Jitö uli patana wanisana apawi itö lisipasoma

Tiosö nö jikalia kulena inatö uli kui tö uli takönoi itö ulina Adan nö kamani pusupa kai kukönö, töpö pi mönajapalo toitioma. I töpönö jaloösö jalopo ma apama, maike jitö uli patana wanisanatö mi ipö kötönö, töpö pi kilijita ma apama. Itö ulina töpö jupalotipa Tiosö na töpö japalo soatalo opatima.

Maike ia olökökö pi wani tao opawi a wani kuo naioma. Sua wanina i olökökö wani japalonö: “¿Pitilitö saina kauna Tiosö ki, ji jiti pewöna mo kuowi mo oa jatoti a ku aluke?.” A kuma.

Sua japalo jötonö: “Tiosö ki, jiti pewöna mo kuowi i ma mo oa soa pöatalo opa pökö, maike wanisana tö, toita api tö inatö taöpo kuawi itina mo kuowi i mo oa pasio jatoti, ina kamisamaköna Tiosö ku köpöli. Kamisamaköna Tiosö ki: 'I mo oa jatoti, mo jöpa naio jatoti i matö tama kukema makö nomaso kötö.' Ina a ku köpöli." Ina i sutö ku jötoma.

I su töna olökökö wani japalo kotanö: “¡I pitilitö maikötö! Makö noma maikötö. Tiosö nö, wanisanatö, toita api tö itö pewö taö öpa kua kulena i ma mo oalöma ina i matö pewö taöa kua naia sotaso piale ianö itö taö öpa waikia köle.” Ina olökökö wani kuma.

I su tönö i mo mö kukema mo mumo toita apö, mo oalöma mo oamo toita apapö mo mumo ku toti ipö ina mo kuoma. Ianö itö pewö taöpo pi topa apa salo sami ipi aimo sulönö, mo oalöma. Itö nojana ia kamani panopa öpa naia sotale iana aimo asawösö tota noma sotaköma, ianö i mo oa naia sotalöma.

Inatö kuanö töpö pi jatuka soa pötasoma, töpö sino opi itö talalöma. Töpö jaloköpö töna sanakapö jana tia sotalalöma.

Inatö kuataja i sanömatö, kamani pusupa ina kipi töpönö itö ulina Tiosö ju pöle itö jini ipama. Tiosö na töpö sosapalo sotama. Inatö kuaiaja Tiosö nö i wanotö jilo katea sotanö: “¿Witia wa kua köle?” A kuiaja, Adan ki: “Sa sino opö kötönö, wa ju pöle i satö jininönö sa kilipalo opa ke. Itö pina sa sosakö ke." Ina a ku jötoma.

Iana Tiosö nö tö jininö: “¿Wa sino opö kauna witipila ku ke? ¿Mo oa jatoti sa ku pili i wa mo oalö aluke?” A kuiaja, i wanotö japalo jötonö: “Kamisana su watö totopö pili ianö kamisana i mo totopö ke.” Ina a ku jötoma. Itö nojana i sua na Tiosö nö tö jini nomo sotanö: “¿Kapili watö tama ke?” A kuiaja, sutö japalo jötonö: “Olökökö waninö sa mönamanö ke.” A ku jötoma.

Olökökö wanina Tiosö japalo sotanö: “¡Kauna pe epi wanisanatö kua toitio piasalo! Kama wa nipönö wa joleanö, masita watö kopeke oa sotio piasalo. Kawa, sutö ina kipi makö nisi tapaso toitio piasalo, au ulu töpö, i sua wani ulu töpö ina kipi töpö nisi tapaso naio sotio piasalo. I sua ai ulu tö olanö wa je patikipalöiaja, kaunö i wa amösö tisana ninia jötömakö piasalo.” Ina a ku sotama.

Itö nojana, suana Tiosö japalo nomo sotanö: “Au ulu wa taiaja wa ninimo totio opapö satö tapa piaköle. Kawa kotöna au panopa kuapalo sotiopö watö pi ipa piasalo, kauna ia kaikanamo piasalo.” Ina a ku sotama.

Wano töna Tiosö japalonö: "Kaunö sa kuwi i watö jini ma apama, au pusupa kuwi i watö jini sisama. Jukiki masitatö uli wanisana waikipasoma kötönö, lotete epi wa tatapajamo totio opanö masitatö ulina au ni watö tösa totio opa piasalo. Itö nojana, wa nomasoiaja kawa pewö liki masitatö kopeke kua kopaso piasalo.” Ina a kuma. I sua liki sateje toti ipi töpö pupöna kupasopö tö kötönö, i wano tönö, “toi ipi tö totomawi ia” tö kutowi töna "Eva" kamani pusupa jilo ta sotalöma. Tiosö nö salo pö jöösönö Adan, Eva i töpö jaloa sotamaköma.

Inatö kuaiaja Tiosö japalonö: “Jukiki sanöma töpönö wanisana api tö, toita api tö, itö pewö taöpalonö kamakö kulena ina töpö kua naipasoma kötönö, i töpönö ji jitina toi ipa sotiopö mo kule i mo oalöpö satö pi maikötö.” Ina a kuma. Inatö kuanö, jikalia kulena tö uli kui Tiosö nö tö uli totokönoi itö ulina Adan, Eva i töpö atua kopamanöma. Itö ulina aitö lisipalonö jitina toi ipa sotiopö mo kule i mo oa ma apapö töna Tiosö nö töpö simötawi töpö lotete epi töpö lömaköma.