Tö tösawi iana tö kuanoi itö

Matu kasöna Jesús nö sateje epi sanöma töpö wapamatima. Sateje toti ipi sanöma töpönö tö jini piasalo töpö waloa totikö solöma kötönö, Jesús kua topakönö tö wösö piasalo ai kutiatana a titiköma. Kutiatana a lokönö sanöma töpö wapamatima.

I töpöna Jesús nö itö wösöma: "Jikalimo tilitönö ai tomotomo pö töamo julasolöma. Mo pöwai sösa jötöpopaja, pilitisona aimo pöwai kea pasiköma, salo kökö katöwi kökönö imo pöwai oa pasilöma"

"Aimo pö pasi liki masitatö umö ma apapa mama kuo opa sisapa imo pöwai kea pasiköma. Lope epi imoko jaö waikitama, maike mo nasikilipö komöpoolö ma apama. Wakejewakeje tönö i tikiwai sopipalonö, tikiwai jasitipasoma."

"Aimo pö liki mösökö tiki öpaja apapa mo pö kea pasiköma. Imo pö pata jötoolöma, maike mösökö tikinö i tiki pewö patilia lököma. Inatö kuanö, mösökö tiki mötalöna itipö pata pasionoi i tikipöna kama mo salolo ma apama"

"Aimo pö liki masitatö uli topa apapa imo pö kea asaköma. Imo pö patalonö 30 ai tikina mo salola kuki, ai tikina 60 mo salola kuki, ai tikina 100 mo salola kuki inatö kuama. ¡Wa sömöka kuowi wanö itö jini totio opa!"

Kamani wapamawi i töpönö itö jini tomöpo ma apama. Inatö kuaiaja Jesús nö tö wösö topa konö: "Tomotomomo liki i Tiosö japalowi itö. Pilitiso liki i sanöma tönö Tiosö japalowi itö jini jöta köle maike tö jini tomöpo mi ipaja sai toninö iana Tiosö japalowi itö josa ko sotalöwi itö."

"Masita töna mama kökö kua apa pasile i sanöma tönö Tiosö japalowi itö jininö a pi mönajapalo totio opawi ia pasiwö. Maike tö jatuka mi ipi itö tapa apa, töpö nasö suapala apa inatö kuaiaja ia liki a pasököa kopasowi itö."

"Masitatö uli mösököpö ipi i sanöma tönö Tiosö japalowi itö jini totio opatiwi ia pasiwö. Maike tö tatepo opaalötaja, pi kupalo opawi töjö, pilapalo opawi töjö, jitö ulina tö tama pi topa apawi töjö, itö pewö pina Tiosö pi ipawi itö ma kopaso. Inatö kuanö a wapo jötötia köle maike itö tamati mi ipö."

"Maike masitatö uli toita apö asawi i sanöma tönö Tiosö japalowi itö jinininö pitilita a pi ku totio opaö, toita api tö tama apaö ina a kuawi ia asawö" Ina Jesus kuma.