Jesus tatamo kolo kupasonoi itö

Satanas waninö a wapama pöle itö pewö jasumaköiaja, Jesus na Tiosö Kosiomopö Osi Ikitipö titia kokönö Galilea tö ulina a kutionoi iamö a jua konasolöma. Ai töpö ulina Jesus nö tö wapama nomatalo toitioma. Ia kuawi itöna sanöma töpö japalo toita apama.

Nazaret tö ulina a osowai patatinoi iamö Jesus julasolöma. Mota mapowi tö wakalana kokamotawi ia saina a julasolöma, Tiosö kai wösöwi i Isaias nö tö tosokopalönoi i tökö kateapö töna tökö totoköma. Jesus nö i tökö jakopalönö Kamana tö kuawi itö tosokama kateama.

Jesus nö tö katea pöle: "Töpö pepalo opawi i töpöna toita api satö wösö, wanisana tönö töpö osi matiji ipi isa töpö osi pokama koo, tö mö mi ipi isa töpö löa koo, töpö pi jonipowi isa töpö pi mönajapalama, ina sa kuapö töna Tiosö nö kama Kosomopö Osi Ikitipö totopöma. Tiosö pata toita apö kötönö makö pasiliapalapö jitö inama." Ina itö kuma.

Itö nojana, Jesus loako sotaköma. Sanöma töpönö a mö totio opama. A Saipalöwi iana itö ku köle i töpö pi ku tao opa waikioma. Jesus ki: Juki ipi tosokama satö katipale jukiki itö kupo waikia köle." Ina a kuma. I töpö pi ku monö öpama. "¿Ji Jose i ula wani pasi maikötö?" Ina töpö kupalo opama.

Inatö kuaiaja: "Aitö ulina Tiosö kai wösöwi a kupasonoi ia töpö kuowi i töpönö ia pi mi ipi i pitilita. Tiosö kai wösöwi i Elias kuonoi itaja Israel tö ulina su töpö panopa nomapoma sateje epi töpö su kuo opama. Maike tres inamana 5 pulipulia kulata matu jölö ma apanoi itaja Israel tö ulina ai sutö panopa nomasoma a pasilipalöpö töna Tiosö nö Elias sima ma apama, ai tiko tö ulina ai sutö kuowi ana a sima sisapalöma" Ina Jesus kuma

Jesus japalo soalanö: "Tiosö kai wösöwi i Eliseo kuonoi itaja Israel tö ulina sateje epi sanöma töpö jöösöna kamakalitö kulata töpö kuo opama. Maike Eliseo nö ia aitö löako ma apama. Ianö Naaman, Israel töpö nisi taö öpawi i töpö kaikana, ia jöösö kamakali ipi itö löako sisalöma" Ina a kuma. A jini pöle i judio töpö kuoma. Inatö kua kötönö ina a kuiaja, töpö pi jisujapalo opama.

Tiosö na japalowi ia sai pasököo tasopaja Nazaret tili töpönö Jesus jilula kai juulöpaja ösöösö töna a kemakönö a söpa piama. Maike sanöma töpö mötalöna Jesus jasuakokönö Nazaret tö uli tako kölönö tikiamö a jua konasolöma.

Inatö kuanö, Galilea tö uli pewöna Jesus jasumo koonöma, iana sateje epi sanöma töpö walo totio opama. Sateje epi kamakali töpö kai walowalomo totio opama, tö mö mi ipö, töpö ju mi ipö, tö jini mi ipö, töpö japalo mi ipö, ina töpö kui töpö jakiko totio opama, Jesus nö i töpö pewö löa koma.

Sateje epi sanöma töpö osimöna sai töpö titiowi Jesus na töpö kai walo naioma. Jesus nö saipö wani sasuko kukema pö wani atupo jaiatalo opa koma, ai pö wani atupoko pialanö: "¡Kawa liki Tiosö pata i uluwa!" Ina pö wani kutoma. Sanöma töpö pi kilijo opanö Tiosö na töpö japalo toita apama.

Inatö kuanö, Jesus nö doce (12) wano töpö saia tapalöma i töpö liki Jesus na töpö wapowi i töpö kupasoma. Jesus na i wapowi i töpö nokapalo naitiopaja Jesus kuawi itö pewö taöpasoma.