦ୍ଦୁଘି ଆସଲୀ ଆୟାଂଗ ରାଚାଦ୍ । ଯେ ବାକେନ୍ ହୁ ହାଦ୍ଦୁ ବାଡକା ମାନଚାସ୍ କେରାସ୍ । ଆକକୁନ୍ ହୁସିନ୍ ନିଜର୍ ଆୟଂଗ୍ ଘି ଗୁରୁସ୍ ଘି ଦାରକାର୍ ମା ରାଚାଦ୍ । ତା ଫିରୋନ୍ ସ୍ ଘି କୁକାଏ ଘି ଚାହାଁନୁ କିର୍‌ତେ ଚିଚଚାଦ୍,ହୁ ହାଦ୍ଦୁ ଘି ନାମେ ମୁସା ରାଚାଦ୍ ।

ଅ ଣ୍ଟା ଉଲ୍ଲାନୁ,ଯେ ବାକେନ୍ ମୁସାସ୍ ବଡକା ମାନଚାସ୍ କେରକାଚାସ୍ ,ତା ହୁସ୍ ଏରିୟାସ୍ କା ଅଣ୍ଟା ମିସ୍ରି ସ୍ ଅଣ୍ଟା ଇସ୍ରାଏଲ୍ ସିନ ଡେମାଲାର୍ ।ମୁସାସ୍ ନିଜର୍ ସାଂଗେ ଇସ୍ରାଏଲ୍ ସିନ ବାଚାବାଗେ କୋସିସ୍ କାମଚାସ୍ ।

ଯେ ବାକେନ୍ ମୁସାସ୍ ସୋଚାସ୍ କା ହୁ ସିନ ନେର୍ ଭି ମାଲ୍ଲା ଏରୁର୍ ବୁଲିକିରୀ ହୁସ୍ ହୁ ମିସ୍ରି ସିନ ପିଟ୍ ଟେ ଚାସ୍ ଆରୁ ମାଣା ବୋନ୍ ମାଡ଼ିଏ ଚିଚ୍ ଚାସ୍ । ଲେକିନ୍ ମୁସାସ୍ ଏନ୍ଦେର୍ କାମଚାସ୍ ହୁ ବୋନ୍ ନେର୍ ଏର୍‌କାଚାର୍ ।

ଫିରୋନସ୍ ଆହା ଅଂଗିୟାସ୍ କା ମୁସାସ୍ ଏନ୍ଦେର୍ କାମ୍‌ଚାସ୍ । ହୁସ୍ ହୁସିନ୍ ପିଟାଗେ ଲାଗାନ୍ କୋସିସ୍ କାମ୍ ଚାସ୍ ,ଲେକିନ୍ ମୁସାସ୍ ମିସ୍ରି ଘି ଜଂଗଲ ଗେ ବୁଂଗେ ଚିଚାସ୍ । ଫିରୋନସ୍ ଘି ସେନା ଜାମାର୍ ହୁ ସିନ୍ ହୁସାନ୍ ବେଦ୍ ଦା ଗେ ପଲ୍ଲି ୟାର୍ ।

ମିସ୍ରି ସ୍ତିନ୍ ଗେଛ୍ଛା ଜଂଗଲନୁ ମୁସାସ୍ ଅଣ୍ଟା ଚାର୍ ୱାହା ମାନ୍‌ଚା କେର୍‌କା ଚାସ୍ । ହୁସ୍ ଅଣ୍ଟା ଆଲିବୋନ୍ ବେନ୍ଞେ ରିୟାସ୍ ଆରୁ ଯୋଡେ଼ ହାଦ୍‌ଦୁ ଜନମ୍ ମାନ୍‌ଚା ।

