Jesus tamapö tö saipalö piasalo a sulölönoi itö

Tö mumi tateo opa waikioma. Jesus na Tiosö saia totiapalawi ia kaikana japalopö töna löapalawi i töpönö iawani saiana a kai jua sotasolöma. I töpö nojana pi pasökö ipi Pedro ju nojapalo jaioma. Saia osimöna Jesus kai lisipasolöiaja, koataka kasöna atua Pedro pumo jia pasipasoma.

Judio töpö kaikananö Jesus tamapö töna, saia osimöna tö saipa piama. Sanöma töpö wöo jolisimo opawi, i töpönö töpö taipalöma, i töpönö Jesus kuawi tö jolisi wösö nomatalo jötoma. Maike, i töpönö tikotö wösö nomatalo opa puoma, inatö kua kötönö judio töpö kaikananö Jesus tamapö tö jatuko ma apama. Jesus jatolo pasio ma apama.

Itö pewö nojana, Tiosö saia totiapalawi a kaikananö Jesus möa salilia sotalönö: "¿Tiosö pata toi ipi ia pata i uluwa, wa saipalöma wa? Kamisamaköna itö wösö." Ina a kuma.

"Kamisa sai, kamakanö Tiosö kotöna sa lole i matö tapaö, jutömösökö patana sa itipoiaja matö tapaö ina makö kua piasalo." Ina Jesus ku jötoma. Tiosö saia totiapalawi ia kaikana jiso toia apa salo kamani jaloösö kakapalönö, Tiosö simowi itö wapamawi i töpö naja: "¡Aitö wöo kotapö tö pimo ma apöle!" Tiosö i Ulu sa kama sai kuiaja matö jinia waikilö ke. ¿Wina makö pi ku köle?" Ina a kuma.

"¡Kama waninö tö taia pasipalöma a wani söpalö!" Ina Tiosö simonoi itö wapamawi i töpö pewö kupalo sotama. Inatö kuanö, i töpönö Jesus mamo sosa sotamakönö, a nakija sotamani, a sö sota, ina a tamanö iana töpö ikiapalo totio opama.

Atua Pedro opia jaia soa pasilataja, i töpöna ai sutö nokapalo naiowi anö a talalönö: "¡Jesus kaina kawa ju naio köpili! Ina a kuiaja, jolisi Pedro ku puoma. Pi tatejepaso noiaja, ina ai sutö ku kotaiaja, jolisi Pedro ku kotasoma. Itö nojana kotawö: "Polakapi makö liki Galilea tili makö kötönö Jesus na wa nokapalonoi i samatö taö öpa waikia köle." Ina ai töpö kupalo opa nomoma.

Inatö kuaiaja, pitilitö saina sa ku köle Pedro kunö: "¡Ji sa wani mö taö öpa könaja kamisana Tiosö nö wanisanatö tama totio opa pökö!" Ina a ku sotama. Itö nojana sotawö ai kalaka wani koma sotasoma, ia Jesus nomöjöpalonö Pedro möa sotalöma.

Pedro jua kononönö kama nisi tamo sapamo konö a ököpalo totio opama. Inatö kuataja, judio töpö kaikananö Jesus söpa piale i Judas nö a namo simökönoi ianö itö tapa apama. Itöna Judas pi jonipo opa salo tikiamö a julolönö kama söa pasia kopaso tasoma.

Itö janata janasaita, judio töpö kaikananö romano tilitö kaikana Pilato na Jesus kai julasolöma. Wa jiopa apama Jesus na ina Pilato kunö a wani söpalö pökö ina i töpö pi ku upama. Jesus naja: "¿Kawa liki judio töpö i kaikana wa?" Pilato kuma.

Jesus ki: "I wa ku waikia köle, maike masitatö ulina sa kaikanamowi sa pasi maikötö. Inatö kua könaja kamisa pina ipa sa töpö simawi i töpö söso waikilapi. Pitilitö saina Tiosö kuwi i satö wösöpö töna ji masitatö ulina sa juma. Pitilitö sai pi ipawi i töpönö sa jiniwi sa." Ina a ku jötoiaja: "kapilitö liki i pitilitö pasiwö?" ina Pilato kuma.

Jesus na a japalo mapalonö, sanöma töpöna Pilato japalo nomo sotanö: "Ji wanotö wanisanawi satö tapa ma apöle." Ina a kuma. Maike: "¡Jitina a wani saumakö!" Ina Tiosö simowi itö wapamawi i töpö kaina sateje epi sanöma töpö komö kuto puoma. "Ai wanisanatö ma apöle." Pilato ku jöto kotama. Maike i töpö komöto satia apa asa puoma. Inatö kuaiaja: "¡Ai wanisanatö ma apöle!" Tres tö pina Pilato ku jöto kotasoma.

Sanöma töpö pewö kokamo totisopö töna Pilato kili ipa waikitama, itö pina kama löapalawi i töpönö jitina Jesus saumaköpö töna a namo sima sotaköma. Roma tili töpö löapalawi i töpönö Jesus soa totilali, kaikanatö jaloösö jaloa sotamaki, pila jena kaikana tönö tö tapowi mösökötö sinonö inisimötö tapalönö Ia jena tö ta naia sotaki ina töpö kuama. Itö nojana: "¡Pike, judio töpö i kaikanatö!" Ina töpö kutinö töpö ikiapalo totio nomotioma.