Pitilita töpö pi ku upawi töpö kokamo kolo kuponoi itö

Jutumösököna Jesus jua ösa kopasolö noiaja, Jesus na töpö waponoi Jerusalen tö ulina i töpö kuo jaio jötoma. Pitilita töpö pi ku upawi, Tiosö na i töpö japalo piasalo töpö kokamo sinimo opatima.

Inamatö pewöna, Pascua tö wakala tamatima, ia 50 wakalatö jasupo nomo koataja, Pentecostes aitö wakala jilo kuawi tö wakalana judio töpö pi mönajapalo sinimo naioma. Nitö pewö pata api tö pewö suakowi itö wakala liki Pentecostes tö wakala jiloma. I Pentecostes tö wakalana tikiamö judio töpö kuomö kuowi töpö pewö kokamo totio opama. Itö inamana, sami semana töna jutumösököna Jesus jua ösa kopasolöma tö kulataja Pentecostes tö wakala kupasoma.

Pitilita töpö pi ku upawi i töpö kokamo pasilataja, ipokotö kuawina ina saia osimöna töpö lole ia inatö kuanö tö salio totio opama. Inatö kuanö, pitilita töpö pi ku upawi i töpö pewö jösökana koataka si jili kuawina inatö kuama. Tiosö Kosiomopö Osi Ikitipönö töpö osi pewö matija toitaköiaja tiko töpö kaina töpö japalo sotama.

Itö salio opöle i Jerusalen tö ulina sanöma töpönö itö jininönö, tö kua pöle itö ta piasalo sateje toti ipi töpö waloa totiköma. I töpö japalo pöle sanöma töpönö itö jini kukema, kamani itö kai saina Tiosö toita api itö pewö katea totio opaiaja, töpö pi kilijo opa salo töpö pi moti öpaja totio opama.

Pö wani poleamo pöa köle, ai töpö ku pasioma. Maike Pedro öpapalonö: "¡Sa jinije! ¡Ji töpö poleamo ma apöle! Sutu upa: 'Tö wakala pewö mapo pölati itaja, sanöma töpöna Sa Kosiomopö Osi ikitipö wanimo piasalo.' Ina Tiosö kai wösöwi i Joel na Tiosö kunoi itö kuati köle."

"Israel tilipö, Tiosö lotete epi itö pina Jesus nö aipa apawi tö mömaö, toita api tö tamaö ina a kuanoi i matö ta waikioma, i matö taö öpa waikia köle.¡Maike kamakanö i ma saumakönö ma söpalöma!"

"Jesus noma pölasonoia maike, Tiosö nö a toia kopamanöma. 'Nomawötö tititawi itö osimöna wa Saipalöwi iwa jotema pasio maikötö' Ina sutu upa tö kunoi itö kua waikia köle. Tiosö nö Jesus toia kopamanönoi i samatö ta totio opa köpili."

Juki ipi Tiosö kama pöa kateja poko kuomö kuopa Jesus loa koa köle. I satö tama piasalo Jesus kunoi i Tiosö Kosomopö osi ikitipö sima jötöpalö ke. Matö möö, matö jini makö kua pöle Tiosö kosiomopö osi ikitipönö itö tama köle."

"Kamakanö i Jesus ma saumakönö ma söpalöma. ¡Maike Tiosö nö Jesus liki a Saipalöwi a tapali, Kaikanatö tapali, ina a kuanoi i matö taö öpa pökö." Ina Pedro kuma.

Sanöma töpönö Pedro japalo jini pöle i töpö pi jonipo totio opama. Inatö kuaiaja, Pedro, kama ai töpö nokapalowi i töpö, ina kipi töpönaja: "¿Ipa aipö, wina samakö kua piasalo?" Ina i töpö kuma.

Pedro japalo jötonö: "Tiosö nö makö ote ta konöpö töna makö wanisana apawi i matö josa konönö Jesucristo jilo pina pö mai omono. Ina makö kua kukema Ianö kamakana kama Kosomopö osi ikitipö totokö kötö." Ina a ku sotama.

Pedro Japalo pöle itöna pitilita 3 mil sanöma töpö pi kulonö Jesus na nokapalowi töpö kua naipasoma. Töpö mai omolonö Jerusalen tö ulina töpö kokamowi i töpöna töpö söta naipasoma.

Jesus na töpö waponoi i töpönö tö wapamaiaja pitilita töpö pi ku upawi i töpönö itö jini sinimo sotioma, töpö noimo kokapalo sotio, töpö iapalo kokapalo sinimo opati, Tiosö na töpö japalo kokapalo nai sotio, ina töpö kuatima. Matijitö mi ipö pasi i töpöna kamani itö kuo asawi i töpönö tö töpö, töpö jonia totiatalo opatinö Tiosö na töpö pewö japalo pi mönajapalo sinimo sotioma. I töpöna sanöma töpö japalo toita apama. Samitö wakalana, pitilita ai tute sanöma töpö pi ku nomatalo opa kotionö töpö pala totio opaalöma.