ମୁସାସ୍ ନିଜର୍ ଶଶୁ ର୍ ଘି ଭେଡି଼ ଗୁଠିନ୍ ଏର ହୋ ଜ୍ଜା ଲାସ୍ । ଅଣ୍ଟା ଉଲ୍ଲାନୁ, “ହୁସ୍ ଅଣ୍ଟା ଜାଲର୍ ନା ବାଲା ହୋପ୍ପା ବୋନ୍ ଏରିୟାସ୍ କା ହୁଦ୍ ଭସମ୍ ମା ମାନାଲାଦ୍ ଆରୁ ଜାଲ ରା ଲାଦ । ହୁବୋନ୍ ଏରାଗେ ଲାଗାନ୍ ହୁସ୍ ହୁ ହୋପ୍ପା ଘି ଚାହାନୁ କେରାସ୍ । ବାକେନ୍ ପାରମେଶ୍ୱ ରସ୍ ହୁସ୍ ଘି ଗାନେ କାଥ୍ ଥା କାମଚାସ୍ । ହୁସ୍ ତେଂଗି ୟା ସ୍ ,”ହେ ମୁସା ,ନିଜର୍ ଜୁତା ବୋନ୍ ଖୋଲା । ନିନ୍ ଅଣ୍ଟା ପବିତ୍ର୍ ଆଡ୍‌ଡା ନୁ ଇଜ୍‌କାୟ ଦାଏ ।’’

ପାରମେଶ୍ୱରସ୍ ତେଂଗିୟସ୍, ”ଏନ୍ ନିଜର୍ ଆଲାର୍ ଘି ଦୁଃଖ ବୋନ୍ ଏରକାଦାନ୍। ଏନ୍ ନିଂଗା ନ୍ ଫିରୋନସ୍ ଘି ଚାହାଁନୁ ତାୟନ୍ ତାକି ନିନ୍ ଇସ୍ରାଏଲିରିନ୍ ମିସ୍ରି ସ୍ତିନ୍ ଧାଂଗର୍ ସ୍ତିନ୍ ଅଥ୍ ରୋଏ ବାରୋଏ । ଏନ୍ ହୁବ୍‌ଡ଼ାରିନ୍ କାନାନ୍ ରାଜି ବୋନ୍ ଚୋନ୍,ହୁ ରାଜି ବୋନ୍ ଏନ୍ ଆବ୍ରାହାମ୍ ,ଇସାହାକ୍ ଆରୁ ୟାକୁବ୍ ସିନ ଶପଥ୍ କାମ୍‌କାଚାକାନ୍ ।“

ମୁସାସ୍ ମେଂଚାସ୍ ,”ଆଗାର୍ ଆଲାର୍ ଗୁଠିର୍ ଆହାଗେ ଚାହର ଏଙ୍ଗାନ୍ ନେର୍ ତାଇକା ନାର୍ ବୋର୍ ହାଲେ ଏନ୍ ଏନ୍ଦେର୍ ତେଂଗନ୍ ?” ପାରମେଶ୍ୱରସ୍ ତେଙ୍ଗିୟାସ୍, ଯେ ବାକେନ୍ ଏନ୍ ଆତଲ୍ ଦାନ୍ ତା ଏନ୍ ଆତଲ ଦାନ୍ । ହୁବଡାରିନ୍ ତେଙ୍ଗୟ ଏ,” ଏନ୍ ହୁସ୍ ଏଂଗାନ୍ ନିମ୍‌ହାଁ ଚାହାଁନୁ ତାଇକାଦାସ୍ ।” ହୁବଡାରିନ୍ ଇ ବୋନ୍ ଭି ତେଂକେ ,”ଏନ୍ ନିମ୍‌ହାଁ ପୁରଖାନ୍ତା ଆବ୍ରାହାମ୍, ଇସାହାକ୍ ଆରୁ ୟାକୁବ୍ ଘି ପାରମେଶ୍ୱରସ୍ ୟୋହୋବାନ୍ । ଏଘାଁ ନାମେ ସବୁବାକେନ୍ ଆତ୍‌ଲି ।

ମୁସା ଏଲ୍‌ଚାଲାସ୍ ଆରୁ ଫିରୋନସ୍ ଘି ଚାହାଁ ନୁ କାଲାଗେ ମା ଚାହାଲାସ୍ ଏନ୍ଦେର୍ ଗେ କା ହୁସ୍ ସୋଚାସ୍ ବାନେ କିରୀ ତେଂଗାଗେ ପଲ୍ଲଦାସ୍, ଇ ବାକେନ୍ ପରମେଶ୍ୱରସ୍ ମୁସାସ୍ ଘି ଭାଇସ୍ ହାରୁନ୍ ସିନ୍ ମୋଦେତ୍ କାମାଗେ ତାଇୟାସ୍ ।