Jutumösököna Jesus Jua konasolönoi itö

Jesus toia kopasonoi itö wakalana, aitö ulina polakapi Jesus nö töpö wapamawi i töpö jutiilöma. töpö juulö pölanö Jesus na tö pewö kuanoi itöna töpö Japalotima. Ia Saipalönoi ia i töpö pi ku upama, maike, ¿A söa pasipalönoiaja wina töpö pi ku satea soa pasio piasalo? Kuataja, A toia kopasoma su töpö ku naia koa, inatö kuama. Pitilita töpö pi ku tomöpo ma apama.

I töpöna Jesus ju jöka naipalonö i töpö kaina a ju naiolöma, maike ia jatowö i töpö pi ku ma apama. I töpönaja kapili töna makö japaloti köle a kuiaja, i töpö ki, nojatö wakala pewö jasupasonoi itaja Jesus kaina toita api tö kuatinoi itöna samakö japaloti köle ina töpö ku jötoma. Tikotö ulina a kuowi anö Jerusalen tö ulina tö kuanoi itö taimi ipi ana samakö japalo jatoa alukule töpö pi ku upama.

Inatö kuaiaja Tiosö tosokama töna a Saipalöwi iana tö kuawi tö kule Jesus nö itö wösö sotama. A Saipalöwi ia wasisama totio opanö a söpalö piasalo, maike tres tö wakalana a toia kopaso piasalo ina Tiosö kai wösöwi i töpö kunoi, ianö i töpöna itö taöa kopamanöma. Itö ulina makö mio pökö töpö kunoi ia töpö walopataja, tö muma pia waikioma.

Polakapi i töpö kotöna Jesus kua naia paiköpö töna töpö japaloma, ia a kua naia jöta paiköma. Töpö iapalo piasalo töpö pewö loa topaköiaja, Jesus nö pan tö sulönö, Tiosö na topa köle a kutalonö tö jusitia sotalalöma. Inatö kuaiaja, töpö pi taoa kononö ji Jesus kowö töpö ku sotama. Maike iakö sotawö, i töpöna a mota ko sotaköma.

"¡Ji Jesus kuo ke! ¡Itö pina Ianö Tiosö tosokamatö wösöiaja makö kosiomopö sopi jaö öpa ke!" Ina polakapi i wano töpö kupaloma. Lope epi Jerusalen tö ulina i töpö juako sotasolöma. Töpö waloa kokötasonö: "¡Jesus toi ipö sowö! ¡Sama tapa ke!" Ina ai wapamawi i töpöna i töpö kuko tasoma.

Töpö wapamawi i töpö japalo solataja, Jesus tapamo soa pötalonö: "¡Pö kiliti, pö pi moti kukö! Ina a kuma. Janepolepö tö jatowö i töpö pi ku upama, maike: "¿Kapilitö pina makö kilipalo, pitilita makö pi ku tomöpo ma apa ina makö kua köle? Sa amösö mö, sa amösö juwi itö mö. Sa pewö tapamo kuawina ina janepolepö töpö kua pasio maikötö." Ina Jesus ku puoma. Ai janepolepö toni pöwö i töpö pi ku ma apapö töna, aitö oalöpö töna tö nakama. I töpönö salaka noki aswösö tota jötököiaja, Ianö tö oa jötölöma.

Jesus ki: "Tiosö tosokama töna kamisana tö kuapö tö kule itö pewö kua toitaso piasalo kamakana ina sa ku köpili." Ina a kuma. Inatö kuanö, i töpönö Tiosö tosokamatö jinia topalöpö töna, Ianö töpö pi jatukupamanöma. Itö nojana: "A saipalöwi ia peama piasalo, a söpalö piasalo, maike 3 wakala töna a toia kopaso piasalo, inatö kuwi sutu upa tö tosokama ku waikioma." Ina a ku sotasoma.

"Makö ote ta kopö töna, makö wanisana apawi itö josa konö, ina sanöma töpöna Ipa wapamawi i töpö ku piasalo, ina tosokamatö ku naio sotama. Jerusalen tö ulina itö wösö kolo kupalonö, itö nojana aitö uli pewöna tö wösö jötöpo toitio piasalo. Kamakanö sanöma töpöna i matö pewö wösö totio piasalo." Ina a ku sotama.

Cuarenta wakala töna, Kamani wapamawi i töpöna sateje epi Jesus pi tapamo kuako paitioma. ¡Aitö wakalana 500 sanöma töpöna sami ipi a pi tapamo naisoma! A toi ipö sowi, kamani wapamawi i töpöna itö möna totio opanö, Tiosö kaikanamowi itö pewö wöa totiköma.

Kamani wapamawi i töpönaja: "Jutumösököna kaikanamopö töjö, masitatö ulina kaikanamopö töjö Kamisana tö pewö totopö ke. Inatö kua kötönö makö ju jötöponö kamisana sanöma töpö nokapalo naiopö ma töpö tamanö, Pöa pata, kama Ula, kama Kosiomopö Osi Ikitipö, ina matö katea kuanö ma töpö mai oma soatalo opa pökö, ina makö kuanö kamakana sa simo pöli itö kili taö totio opapö töna ma töpö wapama totio pökö. Kamaka kaina sa kuapalo sotio piasalo, i matö taö sotio pökö." Ina Jesus kuma.

Jesus toia kopasonoi itöna Cuarenta wakalatö kua waikilataja, Kamani wapamawi i töpönaja: "Jerusalen tö ulina pö kua opiki, jisa makö kulataja ipa Jaoani nö kamakana kama Kosiomopö Osi Ikitipö totoköiaja makö lotete epa piasalo." Ina Jesus kuma. Itö nojana jutumösököna Jesus jua ösa kopasolöma, ölasi tönö i töpöna a sosa sotamaköma. Itö pewöna Jesus kaikanamopö töna Tiosö kateja poko kuomö kuopa Jesus loa sotaköma.