Jisatö pilapalo opawi a

Aitö wakalana, jisatö pilapalo opawi ianö Tiosö simowi itö taö öpawi Jesus naja: "Wapamawi a toita api ia, ¿Sa toi ipa sotiopö töna kapili satö tama piasalo?" A kuma. Jesus ki: "¿Kapilitö pina kamisana 'toita api ia' wa ku köle? A toita api sami ipi Tiosö kua sisa. Maike wa toi ipa sotiopö watö pi ipa könaja Tiosö simowi tö tosokama kule itö tama totio." Ina A kuma.

"¿I kapili satö sai tama jöto piasalo?" Ina kuiaja: "Aitö söpa jatoti. Ai tikotö pusupana a mamo jatoti. A tomömo jatoti. A jolisimo jatoti. Au jaoani, au naoani ina kipi wa töpö kili taö totiatalo opa pökö. Kama wa pimo kua kuawina ina tiko wa töpö pi kua sota pökö." Ina Jesus ku jötoma.

Mike: "Ulu sa soiaja i satö pewö tama sota köpili. ¿Sa toi ipa sotiopö töna kapili satö tama satea soa piasalo?" Ina a kuiaja, Jesus nö a mö sotanö a pi ipama.

Ianaja: " Wa totipo satea pi topa apa salo, au matijitö pewö kule i watö noa tapamanönö pepalo opawi töpöna i sitipa wa tota jötöjökö könaja, jutumösököna wa pilapalo opako laso piasalo. Itö nojana kamisana wa nokapalo sota pökö." Ina Jesus kuma.

Jesus ku pöle itö jininönö, i jisatö pilapalo opawi a kötönö kamani matijitö pewö josa wani ipö salo a pi jonipo opama. A nomöja kopalonö a jua pasököa konasolöma.

Inatö kuaiaja, kamani wapamawi i töpönaja: "¡Tiosö kaikanamowi, ia töpö pilapalo opawi i töpö lisipasopö tö jatuka pasio mi ipö! Awai, makosatö kaika waina saloa Camello wani lisipasopö tö jatuka apa asalö kötö maike Tiosö kaikanamowi ia a pilapalo opawi a lisipasopö tö jatuka pasio mi ipö." Ina Jesus kuma.

Töpö wapamawi i töpönö itö jininönö töpö pi kilijipalonö: "Inatö kua köle manukule, ¿Witipila nö löa asa kopaso piasalo?" Ina töpö kuma.

Töpö wapamawi Jesus nö i töpö mö sotanö: "Sanöma töpöna itö jatuka pasia maikötö, maike Tiosö na itö pewö jatuka apa asa." Ina a ku sotama.

Jesus naja: "Kamisamakö i samatö pewö ta totikölönö kauna samakö nokapaloti köle. ¿Itö pina kamisamaköna i kapili watö toto jöto piasalo?" Ina Pedro kuma.

Inatö kuaiaja: "Aiwanö au saia, au ai töpö, au pasi töpö, au jaoani, au naoani, au matijitö pewö, kamisa pina i watö pewö ta totikölönoi, i wanö pe epi 100 tö jasujulata au watö tapa totioko piasalo, wa toi ipa sotiopö tö toto naio piasalo. Maike sateje epi töpö palule i töpö noja kopaso piasalo, töpö noja pasionoi i töpö palua kopaso piasalo." Ina Jesus kuma.