Jesus nö 5.000 sanöma töpö iapalamanoi itö

Tiko töpö ulina kamani wapamawi i töpönö tö wösö, tö wapama ina töpö kuapö töna Jesús nö töpö simönöma. Jesus na töpö waloa kokönö, tö pewö tama tasonoi itö pewö wösöko solöma. Itö nojana, kosota oki pökatö patana Jesús nö kamani i töpö kai möta mapotaso piama. Inatö kuanö kutiatana töpö titikönö ituna töpö pökatöpasolöma.

Maike Jesús nö kutiatana kamani i töpö kai titipalo pöle, sateje epi sanöma töpönö itö talalöma. I matu kasöna sanöma töpö löla asokopalolönö pökatamö töpö waloa somakö lasoma. Inatö kuanö Jesús nö kamani i töpö kai walotaja sateje epi sanöma töpö mamo löo totio opa löo waikioma.

Su töpö, ulu töpö ina kipi töpö katea pasio maiaja, 5.000 wano töpö kuoma. Sanöma töpöna Jesús pi jonipo opama. Ji sanöma töpö liki oveja kökö totiapalawi i kama mi ipö kulena ina i töpö kuama. Inatö kuaiaja, Ianö töpö wapama, töpö kamakali löa koo ina a kuama.

Itö wisatina, Jesús naja: "Tö wisia apa waikiataja aitö uli kua jöka ma apa köle. Sanöma töpö jua kononönö töpö iapalopö tö tai kopö töna töpö sima kopalö" Ina kamani wapamawi i töpö kuma.

Maike kamani wapamawi i töpö naja: "¡Kamakanö töpö iapalama sota!" Ina Jesus ku puoiaja: "¿Wina i samatö tama kua pasio piasalo? Kamaka 5 pan töjö, polakapi salaka kökö inatö kua pöta köle" Ina töpö ku jötoma.

50 sanöma töpö saitanö sikisiki töna töpö loa sokamapö töna, Jesús nö kamani wapamawi i töpö simama.

Itö nojana, Jesús nö 5 pan töpö, polakapi salaka kökö tö sulönö, jituamö tö mö sotanö i nitö pina Tiosö na topaköle a ku sotama.

Inatö kuanö, Jesús nö pan töjö, salaka inatö pewö nakasia sotalalöma. Kamani wapamawi i töpönö sanöma töpöna tö totoma salekeapö töna tö pewö tota sotaköma. ¡I töpönö nitö totoma jötöpo toitia köle maike tö mapo ma apama! Sanöma töpö pewö pöta totisoma.

¡Itö nojana, sanöma töpönö tö jia konanönoi itö kua apa kötönö, töpö wapamawi i töpönö itö pewö toa jötöja konanöma, 12 wö kökö kua kopasoma! 5 pan töpö, polakapi salaka kökö ina kipi töna i nitö pewö kuoma.