Tö uli toto pianoi itö uli

Tö uli toto pianoi i Canaan tö ulina Israel tili töpö lisipasopö tö wakala waloa jötököma. Canaan tö ulina Jerico aitö uli jilo kuawi tö uli jokola totiotasopa polakapi töpönö tö uli möpala monimo tasopö töna Josue nö töpö simönöma. Ai su tönö tö noa koanö wano töpö mamomawi Rahab a jilo kuawi itö ulina a kuoma, ianö itö uli möpala pölati i töpö sosapalama, töpö toka komani ina a kuama. Tiosö na pitilita a pi kunö itö tamama. Israel tili töpönö Jerico tö uli wania solöiaja kamisamakönö kawa, au ai töpö ina kipi makö söpa pasio maikötö Rahab na ina i töpö kuma.

Jordan tu patana töpö pökata paipalonö tö uli toto piale itö ulina Israel tili töpö lisipasopö tö kuoma . Josue naja: “Ipa saia totia palawi i töpönaja pö ju somaalö a kuu.” Tiosö kuma. Jordan tu patana Tiosö saia totiapalawi i töpö juulö kukema matu pata opiköma, itu kolo pata jasiti ipapaja Israel tili töpö pökatöpasoma.

Jordan tu patana i töpö pökatöpasoiaja, pina Jerico tö ulina wa wasu ikuo kua pökö Josue na Tiosö kuma. Sanöma töpönö Tiosö kuiaja tö tama totio jötoma. Inatö tama Tiosö kuiaja tö tama jötonö, Jerico tö uli julu patana töpö sösowi i töpö, Tiosö saia totiapalawi i töpö ina kipi (6) seis wakala töna töpö asoka pi kupasoma.

(7) Siete tö wakalana, itö uli julu patana (7) siete i töpö pi asoka kua noma kopasoma. Töpö asoka kota ma apapö i töpö asokopo ko sisatapaja, sösowi i töpö lalupalo pasia, Tiosö saia totiapalawi i töpönö tola pö jola pasia inatö kuama.

¡Inatö kuanö, Jerico tö uli pata jokolole itö pewö pata kea totisoma! Inatö tama Tiosö kuiaja Israel tili töpönö itö ulina tö pewö kuowi tö pewö wania totilalöma. Rahab, kamani ai töpö ina kipi töpö jia ko sisapalöma, i töpö liki Israel tili töpö i ai töpö kua naipasoma. Israel tili töpönö Jerico tö uli pata waniapalönoi i Canaan tö ulina ai töpö kua naile i töpönö itö jininö Israel tili töpöna töpö kili ipama.

Canaan tö uli pewöna töpö kuowi töpöna pö noia jatoti ina Israel tili töpöna Tiosö kuma. Maike Canaan tö ulina ai töpö kuowi gabaonitas töpö jilo kuawi, Josue naja Canaan tö ulina samakö kua pasia maikötö ina töpö jolisi kuma. Noimowi makö kua pasipalo nökö Josue na i töpö kuma. Tiosö na witiamö ji gaboanitas töpö kua pasia Josue, Israel töpö ina kipi töpö ku paio ma apama. Inatö kuanö auie noimowi makö kupalo nökö i töpöna Josue ku jötösoma.

Gabaonitas töpö monimonoi Israel tili töpönö itö jinia konönö töpö jiso opa koma, maike Tiosö nö tö ta apölata auie töpö ku waikioma kötönö kua pölatakö töpö ku soa pötasoma. Tö pi tatejepasonoiaja, Israel töpöna gabaonitas töpö noimowi töpö kupasonoi i Canaan tö ulina ai töpö kuo naiowi, i amorreos töpö kaikananö itö jininönö kamani sösowi töpö kokapalönö Gabaon töpö namo keoma. Samakö pasilipalöso ina tosokamatö kuwi gabaonitas töpönö Josue na tö simöpalöma.

Inatö kuaiaja Josue nö kamani sösowi töpö kokapalönö gabaonitas töpö kuo tasopamö, mumaia töpö jua jalusolöma. Tö jalu upataja amorreos töpö kuopa töpö walopakö tasonö töpö namo kea sotaköma.

Itö wakalana Israel tili töpö pina Tiosö söso totio opama. Ianö amorreos töpö pi ta monöma totia apa, sateje toti ipi mama kökö asawösö pata keamanö sateje epi amorreos töpö söa totia apa naipali, inatö tamama.

Tö wakala apa soa pailata Israel töpönö amorreos töpö pewö söa totia sotalöpö töna Tiosö nö pila motokö pata opia paimaköma. Itö wakalana Israel töpö pina Tiosö pata sua totisoma.

Tiosö nö i töpö sakömanöiaja itö nojana, Israel tili töpöna töpö wasu ikua nomököpö töna sateje epi ai Canaan töpö kokamo nomoma. Josue, Israel töpö ina kipi töpö wasu ikukönö i töpö pewö söa totia noma kopalöma.

I töpö söso mapasoiaja, Israel ulu töpö i ulu töpö ola pewöna Tiosö nö kamani masitatö uli pewö tota jötaja sotaköma. Inatö kuanö, Tiosö pina kalimai töpö kuo totio nomo kotioma.

Josue patasipö ipö waiki salo, Israel töpö nakalönö töpö pewö kokapamanöma. Inatö kuanö, Sinai tö jiu patana Israel tlili töpöna Tiosö japalonoi itö pewö tama totio opa jaiopö töna i töpöna Josue japaloma. Tiosö na samakö sötapalo jaio sotio kötö, a simowi i samatö tama sotio kötö ina i töpö ku jötoma.