Satanas waninö Jesus wapama.

Jesus mai omo matasoiaja, Tiosö Koslomopö Osi Ikitipönö pölösa patana a kai jua sotasolöma, iamö a iapalo mi ipi 40 wakala töjö, 40 mumimumi töjö inatö kupasoma. Inatö kuaiaja, Jesus nö wanisanatö tamapö tö pi ipa salo iana Satanas wani walokönö, a wapa pasioma.

Satanas waninö Jesus mönama pi topa apa salo: "Kawa liki Tiosö i Ulu wa salo, ji mama kökö liki pantö tapalö, wa iapalo pökö." A kuma.

Jesus japalo jötonö: "SANÖMA TÖPÖ KUOPÖ TÖNA PANTÖ PI SISA MAIKÖTÖ, TIOSÖ JAPALOWI ITÖNÖ TÖPÖ KUA NAIA SISA, Tiosö wajeta tököna inatö tosokama kua." Ina a kuma.

Itö nojana, Satanas nö kokamotawi ia sai jösöka pata ösa apa lasopa a sua nomölölönö: " 'MAMANA WA AMÖSÖ TIKIMO MA APAPÖ TÖNA, TIOSÖ NÖ KAMANI SIMAWI I TÖPÖ SIMÖPALÖ KÖTÖ.' Inatö tosokama ku köle, kötönö Tiosö i ulu wa salo, a sutukö" A kuma.

Maike Jesus nö tosokamatö kateanö: "Kamani tosokama töna, Tiosö ki: 'KAMAKA I KAIKANA TIOSÖ WAPA PI TOPA JATOTI.' Ina A ku köle." Ina Satanas na a kuma.

Itö nojana, Jesus na Satanas waninö jitö uli pewö pata möma totio opanö: "Wa maiko pewö jitatakönö, kamisana wa japalo toita apa könaja, kauna ji satö uli pewö pata totokö kötö." A ku sotama.

Jesus japalo jötokonö: "¡Satanas, kamisana a ju pasököa kopalo! "AU KAIKANA TIOSÖ SIMOWI I WATÖ TAMA SISANÖ IANA WA JAPALO TOITA SISA PÖKÖ. Ina Kamani sanöma töpöna Tiosö ku köle." Ina a ku sotasoma.

Satanas waninö Jesus mönama pi topa apa köle maike Jesus nö tö tama mi ipaja, Satanas wani jua konasolöma. Inatö kuaiaja Tiosö nö töpö simawi i töpö walokönö a totiapala sotama.