Jesus na pitilita Pablo pi ku naikönoi itö

Esteban söpalönoi Saulo jisanö ia i jaloösö tapoma. Jesus na pitilita ia pi ku mi ipö kötönö pitilita töpö pi ku upawi i töpö nasö suapala totio opama. Jerusalen tö ulina, saipö pewöna a ju jötöpo totionö wano töpö, su töpö, ina töpö jua tamanö töpö pöka kasöma soatalo opama. Damasco tö ulina pitilita ai töpö pi ku upawi i töpö julö tasonö Jerusalen tö ulina töpö jila kokö solöpö töna judio patatö kaikananö Pablo na tosokama tö totoköma.

Damasco tö ulina Saulo ju ulöpa, jutumösököna wakalatö kuowi tönö a josöka soa pötalöiaja, masita töna a kelasoma. Saulo nö tö jini kukema: "¡Saulo! ¡Saulo! ¿kapilitö pina kaunö sa nasö suapala köle?" Inatö kuma. "¿Wapamawi ia witipili wa?" Ina Saulo ku jötoiaja. "Kamisa liki Jesus sa. Kaunö sa nasö suapalati köle" Ina Jesus ku sotasoma.

Saulo öpa kopasoma tö mö ma apama. Ai töpö nokapalo pöle i töpönö Damasco tö ulina a jila pökö tasoma. Saulo iapalo mi ipö, koamowi aitu koatala mi ipö tres wakala tö kupasoma.

Damasco tö ulina, Jesus na aitö sötapalowi Ananias a jilo kuawi a kuoma. Ia naja: "Saulo kulati ia saina a julolö. Ianö tö mö kopö töna pila jösökana wa amösö walikö pökö." InaTiosö kuma. Maike, "Kaikana, ia waninö kauna pitilita töpö pi ku upawi i töpö nasö suapalatiwi i satö jini ipa köle." Ina Ananias kuma. Maike Ia naja: "¡A julolö! Judio töpö, ai tiko sanöma töpö i töpö pewönamö sa jilo wösö jötöpopö töna i sa saia waikipalö ke. Kamisa jilo pina pe epi ia peama totio opa piasalo." Ina Tiosö ku puoma.

Inatö kuanö, Saulo kuo tasopa Ananias jua jötösolöma, ia jösökana a amösö walea jötökönö: "Watö mö koo, Tiosö Kosiomopö Osi Ikitipönö wa osi matijiki, ina wa kuapö töna, jisimö wa ju tasataja kauna Jesus tapamonasonoi ianö sa simöpalö ke." Ina a kuma. Iakö sotawö Saulo nö tö möko sotama, Ananias nö a mai oa sotamanöma. Itö nojana Saulo iapalo konö a lotetea kopasoma.

Damasco tö ulina Saulo nö lope epi tö wösö kolo kua sotalonö: "¡Jesus liki Tiosö i Ula!" Ina a ku sotama. ¡Pitilita töpö pi ku upawi i töpöna wanisanatö tama pi topa apanoi, Jesus na pitilita ia pi ku naikömaja judio töpö pi ku tomöpo ma apama! Judio töpöna Saulo japalonö, Jesus a Saipalönoi itö möma totio opama.

Sateje epi wakalatö jasupaso noiaja, Saulo söpalöpö töna judio töpö japaloma. I töpönö itö ulina takataka kule i takana Saulo atupo tapala konö a söpalöpö töna ai töpö simököma. Maike Saulo sötapalowi i töpönö itö taöa jötömanönö a toka jöta komanöma. Mumaiaja i töpönö wöana a titikönö itö uli pata jokolole itö julu patana a pi itoa jöta kopamanöma. Damasco tö ulina Saulo toka kononö, Jesus kuawi itö wösö kolo kuako sopasoma.

Jesus na töpö waponoi i töpö mö taöpo pi topa apa salo Jerusalen tö ulina Saulo julasolöma, maike iana i töpö kili ipama. Inatö kuaiaja, pitilita aitö pi ku upawi Bernabe a jilo kuawi anö Jesus na töpö waponoi i töpöna Saulo kai julolönö Damasco tö ulina Saulo kili pölanö kunumai tö wösö totio opanoi itö wösö jötoma. Itö nojana, i töpönö Saulo pi nai jötököma.

Jerusalen tö ulina töpö nasö suapalaiaja pitilita ai töpö pi ku upawi töpö toköa paja apö solöma, Antioquia tö ulina i töpö walokönö ia Jesus wösö sotama. Sateje epi Antioquia tili töpö liki judio töpö mi ipö maike, pitilita Jesus na töpö pi ku kolo kua naia sotaköma. Itö ulina Bernabe, Saulo ina kipi töpönö pitilita sanöma tute töpö pi ku kolo kupowi i töpöna Jesus kuawi itö wapama satea soanö töpö pi ta loteteama piasalo iamö töpö jua jaisolöma. I Antioquia tö ulina Jesus na pitilita töpö pi ku upawi i töpö liki "Cristo tili töpö" töpö jilo ta kolo kupasoma.

Aitö wakalana, Antioquia tö ulina pitilita töpö pi ku upawi i töpö iapalo mi ipi Tiosö na töpö japalotitaja: "Kamisa pina Bernabe, Saulo ina kipi töpö sokapalö, ai tatao tö tamapö töna sa töpö naka köle." Ina Tiosö Kosiomopö Osi Ikitöpö kuma. Inatö kuaiaja, Bernabe, Saulo ina kipi töpö pina pitilita Antioquia tili töpö pi ku upawi Tiosö na i töpö japalonö, itö nojana i töpö jösökana töpö amösö walia sotaköma. Itö tama mapasoiaja, tikiamö Jesus kuawi itö wösö jötöpopö töna töpö sima sotalöma. Bernabe, Saulo ina kipi töpönö tiko sanöma töpö wapama jötöpo totioma, pitlita sateje epi Jesus na töpö pi ku totio opama.