Jesús pewö mömo tikopöpasonoi itö

Aitö wakalana, Jesus nö tikiamö 3 kamani wapamawi töpö kai julasolöma, Pedro, Santiago, Juan ina kipi töpö. (Juan a jilo kui i Jesús mai opamanönoi ia maikötö.) Tiosö na töpö japalo piasalo jiima töna töpö julasolöma.

Tiosö na Jesus japalotitaja, pila motoko kulena a juku wakala kua totipaso, jokotö si kulena kamani jaloösö ausi kua totipaso inatö kuama, jitö ulina ai tönö ösö ausi tapa mi ipi, ina ösö ausi ku totio opama.

Inatö kuanö, Moises, Tiosö kai wösöwi i Elias ina kipi töpö tapamonasoma. Sutu totipa jitö ulina ji wano töpö kuo soma waikioma tö kulata jitö kuama. Jerualen tö ulina Jesús söpo piale itöna töpö japalotima.

Jesús na Moises, Elias ina kipi töpö japalo pasilataja: “Samakö ju naile itö topa apa köle. 3 sai samakö ta pi topa apa köle, sami awa sai, sami Moises ia sai, sami Elias ia sai ina.” Ina Jesús na Pedro ku pasioma. Pedro nö tö taimi ipö pölanö maike a ku puoma.

Pedro japalo soa pasilataja, ölasitö wakala api tönö töpö jalopalöma, i ölasitö mötalöna tö japalonö: "Ji ipa Ulu sa pi ipawi ia. Iana sa pi mönaja apa köle. Ia jini totio opaje.” Inatö kuma. 3 i töpö wapamawi i töpö kili totia apa salo töpö kelasoma.

Inatö kuaiaja Jesus nö töpö jöpa konö: “Pö kiliti. Pö joka kopalo.” A kuma. I töpönö tö möpala köle maike sami ipi Jesús öpako sisama.

Jiima töna Jesús nö kamani 3 wapamawi i töpö kai itua kopasoma. Ia i töpönaja: “Jisa tö kuaje aitöna itö wösö paio jatoti. Sa söpaso, sa toia kopaso ina sa kuapö tö jöka apa waikia köle. Itö nojana, matö wösö sisa pökö.” Ina Jesús kuma.