Lázaro nomasoma maike Jesús nö a toia kopamanönoi itö

Aitö wakalana, Jesus nö pe epi Lázaro kamakali ipi itö jininöma. Lázaro, polakapi kamani pasi kökö, Maria, Marta i Jesús noimowi kamani i töpö sai kuoma. Jesús nö itö jininönö: “I kamakali tönö a söpa maikötö, maike Tiosö pata lotete epi itö mömapö itö pasi pötawö.” A kuma. Jesús nö i töpö pi ipama maike polakapi tö wakalana a opioko paioma.

Polakapi tö wakala jasupasoiaja: “Judea tö ulina makö ju kota piakölati.” Kamani wapamawi i töpöna Jesús kuiaja: “Maike, wapamawi ia,” Kamani wapamawi i töpö ku jötonö, “¡Iamö makö ju tasoiaja sanöma töpönö wa söpa pi topa apa köpili! Ina töpö kuaiaja: "Makö noimowi i Lázaro mia kölati, i sa nama ko piakölati." Ina i töpöna Jesús kuma.

Inatö kuaiaja Jesus naja: “Kaikana, Lázaro mia pötia köle manukule a topa kopaso kötö.” Ina kamani wapamawi i töpö kuiaja: “Lázaro nomasoma. Kamisana pitilitaja makö pi ku upapö töna ia sa ma apanoi itöna sa pi mönaja apa köle.” Ina Jesús ku salilia sotasoma.

Lázaro kupasonoi itö ulina Jesús waloköma, 4 wakala töna Lázaro nomasoma tö kuo waikioma. Jesús jutasopa Marta ikua lökönö: “Kaikana, jisa wa kuoma könaja ipa pasia noma ma apanoi kipi. Maike Tiosö na ai watö naka kukema tö tota sotakö kötö, sa pi ku totia apa köle.” Ina a kuma.

Iana Jesus ki: “Toitama kowi i sa, toi ipi i sa. Pitilita kamisana aiwa pi ku upawi wa noma pölata maike wa toia kopaso piasalo. Pitilita kamisana aiwa pi ku upawi i wa noma pasio maikötö ¿Itöna pitilita wa pi ku köle?” Ina Jesús kuiaja. “¡Auie Kaikana! Kawa liki Tiosö Ulu wa, wa Saipalönoi i wa, sa pi ku totia apa köle.” Ina Marta ku jötoma.

Itö nojana, Maria waloa nomötakö solöma. Jesús amösö öpapa a kea sotakönö: “Kaikana, jisa wa kuoma könaja ipa pasia noma ma apa noi kipi.” Ina a kuma. Jesús nö tö jininö: “¿Witia Lázaro ma taköma?” A kuiaja: “Nomawö tö patilitawi iakö. Wa ju kösölönö tö möso.” I töpö ku sotama. Inatö kuaiaja Jesús ököma.

A noma titile i mama kaika kuoma i taka kolona mama pata la löoma. Ia Jesús walokönö: “I mama jakoa kopalö.” A kuma. Maike: “4 kawala töna a nomasoma tö kua waikia köle. A jötani ipö waiki kötö.” Ina Marta ku löoma.

Jesús japalo jötonö: “¿Pitilita kamisana wa pi ku upa könaja Tiosö lotete epi i watö mö totio opa kötö, ina kauna sa ku ma apa aluke?” Ina a kuiaja i töpönö mama pata jasia kopalöma.

Inatö kuanö, Jesús nö jutumösökö mö sotanö: “Japa kaunö sa jini pöle itö toita apö. Kaunö sa jini sotiowi i satö taö öpa waikia köle, maike kaunö sa simöpalönoi itöna pitilitaja ji sanöma töpö pewö pi kupö töna sa ku pöa köle.” Ina a kutalonö: “¡Lázaro, a atua kopalo!" Ina a ku sotama.

¡Lázaro atua kopasoma! Jaloösö asawösönö a oka asoko totio soama. Jesús japalonö: “¡A oka asokole i toto kusa kopalönö a jula kopalö!" I töpöna ina a ku sotasoma. Itö aipa apa pöle itö pina pitilita Jesús na ai Judio tili töpö pi ku totilasoma.

Maike, sateje epi sanöma töpönö Jesus pi ipa asale itöna, judio töpö kaiakananö Tiosö japalowi itö wapamawi i töpö pi jiso totia apa salo, Jesús, Lázaro ina kipi töpö söpalöpö töna töpö pi kupalo opama.