Samaritano tilitö pi ku toita apanoi itö

Aitö wakalana, judio töpöna Tiosö simonoi itö taö öpawi anö Jesus wapa piasalo: "Wapamawi ia, ¿Sa toi ipa sotiopö töna i kapili satö tama piasalo?" Ina a kuiaja: "¿Tiosö simowi wina itö tosokama ku köle?" Ina Jesus kuma.

Tiosö simowi itö tosokama naja: "KAWA KOSOMOPÖ OSI, PILIWA JIASI, WA LOTETE EPI ITÖ, PILIWA JE OSI, ITÖ PEWÖNÖ AU TIOSÖ WA PI IPA PÖKÖ. KAMA WA PIMO KUAWINA INA AU AI WATÖ PI KUA NAIO PÖKÖ." Inatö ku köle Tiosö simowi itö taö öpawi ia kuiaja: "¡Watö taö öpa waikia köle! I watö tama kukema wa toi ipa sotio piasalo." Ina Jesus ku jötoma.

Maike Jesus na i kama pi jolisi ku toita api itö möma pi topa apa salo: "¿I witipila liki ipa aitö jötöwö?" A kuma.

Sutu upa tö kuanoi iana Jesus nö tö wösö sotama. "Jerusalen tö ulina ai judio tilitö kuowi Jerico tö ulina a jama julasolöma."

"Ia jama juulöpamö ai oka töpönö a namo keköma. A sö totio opapaja a mai söa totipalönö kamani matijitö pewö sulöma. Itö nojana töpö jua ko sotalöma."

"Itö pi tatejepaso noiaja, Tiosö saia totipalawi itisona ia ju tasoma. Ianö i sanomatö nini pale ia talalönö, a ju janoa sotaköma, a pasilipalöpö tö pi totile ia möa soa pötalönö, a jasua pököma."

"Tö pi tatejeto kotataja, itisona ai levita tilitö waloa nomötaköma. (Levita tili töpönö Tiosö saia totiapalawi i töpö pasilipalawi i töpö kuo pasioma.) Aitö masina i levita tilitö janoa naia sotakönö, a nini pale ia möa naia soa pötalölöma."

"Itisona ai sanömatö jaso nomötale i samaritano tilitö kuo pasioma. (Tiko tö ulina töpö kuowi töpönö judio töpö suanö kamani ulu töpö tanoi i töpö ola liki samaritano töpö kuo pasioma. Samaritano töpö, judio töpö, i töpö nisi tapaso opa pasiowi töpö kuoma.) Maike i samaritano tilitönö i judio tilitö talalönö a ote ta sotalöma. Inatö kuanö, a nini ipi itö löa konönö a totiapala sotama."

"Itö nojana i samaritano tilitönö kamani saloa burro jösökana ia loa sotamaköma, ai saia kuotasopamö a kai jua sotalolönö ia a totiapalati tasoma."

"Itö janata, i samaritano tilitö juko sota piaalöma. Inatö kuaiaja ia saina a mamo löapalowi iana ai sitipa totokönö: 'Ji wa wani totiapala jaio pökö, maike au sitipa wa jötöta nailö könaja sa jaso kotaiaja au satö noa koa komakö kötö' Ina a kuma." Itö pewö wöa toitaköma.

Inatö kuanö, Tiosö simowi itö pewö taö öpawi ia naja: "¿Wina wa pi ku köle? ¿Ji wanotö sönoi iana i tres wano töpö jasonoi, ia, witipila liki kama aitö kuo asama?" Ina Jesus kuiaja: "Wano tönö a ote ta asalönoi ia wani ki." Ina ia ku jötoma. Ia naja: "Wa jupa itö tama naio." Ina Jesus kuma.