Jesús nö ai sanömatö osina saitö titiowi a löa koni, ai sutö kamakali ipi a löa koni inatö tamanoi itö

Aitö wakalana, kutiatana Gadara tili töpö kuowi tö ulina Jesús nö kamani wapamawi i töpö kai pökatöpasolöma.

Töpö waloköiaja, sanömatö osina saitö titiowi Jesus na ia löla lököma.

A wani lotete epö kötönö aitönö a juapala ma apama. Söpalasö toto patanö a oka jötököma maike, toto jutipa totio opa koma.

Nomawö töpö patilitawi ia i wanotö kutatima. Wakalatö pewönaja, mumimumitö pewönaja a lalupalo sotioma. Kamani jaloösö tapo mi ipö, mama namo opi tönö kama janömoko sotio ina a kuatima.

Jesús kotöna ia walotakönö a maiko jitata sotaköma. Saitoni naja: "¡Ji wano töna a atua kopalo!" Ina Jesus kuma.

Saitö titile ia lalupalo pölanö: "¿Jesús, jituamö Tiosö pata kulali ia i Ula, kamisana i kapili watö pi köle? ¡Sa wasisama jatoti!" Ina a kuma. Inatö kuaiaja saitoni naja: "¿Wina wa jilo kua?" Jesús kuiaja. "Samakö sateje epö kötönö Legión sa jilo kua" A ku jötoma. (Sateje toti ipi Roma tili töpö sösowi i töpöna "Legión" tö kutoma).

Jesús naja: "¡Tikotö ulina samakö simöpako jatoti!" Ina sai töpö ku jötoma. Ai jimatö kuo jöka apapa kusi kökö sateje pata iapalo toitioma, Inatö kuaiaja, Jesús naja: "¡Ji kusi kököna samakö simökö!" Sai töpö kuiaja: "¡Pö julolö!" Jesús ku sotama.

I wano töna saipö wani atua kopalonö kusi kököna pö wani lisia nomöpasoma. Kusi kökö pewö pata lölapalo sotanö matu kuomö kuopa kökö pata löla sotakönö kökö nasö pata tua sopasoma. Itö pewöna 2.000 kusi kökö pata kuoma.

I kusi kökö totiapala jötonoi i töpönö itö tanö, töpö löla kononönö Jesús nö tö tama pöle itö wösö jötöpo ko tasoma. Sanöma töpö pewö walokö solönö wano töna sai töpö titionoi ia möpala totio opama. Kamani jaloösö ta koni, sanöma tö sai kuawina ina a kua kopaso ina a kuanö a pi moti lo kotioma.

Sanöma töpö kilipalo opa salo Jesús sima koma. Inatö kuaiaja, Jesús jusa kononö, kutiatana a titia kokönö a ju koonö piama. Sai töpö titionoi Jesús na ia nokapalo pi topa apa naia salo a ote tamo totio opama.

Maike ia naja: "Ma, au saiana wa jua kononönö Tiosö nö kauna tö pewö tamaje itö, wa ote ta konia itöjö au ai töpö pewöna i watö wösö ko tasopö satö pi ipa köle" Ina Jesus ku puoma.

I sanömatö jua kononönö Jesús nö iana tö pewö tamanoi itö wösö jötöpo totio opama. Itö jini jötöle i töpö pi kilijo opanö aipa apa kölia töpö ku totio opama.

Jesús pi pökatöa kopasolöma. Ia a waloa koköiaja, sateje epi sanöma töpö ju jösönia totio opanö a jutikia totio opama. Ia ai sutö na iipo toitiopa 12 inamatö kupowi a ju naioma. Sanöma töpönö ajaitö tapowi i töpönö a löa konöpö töna sitipa jötöta totio opama, maike a pala totio opa asa puoma.

Jesús nö sateje epi sanöma töpö kamakali löa kotiowi i ianö itö jini ipa kötönö: "Jesús jalole i sa asö jöpötalia könaja ¡Sa löa naiako sotaso kötö!" Ina a pi ku toitio opama. Inatö kuanö, Jesús nojana a kutakönö kamani jaloösö jöpa sotalöma. ¡Ianö ösö jöpötalöma, iitö wanimo mako sotasoma!

Jesús na lotetetö jalasowi kamanö itö tatalalöma, a nomöja sotalonö: "¿Witipilanö sa jöpa ke?" A kuiaja: "Kawa kotöna sanöma töpö öpaja apökönö wa jutikipo opa, wa jasiama apa inatö kua pasilata ¿Witipilanö sa jöpa ke wa ku pasilikia?" Ina kamani wapamawi i töpö ku pasioma.

Jesús mönaköna i sutö maiko jitata sotaköma. A kili ipa salo a satitimo opama. A löa konasonoi itö wösö jötoma. Ia naja: "Pitilita wa pi ku upawi itönö wa löa konö ke. Wa pi kupalomai a jua kononö" Ina Jesús ku sotama.