Jitina Jesus saumakönoi itö

Jesus na töpö ikiapalo mapalonö, jitina a saumakö tasopö töna a sua nomö lölöma. Jitina a saukönö a noma piale i kamana iti maua sotamaköma.

Löapalawi i töpönö "Calavera" tö uli jilo kuawi ia jitina pila amösöna tö satimaki, a amösökö satimaki inatö tamama. Maike: "Japa, i töpö ote talö tö taimi ipö kötönö itö tama pöa köle." Ina Jesus ku sisama. Ai jiti patetena "Judio töpö i Kaikanatö" inatö tosokama kulatö Jesus jösökana tö pi saumaköpö töna Pilato simoma.

A sua asasowi ianö Jesus jalonoi ösö sulöpö töna ai sapökowi toina löapalawi i töpö sapökoma. I töpö sapökonö: "I töpönö ipa jaloösö salekelalöma, ipa jaloösö pina töpö sapökoma" Ina sutu upa tö ku waikionoi itö kua totio opa jötoma.

Polakapi oka töpö mötalöna Jesus saumaköma. Jesus na aia pi wani wasöa pasioma, maike aia wani ki: "¿Tiosö na wa kili pasio mi ipö kia? Makö jiopa apawi makö pasiwö maike jianö wanisanatö tama pasio ma apama." Ina a wani kunö, Jesus naja: "Wa kaikanamo kopa kaunö sa taö öpa naiopö satö pi ipa köle." Ina a ku sotama. Inatö kuaiaja: "Juki ipi, kamisa kaina topa apapa wa kuo naioko sota piaköle." Iana ina Jesus ku sotama.

Judio töpö kaikana, sanöma töpö pewö, Jesus na töpö pi wasöa totio opanö: "¡Tiosö i Ulu wa salo i jitina wa itua kopalonö Kama nö löa kopalo! Ina wa kua könaja, pitilita kauna samakö pi ku sisa piasalo." Ina töpö kutoma.

Inatö kuanö, mötala tö motoko wöa soa köle maike itö uli pewö muma totiköma. Tres tö motokona tö muma toitioma.

Inatö kuanö: "¡Tö pewö ma waikipaso ke! Japa, kaunö Sa janepolepö ta konö." ina Jesus komö kuma. Itö nojana a je wöla sotakönö A janepolepö ikua koköma. Ia nomasoiaja, tö uli pata kalipalolasi, kokamotawi ia sai osimö patana jaloösö pata sawowi ösönö Tiosö kuta pasiowi itö osimö lapo pasile, ösö mötalö pata kakatotipasi, inatö kuama, koma tö kakapalonö ösamö tö kakama wöo totio lasoma.

Jesus nomalonö Tiosö na sanöma töpö walopö töna pilitiso jakopalöma. Löapalawi Jesus na ia mamo löapalo pasile ianö tö pewö kua pöle itö pewö tapala totio opanö: "Pitilitö saina, ji wano tönö ai wanisanatö tama ma apama. Ia liki Tiosö i ula sai kuo totio opama." Ina a kuma.

Inatö kuanö, Jesus Saipalöma polakapi judio töpö kaikana pi ku upawi i Jose, Nicodemo ina kipi töpönö Pilato na Jesus noma naka konöma. I töpönö jaloösönö a pewö jalopalönö mama kaikana a titiköma. I töpönö i takana mama pata la sotaköma.