A simawi anö tö ote taö ma apanoi itö

Aitö wakalana, Jesus na Pedro ki: "Wapamawi ia, ¿Kamisana ipa aitö jiopa apaiaja wina kipili sa ote pi wani ta tapalö piasalo? ¿7 ki? Ina a kuiaja: "Ma, 7 kunumai, ¡70 töna, 7 tö pi ösöjölata!" Ina Jesus kuma. Matö ote taö koatalo opatipö töna Jesus ku puoma. Inatö kuanö Jesus nö itö wösö sotama.

Jesus ki: "Ai kaikana tönö kamani simawi i töpöna sitipa noa koako pianoi itö kua kuawina ina Tiosö kaikanamowi itö kua kötö. 200,000 inama töna tatamo toitionö sitipa sua ösöjötawi, inatö kui kamani ai tatamowi ana ianö kamani sitipa noa koa konöpö tö kuoma.

"tö noa komaköpö tö mi ipaja: 'Noami ipi töpö tatamotipö töna i wano töjö, kamani ai töpö ina kipi töpö noa tapamanönö ipatö noa tota kopa.' Ina kaikanatö kuma."

"Kaikanatö mönakö kuopa ia maiko jitata sotakönö: 'Kaikana wa opio paio mi ipö salo, au satö noa koa toitamakö kötö.' Ina a kuiaja, kaikana tönö a ote taö öpa salo, pöla tö noa koama jatoti a kunö a sima kopalöma."

"Maike kaikana töna a ju pasöka kopasoma, 4 pulipuliana tatamonö sitipa sua ösöjötawi inatö kui kamani ai tatamowi tilitöna kamani sitipa noa koa konöpö tö kule ia talalöma. A jua sotakönö: '¡ipa sitipa tota kopa!' A ku sotama."

"I tatao tilitö maiko jitata sotakönö: 'Wa opio paio mi ipö salo, au satö noa koa komakö kötö.' Ina a kuma. Maike, kamani itö pewö noa koa komaköiaja a pöka jakoa kopalöpö töna a pöka kasöa sotamaköma."

"Ai tatao tili töpönö itö tanö töpö pi jonipo opama. Kaikana töna töpö julolönö itö pewö wököma."

"Kaikana tönö ia nakalönö: '¡Wa jiopa apawö! Kamisana wa ote tamoiaja wa ote ta asa konö ke. Ina wa kua naio jöto ma apama.' Itöna kaikana pi jisuja apa salo ia pöka kasökönö tö noa koama kopö töna a pöka kasömaköma"

Inatö kuanö: "Pili makö kosiomopö osinö kamaka ai matö ote tako ma apa kukema ina ipa Jaoani patanö makö tama naio piasalo." Ina Jesus ku sotama