Matu pata okimonö masitatö uli pewö pata patilia totikönoi itö.

Tö tatea totia noma kopaso noiaja, jitö uli patana sateje toti ipi sanöma töpö kuo totio opama. I töpö pi ku wanisana totipaso, töpö waitilia totipaso ina töpö kuama. Töpö wanisana totio opa kötönö Tiosö nö matu pata okimanönö jitö uli pata waniapa pi topa apama.

Maike Noe nö Tiosö pi mönajapalama apatima. A pi ku toita totio opama, sanöma töpö wanisana apawi töpö mötalöna a kuo naitioma. Noe na Tiosö japalo nö, matu pata okimama piale itö wösöma. Noe naja, ai kutiata asö pata pe epi ösö pata tapalö, Tiosö kuma

Noe naja, kutiata asö pata pe epi ösö patana, kolo osö, ola asö töna 140 metros tö wöa, pili ösö osimöna 23 metros tö wöa, 13.5 metros töna ösö jösöka wöa lasa, inatö pewö kulataja ösö tapalö Tiosö kuma. Jiti sinonö Noe nö ösö tapa piama, koma aitö osimö kua köla, itö jösökana aitö osimö söta sota, itö jituna aitö osimö kua, ina 3 ösö osimö kuoma, itö osimö pewöna saia osimöwai kulena inatö osimö kui tö pewö ta jötaja sotaköma, ösö jösöka laki, sami ipi takataka osowai sötömaki, inatö pewö tama piama. I kutiata asö patana Noe, kama töpö pewö, salo pö pewö wani ina kipili, matu pata okimo pöle itaja ösö patana i töpö titia topa asaköpö tö kuoma.

Tiosö kuiaja Noe nö tö tama jötoma. Kamani tres (3) ulu kökö kaina, Tiosö kunoi ina i kutiata pata kui ösö pata ta jötöpalöma. I kutiata pata pe epö kötönö, ösö pata tatipaja sateje epi inamatö jasupasoma. Sanöma töpöna, matu pata okimo piale Noe nö itö wösönö, makö wanisana apawi i matö josalönö Tiosö japalowi itö pewö tama nomo kokö i töpöna ina a kutima, maike pitilita töpö pi kuti ma apama.

Noe, kamani i töpö pewö, i töpönaja pe epi ni matö suanö tö simoma totio opaje i ni töna makö iapalo, salo pö pewö wani iapalo inatö kuapö tönakö, ina Tiosö ku naioma. Itö pewö tama ma totipasoiaja, Noe na Tiosö ki, kutiata asö patana kawa au pusupa, au ulu kökö, kamani pusupö kökö i makö pewö lisipaso pö jitö wakala waikiwö a kuma. Ocho (8) sanöma töpö kuoma.

Salo kökö pewöna Tiosö nö wanotö, sutö, tö sai tamama, matu pata okimoiaja kökö söpo ma apapö töna Noe nö kökö titipa löatalopö töna kökö sima soatalo opama. Sanöma töpö nö salo kökö isitama nö Tiosö na kökö tototapö töna siete (7) salo wano kökö, siete (7) salo su kökö, kökö toita api kökö jakika apölata kökö saipalönö Noe na kökö sima naiköma. I kutiata asöna i töpö pewö titia toitaköiaja, Tiosö nö takataka kolo la sotaköma.

Itö nojana, pe epi matu jölö kolo kua sotasoma. ¡Matu jölö matalo pölata kunumai cuarenta (40) wakalatö kupaso, cuarenta (40) mumimumitö kupaso inatö kuama! Masita töna matu pata japo tikilo naioma. Jitö ulina tö pewö kule matunö itö pewö pata patilia totia apököma, jiima töpö pewö pata lape epi i töpö pewö pata patilio totio opa naioma.

Masitatö uli jasitina tö pewö toi ipi tö pewö kuonoi itö pewö noma totisoma, maike kutiata asö patana sanöma töpö, salo kökö, i töpö titio asanoi ipö pewö noma asa ma apama. Matuna i kutiata asö kalö pöle ösö osimöna töpö pewö titile i töpö nasö tuo asa ma apama.

Matu pewö jölö mapaso noiaja, matuna i kutiata asö pata kalötipa cinco (5) pulipuliana matu wejepo kotiolöma. Inatö kuataja aitö wakalana ai jiima tö jösöka patana i kutiata asö pata makipaköma, maike matunö itö uli pewö pata patilio totio opa soa pasio paioma. Tres (3) pulipulia jasua noma kopalonö jiima töpö jösöka pewö pata tapamo nomo koonöma.

Cuarenta (40) wakalatö jasua kua noma kopaso noiaja, matu weja ko waikia jatopasonoi kötö Noe pi ku upa salo, motosila wani simöpalöma. Ia wani katö jötöpo totio opanö, masita tö uli jasiti tai totio opa koma, maike aitö uli jasiti tapa ma apama.

Tö pi tateja noma kopaso noiaja Noe nö joleta wai sima nomöpalöma. Maike aitö uli jasiti tapa taso ma apama, Noe na awai waloa kokö solöma. ¡Siete (7) wakalatö jasua noma kopaso noiaja Noe nö i joleta wai sima kotalöma, ia wainö kama jiso waina olivo ai jiti jilo kuawi ti poko wai wiilönö a wai waloa kokö solöma! ¡Matu pata wejepo koonöpamö, jiti, sikisikitö, itö pewö jaö topa totio opako soa alöma!

Siete (7) wakala töna Noe opio nomoko paionö, itö nojana tres (3) tö pina joletawai sima kotalöma. Ia i saloa oso wainö aitö uli talalönö awai walo kotasolö ma apama. ¡Matu pata jasitipo totio opa ko waikioolöma!

Polakapi pulipulia jasua noma kopaso noiaja Noe naja: “Jukiki i kutiata patana kawa, au töpö pewö, salo kökö pewö wani, i pö pewö atua kopalo. Kamaki ulu ma töpö taki, i ulu töpönö kamani ulu töpö ola ta tolea noma sotaki ina makö kuanö masitatö uli pewö matija komakö.” Ina Tiosö kuma. I kutiata patana Noe nö kamani i töpö kai pewö atua kopasoma.

Kutiata asö patana Noe atua kupalonö, Tiosö na a pi mönaja apa salo aitö wakalana, salopö isitamapö tö öpamaköma, Tiosö na pi mönaja apa salo, salo kökö isitamapö töna kökö saipalönoi i kököna ai kökö sulönö itöna kökö isimanöma. I salo kökö isimanöwi itöna Tiosö pi mönaja apa salo, Noe, kamani i töpö pewö, i töpöna toita api tö kua sotiopö töna a japalo sotasoma.

Tiosö japalonö: “Sanöma töpönö wanisanatö tamawi itö pina masitatö ulina wanisanatö kuapö töna jukiki sa japalo kota maikötö, sanöma töpö oso wani ipö sotaiaja wanisanatö tama kolo kua soatalo opa pölata maike ma satu okimamanö i satö uli wania kota maikötö.” Ina a kuma.

Ina Tiosö japalo kunoi, sanöma töpönö itö taö öpa sotiopö töna Tiosö nö olökökö si kuatalo taimi ipi jutumösököna tö taköma. Jutumösököna olökökö si kuta sinimo opa lasoiaja Tiosö nö kama kunoi itö taöpo sinimo opa ko piasalo, ina kamani sanöma töpö kua naio sota piasalo.