Pedro, Juan ina kipi töpönö aitönö sitipa nakawi a nö löakonönoi itö

Aitö wakalana, kokamotawi a saina Pedro, Juan ina kipi töpö juulöma. Kokamotawi ia saina takatakana töpö ju jöka apataja, aitö ju mi ipi anö sitipa naka löatalo opatima.

Pedro nö a ju mi ipi ia mö sotanö: "Kauna sitipa sa totoköpö ipatö ma apöle. Maike ipatö kule i satö toto piaköle. ¡Jesus jilo pina wa öpa kopalonö a jupalo ko!" Ina a kuma.

Iakö sotawö, a juatalo ma apanoi Tiosö nö ia nö löako sotalöma, ia jupaloko sotaki, a jilijilimo totia apa, Tiosö na a japalo pi mönajapalo opa ina a kuama. Kokamotawi ia sai sikana sanöma töpö öpajale i töpöna itö aipa apama.

A löa konasonoi ia möpö töna lope epi sanöma töpö walopa totio opa solöma. I töpönaja: "¿Kapilitö pina ji wanotö nö löa konasoiaja makö pi kilijo opa köle? Samakö totiatalo opawi tö pina Kamisamaköna lotetetö kuowi tönö, i sama löako ma apaje. Jesus lotete epi itöjö, pitilita pi ku upapö Jesus nö tö totomawi itöjö, itö pewö pina ia nö löako pölasoke."

"Jesus söpalöpö töna Kamakanö romano tilitö kaikanana ma namo sima totio opama. Toi ipi tö totomawi kamakanö i ma söpalöma, maike Tiosö nö a toia kopamanöma. Matö taimi ipö salo i matö tamama, maike A Saipalöwi ia peamaö, a söpali ina a tama piasalo sutu upa inatö kunoi itö kupasopö töna Tiosö pina i matö tama puoma. Inatö kua kötönö, makö wanisana apawi i matö josa konönö Tiosö na makö pi ku sapa kopasoma, makö ote ta konö kötö." Ina Pedro kuma.

Pedro, Juan ina kipi töpö japalo pöle itöna kokamowi ia saina töpö kaikanamowi i töpö jiso opama. Inatö kuanö, töpö julönö töpö pöka kasömaköma. Maike Pedro japalonoi itöna pitilita sateje epi sanöma töpö pi ku totilasoma, itö wakalana Jesus na pitilita 5,000 sanöma töpö pi ku totisoma.

Itö janataja, judio töpö kaikananö kamani kaikana pata töjö, Tiosö simowi itö wapamawi i töpö ina kipi töpönaja Pedro, Juan ina kipi töpö totokö tasoma. Pedro, Juan ina kipi töpönaja: "¿I kapilitö lotetenö ji wano matö löa konöma?" Ina i töpö kuma.

I töpö na Pedro ki: "Ji wano matö mö pöle Jesus a Saipalönoi ia lotete epi itönö ia nö löa konöma. ¡Kamakanö Jesus ma saumakönö ma söpalöma, maike Tiosö nö a toia kopalöma! ¡Kamakanö i ma pi ma apama, maike Jesus lotete epi itönö makö nö lömoko sisaso piasalo, aitö kua soa maikötö!" Ina Pedro ku jötoma.

Pedro, Juan ina kipi töpönö wajetatö tosokama ma apanoi i kaikana töpönö itö taö öpa köle, maike töpö kili pölanö kunumai töpö japalo totio opa jötoiaja töpö pi kilijo opama. Maike Jesus na töpö nokapalotinoi i töpönö itö taöa kopasoma. Itö nojana, ina makö kua kota kukema makö wasisama piasalo ina töpö kunö, Pedro, Juan ina kipi töpö julakopalöma.