Matu jösökana Jesús junoi itö

Kamani wapamawi i töpöna Jesús ki, kutiatana pö pi pökatöpo pasio koonö, ji sanöma sa töpö simöpa pasio ko jaio paio piaköle a kuma. Jesús nö sanöma töpö simakopalönö, ai jiima töna Tiosö na a japalomo julasolöma. Jesús sami ipö kötönö, Tiosö na a japalotipa tö mumasoma.

Inatö kua pasilata töpö wapamawi i töpönö tö sakatipa mötalö tuna töpö pi wöpasoma. Pe epi tö ipokomo totia apa kötönö tö saka tomöpoti ma apama.

Tiosö na Jesús japalo mapalonö kamani wapamawi i töpöna a jua jaisolöma. ¡Kutiatasö kuomö kuopa matu jösökana a juulöma!

Jesús talalönö i töpö kilipalo opama, janepolepö tö jato töpö pi ku upama. I töpö kilipalo pöle Jesús nö itö tapa apa salo: "Pö kilipaloti. ¡Kamisa sai!" Ina a kuma.

Inatö kuaiaja, Jesús naja: "Wapamawi ia, kawa sai salo, matu jösökana sa junö kauna sa walokö tasopö tö tama" Ina Pedro kuiaja. "¡Japo!" Jesús ku jötoma.

Kutiatana Pedro itopalonö matu jösökana Jesús kuotasopa a ju sotaalöma . Maike wani ipi a pi jutalolönö, Jesús na a mamo tatea sokapalonö tö mö asoka sotama, polatu pata mö öpa, ipokotö tapa apa ina a kuama.

Inatö kuaiaja, Pedro kilipalo opa kukema matuna a keo komupo olöma. A komönö: "¡Kaikana sa ta kopalö!" Ina a kuiaja, lope epi Jesús walokö tasonö a jösöka kopamanöma. Itö nojana Pedro naja: "Pitilita wa pi ku totio mi ipö, ¿Kapilitö pina wa pi ku tomöpo ma apa ke?" Jesús ku sotasoma.

Kutiatana Pedro, Jesús ina kipi töpö titia kotaköiaja ipokotö pewö mako sotalonö matu pi moti pata kuako sotaköma. Tö aipa apa kölia töpö wapamawi i töpö pi ku totio opama. Jesús na i töpö japalo pi mönajapalo opanö: "Pitilitö saina, kawa liki Tiosö pata i uluwa sai totiwö" Ina töpö kuto totio opama.