Felipe, Etiope tö kaikana pina a tatapajamowi a ina kipi töpö kuanoi itö

Pitilita sanöma töpö pi ku upawi i töpöna Esteban a jilo kuawi a kaikanamo naioma. Iana sanöma töpö japalo toita apö, Tiosö Kosiomopö Osi Ikitipönö a osi matija apa, a pi tao opaö ina iana tö kuoma. Esteban nö tö aipama apanö Jesus na pitilita sanöma töpö pi tama soatalo toitioma.

Aitö wakalana, Esteban nö Jesus na tö kuawi tö wösötitaja, pitilita Jesus na ai judio töpö pi ku pasio mi ipi Esteban sola i töpö japalo pi jisujupaso lasoma. Inatö kuanö, Tiosö tosokamatö wapamawi i töpö kaikanana Esteban wösö jolisimoko tasoma. "¡Moises, Tiosö ina kipi töpöna a wani japalo wanisana toitiataja sama wani jininö ke!" Ina töpö jolisi kuma. Itö pina i kaikana töpönö Esteban julönö, kaikana pata töpöna a totoköma, ia ai töpönö Esteban wösö jolisimo naioko sotama.

Esteban naja: "¿I töpö ku pöle i pitilita?" Ina kaikanatö kuma. Esteban japalo jötonö, Tiosö nö Abraham na toita api tö tama kolo kupalonö Jesus kupasonoi itö wakala waloa toitakönoi itö pewö wösö, Tiosö i töpönö A Simowi itö kili taöti ma apanoi itö pewö taöa kopamani ina a kuama. Itö nojana: "Matö jini mi ipö, makö waitili ipö, Tiosö ma Kosomopö Osi Ikitipö jasiama sotio ina makö kua köle, ina kamaka i kolo pata töpö kua sotama Tiosö jasiama sotio, A kai wösöwi i töpö sö sotio ina töpö kua sotama. ¡Maike kamakanö wanisanatö pe epi matö tama satia apa pasioma! ¡A Saipalönoi Kamakanö i ma söpalöma!" Ina a ku sotama.

Kaikana töpönö itö jininönö, töpö pi jisuja apa salo töpö sömöka pewö kasöa sotakönö töpö lalupalo sotama. I töpönö atuamö Esteban sulölönö a söpalö piasalo mamanö a sösaja sotama.

Esteban söpo opa waikilanö a komönö: "Jesus, sa janepolepö sua konö." Ina a kunö, a maiko jitata sotakönö: "Kaikana, ji töpönö ji wanisanatö tama pöle itö ösajama jatöti." Ina a kunö a noma sotasoma.

Sanöma töpönö Esteban söpalöiaja ai jisatö Saulo a jilo kuawi a pi mönaja apama, i töpönö mamanö a sösaja pasilataja i Saulo nö ia jalonoi ösö sua pasilöma. Itaja sateje epi sanöma töpönö pitilita Jesus na töpö pi ku upawi i töpö nasö suapala kolo kupasoma, inatö kuaiaja, pitilita töpö pi ku upawi tikiamö i töpö toköa jötaja totilasoma. Inatö kua pölata maike, töpö ju paja Jesus kuawi itö wösö soatalo opama.

Pitilita Jesus na a pi ku upawi Felipe a jilo kuawi Jerusalen tö ulina a toköa nailonö tikia a kuo naioma. Samaria tö ulina a julolönö Jesus kuawi itö wösö kukema sateje epi pitilita sanöma töpö pi ku totia apa naisoma. Inatö kuanö aitö wakalana, Tiosö nö a simötawi ianö pölösana ai pilitiso kuowi tisona Felipe simama. Itisona a juulötaja, Etiopia tilitö kaikanana a tatamo sötapalowi kamani katoana ia pi lölö koonöma. I wano töna Felipe japalo tasopö töna Tiosö Kosiomopö Osi Ikitipönö a sima sotama.

Katoana Felipe walopakö tasoma, etiope tili tönö Tiosö kai wösöwi i Isaias nö tö tosokopalönoi itö kateatima. "Oveja wai söpalö piasalo awai sua talölö kuawina i töpönö ina a sua talölöma, Oveja wai lalupalo mi ipö kulena ina a lalupalo ma apa kuama, Ia jatolo ma apama. Ai wanisanatö tama ma apama maike i töpönö a wasisama totio opama. I töpönö a söpalöma." Inatö tosokama kuwi tö kateatima.

Etiope tilitöna: "¿Watö kateati pöle i watö jini jöta alukule?" Ina Felipe kuma. "Ma. Ai tönö tö wösö pasio mi ipö kötönö satö jini mi ipö. Japo kamisa kotöna a loa naiköso. ¿Kamana, Isaias ku ko jatoma, ai tikoana a ku puo jatoma?" Ina i etiope tilitö ku sotama.

Jesus na tö kuapö Isaias nö tö tosokama puoma ina etiope tili töna ina Felipe ku jötoma. Felipe nö ai tiko tosokamatö katea naionö iana Jesus kuawi itö pewö wöa totiköma.

Felipe, i etiope tilitö ina kipi töpö pi lölö ölöpamö, matu kuopa töpö walopaköma. "¡Pike! ¡Ia ai matu kua köle! ¿Sa mai omonasoma kini?" Ina etiope tilitö ku sotalonö, katoa opimaköpö töna a simo sotama.

Inatö kuanö, matu kuopa töpö itopasoma, ia Felipe nö i etiope tilitö mai oa sotapamanöma. I matuna töpö jösöka kopasoiaja, Tiosö Kosiomopö Osi Ikitöpönö Felipe sua konönönö tikiamö a jila noma kokö tasoma, itö ulina ianö Jesus kuawi tö wösö nomoko sota tasoma.

I etiope tili tönö Jesus mö taöpasoma kötönö a pi mönaja apa koonöma.