David na Tiosö japalo topamonasonoi itö

Saúl liki Israel tili töpö i kaikanatö kuo somatama. A salöjö öpö, a toita apö ina a kuoma, sanöma töpönö ina a kui a pi ipanoi ina a kuo jötöma. Israel tö ulina Saúl kaikanamo kolo kupotaja a kua topa apama. Maike itö nojana a wanisana apaö, Tiosö kili taö mi ipö ina a kuawi a kua nomöpasoma, inatö kuaiaja Saúl nojana a pi ku toita api a kaikana kua nomöpasopö töna Tiosö nö aitö saia nomöpalöma.

David ai Israel tilitö jisa jilo kuawi Saul nojana a kaikanamo nomopö töna Tiosö nö a saipalöma. David nö oveja kökö totiapalawi a kuoma. Belen aitö uli jilo kuawi tö ulina a kutioma. Ianö kamani jaoani i oveja kökö totiapalatipaja ai öla pata söpali, ai töpa pata söpali a kuama. Tiosö na pitilita David pi ku totio opaö, a noi ipö, a pi ku toita apö, Tiosö kuwi itö tama totiatalo opaö ina a kuawi a kuoma.

David söso lotete epi a kupalonö a kaikanamo sotama. David jisa apö soiaja aia pata pe epö a lape toti ipi Goliat a jilo kuawi a sola töpö sösoma. ¡Goliat pata söso taötotio opaö a lotete epö 3 metros tö kotöna a öpa ösa wöa totialasa inatö kuoma! Maike Tiosö pina David nö Goliat pata söpalönö Israel tö uli löa konöma. Itö nojana, Israel tili töpö nisi taö öpawi David nö i töpö sönö töpö suamati ma apama, itö pina iana sanöma töpö japalo toita apama.

Sanöma töpönö David pi ipa asale itö pina Saúl jiso opa pasioma. A söpalö piasalo Saúl nö a namo kusu upaiaja David sosaköma. Aitö wakalana, David sosale ia Saúl lisipasoma, maike Saúl nö a tapa ma apama. Saúl kotöna David sosama, a söpalöpö tö topa apama, maike a söpa ma apama. Inatö tama pölanö kunumai, sa kaikanamo nomo pi topa apanö wa söpa maikötö, David ku pi topa apa salo Saúl jaloösö kasö jana pöpalöma.

Inatö kuatipaja, töpö sösopa Saúl söpasoiaja, David liki Israel tili töpö i kaikanatö kua sotasoma. Ia kaikana pi ku toita apö kötönö sanöma töpönö a pi ipama. David kua topa apapö töna Tiosö japaloiaja David nö tö pewö tamawi itö pewö kua topa apatima. Sösopa sateje epi David pi söso kua totio opanö Israel tili töpö nisi taö öpawi Tiosö pina i töpö sö toitioma. David nö Jerusalen tö uli jukölönö kamani mötalötö uli tapalöma. David kaikanamo pöle itaja Israel tö uli lotete epö tö uli pilapalo opaö inatö kuama.

Tiosö na Israel tili töpö japalo topa apaö, Tiosö pina saloa isitamaö ina töpö kuapö töna David nö Tiosö saia ta pi topa apama. Moises nö kokamotawi a saiwai tapalönoi ia saina sanöma töpönö salo kökö isimaö, ia Tiosö na töpö japalo pi monajapalo ina töpö kuatipa 400 inamatö pi kotöjö wöa totipasoma.

Maike David naja Tiosö nö Kama kai wösöwi i Natan simöpalönö: “Kawa liki sösowi wa pasi kötönö kaunö ipa saiwa ta pasio maikötö. Au ulanö a sai ta pasikö piasalo, maike toita api kauna satö totoma totio opa kötö. ¡Au ai ulutö ola liki ipa sanöma töpöna a kaikanamo sotiopö a kupaso piasalo!" Ina a kuma. David ai ulutö ola kaikanamo sotio piale ia liki Tiosö nö a Saipalöwi ia kuo piama. Tiosö nö a saipalöwi ianö jitö uli pewöna sanöma töpö wanisana apawi, wanisana apapa i töpö titio piale itöna i töpö löa konöpö ia kupo piama.

David nö itö pewö jinia toitalönö, Tiosö nö toita api tö tama piale itöjö, David pina toita api tö tama pöle itöjö, itö pewö pina David pi monaja apa salo Tiosö na a japalo toita apama. Tiosö nö itö tama piale David nö itö wakala taimi ipama. Tiosö nö a Saipalöwi 1,000 inama töna Israel tili töpönö ia walo ta toitiopö tö kuoma.

David nö Tiosö kuwi itö tama totiatalo apatinö sateje epi inama tona a kaikanamo topa toitioma, Tiosö nö toita api tö totoma totio opama. Maike, a patasipa totilonö Tiosö nö tö pi mi ipi tö tapalöma.

Aitö wakalana David i töpö sösowi, paja apa tasopamö i töpö söso pasilatitaja, kamani saia osimöna a titikönö atuamö tö möpalöma ai sua toita api a sanömotita a talalöma. Betsabé ia jilo kuama.

A pi motöpoko pölanö kunumai, kama kuopa a jilakösolöpö töna aitö sima sotaköma. Iana a mai saka sotaköma. Tö tatea apa noma kopaso noiaja David na Betsabe nö tosokamatö simöpalönö sa sipönapi ipö a kuma.

Betsabé panopa liki Urías a jilo kuama, ia liki David i töpö söso lotete epi i aia kuo naioma. David nö Urias naka konö, au pusupa na wa noimo ko paionö a mai sakapaloko paioso a kuma. Maike, kamani ai töpö söso opa soa pasilata saiana Urías juko paio wani ipama. Inatö kuaiaja David nö Urias sima kopalönö, sösowi i kaikana tönö tikö töpö lotete epapa a simökönö a söpalöpö töna David simo sotama.

Urías söpalö noiaja David nö Betsabé liki kamani pusupa tapalöma. Tö pi tateja totipasonoiaja ianö David ula tapalöma. David nö tö tamanoi itöna Tiosö jiso totio opama, itö pina David naja wa jiopa totia apa köle ina Tiosö kai wösöwi i Natan ku tasopö töna Tiosö nö a simököma. Tiosö kili taö ma apanoi itö pina David ote tamo koiaja Tiosö nö a ote ta jöta konöma. Itö nojana David nö Tiosö kili taö sotiolöma, jatuka mi ipi tö wakala pölata David nö Tiosö kili taö satia soama.

David nö Tiosö kili taö ma apanoi itö pina kamani ulawai nomasoma. David kamani ai töpö ina kipi töpö söso sotioma, kuataja naiwö David kaikana utitipo naio soaalöma. David nö Tiosö kili taö ma apa puo noia maike, satö tama piasalo Tiosö kunoi itö tama satia apa soama. Tö pi tateja kopaso noiaja David, Betsabé ina kipi töpö ai ulawai kua koköiaja Salomon a jilowai tapalöma.