Tiosö nö Jesus toia kopamanönoi itö

I töpönö Jesus saua waikimakö noiaja, pitilita judio töpö kaikana pi ku pasio mi ipi, i töpö ki: "I Jesus wani ki tres wakala töna sa toia kopaso piasalo ina a jolisi wani ku köpili. Kamani wapamawi i töpönö a noma wani toma konönö a toia kopasoma pö jolisi wani ku ma apapö töna a patilile ia aitö mamo löapalopö samatö pi ipa köle." Ina Pilato na töpö kuma.

Pilato ki: "Ai ma töpö lömakönö pö kua pasio." Ina a ku jötoma. Inatö kuanö aitönö a noma toma ma apapö töna, i takana mama la aköka topa totimakönö löapalawi töpö löa naia sotamaköma.

Jesus noma titikönoi itö janata mota mapowi tö wakala kuoma, itö wakalana nomawötö titiopa ai judio tö ju paiopö tö pi mi ipi tö kuoma. Inatö kuaiaja mota mapowi itö wakala jasumakönö aitö janata janasaita, Jesus nomana taputapu tu jisamo toita api tu juluka koköpö töna ai su töpö jusupalo janama.

Ia tö uli pata kalipalo soa pötasoma. Tö samisamimoiaja tö wakala kua kuawina ina Tiosö nö a simötawi ia kui jutumösököna a kuowi a tapamo soa pötasoma. Ianö mama kaika lale itö jakoa kopalönö i ma jösökana a loa sotaköma. Ia töpö mamo löapalo pöle kilikili tönö masita töna i töpö nomaso kuawina ina töpö kupalonö töpö kelasoma.

Noma patilitawi ia i su töpö waloköiaja: "pö kilipaloti. Jisa Jesus ma apöle. ¡Ina Sa kua piasalo a ku waikioma kötönö, A toia kopaso ke! Makö lisipalonö tö mö." Ina Tiosö nö a simötawi ia ku löoma. I su töpö lisia jötöpalonö Jesus noma pakönoi ia tö mö sotama. ¡Ia A noma pa ma apama!

Itö nojana i su töpönaja: "Makö juakononönö, töpö wapamawi i töpöna 'Jesus toia kopasoke, Galilea tö ulina makö ju paita maiaja a ju soma piakömati' Ina pö ku kotö." Ina Tiosö nö a simötawi ia kuma.

I su töpö pi mönaja apa, töpö kili ipa ina töpö kuama. I su töpönö wapamawi i töpöna itö toita api itö wöamo lölako sotaköma.

I su töpönö wapamawi i töpöna itö wösömo ju koonöpa, i töpö suna Jesus tapamonasoma, inatö kuaiaja ia amösö öpapa i töpö maiko jitata sotaköma. I töpö su naja: "Pö kiliti. Makö julolönö ipa wapamawi i töpöna Galilea tö ulina pö julolo pö kutakö tö. I töpönö iamö sa mö taso pökö." Ina Jesus kuma.