Tute töna Tiosö japalo topa noma kopasonoi itö

Ai sutö mamo taimi ipi a naja, kaunö Tiosö Ulu wa tapalö piasalo, Tiosö nö a simötawi ia kuma. Inatö kuanö, a mamo taimi ipö pölata maike, Tiosö Kosiomopö Osi Ikitipönö a osi matijimaköiaja a sipinapilasoma. Ianö i ula tapalönö Jesus a jilo tapalöma. Inatö kua kötönö Jesus liki: I Tiosö, sanöma töjö, ina a kuoma.

Jesus liki i Tiosö, töpö pi ku upapö töna, aipa apawi tö möma totio opama. Matu Jösökana A juma, ipokotö pi moti tatama totio koma, sanöma töpö kamakali ipi töpö löa totio opa koma, sai töpö sasu totio opa koma, nomawö töpö toipama totio opa koma, (5) cinco pan töpö wai, polakapi salaka kökö inatö kuo pötama maike pe epi tö ta kopalönö 5,000 sanöma töpö iapalama naioma.

Jesus nö tö wapama toita apa naioma, Tiosö i Ula kötönö kaikana tönö tö wapama kuawina ina a kua sotama. Kama makö pimo opa kuawina ina ai tiko ma töpö pi tama naio sota pökö inatö wapama tamama.

Kamaka ai matö pi ipa jöta köle maike Tiosö ma pi toleja satia apa asa pökö, makö pilapalo opa pölata Ma pi satea naio soa pökö, inatö wapama tama naioma

Jitö ulina tö noa api tö kuja apa jöta köle maike Tiosö kaikanamowi itö noa sati ipö asa kötö, ina Jesus kuma. Tiosö kaikanamopa makö kuo naiopö, sanöma makö pewöna itö toita sati ipi asawi itö. Tiosö kaikanamopa wa lisipo pi topa apa kukema, wanisana apawi töna wa nö löamo konasopö tö.

Pitilita kamisana ai sanöma töpö pi kunö töpö lömo asako piasalo, maike ai töpö pasi kunumai ina Jesus kuma. Masitatö uli toita apö kulena ina ai sanöma töpö kua asa kötö, ina A kuma. I töpönö Jesus toita api itö jininönö pitilita töpö pi ku asanö töpö löa konaso piasalo. Masitatö ulina ai pilitiso amano opi tisona Tiosö japalowi imo wai keköma maike mowai jaö mi ipö kulena ina ai töpö kua pasio piasalo. I sanöma töpönö Jesus japalowi itö jini wani ipi i töpö pasiwö, itö pina Ia kaikanamopa töpö lisipo pasio maikötö.

Wanisanatö tamawi Tiosö nö i töpö pi totio opa kötö. Töpö ote ta konönö kamani ulu töpö tapa pi topa apa köle, ina Jesus kuma.

Tiosö nö wanisanatö pi maikötö, ina Jesus ku naioma. Adan, Eva ina kipi töpönö wanisanatö tapalönoi i kamani ulu töpöna itö ola tolea naia sopasoma. Itö pina, jitö ulina sanöma töpönö wanisanatö tamanö Tiosö na töpö soka sotio. Inatö kuanö, Tiosö nö sanöma makö mö asöpowi makö kupasoma.

Maike Tiosö nö jitö ulina makö pewö kule pe epi i makö pi ipa salo, Jesus na pitilita makö pi ku asawi i makö nö löa kononö, Tiosö kotöna makö kuo sotio naiopö töna kamani Ula sami ipö pölata a totoköma.

Kama wa wanisana apatipa, watö taipalöma kötönö wa nomasopö tö kua köle. Kauna Tiosö jiso opapö tö, maike kauna A jiso maiaja Jesus na a jiso opa asa puoma. Kawa wasisamapö tö kuonoi i jitina Jesus nomalonö, itö tama löoma.

Jesus nö wanisanatö tama ma apama, maike jitö ulina wanisana matö tamawi itö pewö josa kopalöpö töna A toita api a söpamonasopö, kamanö tö saipalöma. Jesus Kama söpamo konasoma kötönö, Tiosö nö wanisanatö pewö ote ta ko soatalo opaö, wanisana satia apa pölata.

Toita api watö tamawi itö pina wa nö löpoko maikötö. Kama wa kua soa pötanö Tiosö na wa sötapalopö tö mi ipö kötö. Jesus nö wa wanisana apawi itö ausipako sisa kötö. Jesus liki i Tiosö Ula sai, wa pi ku totio opaö, kamisa söpo piale i jitina A söa löpasoma, maike Tiosö nö a toia kopalöma, ina wa pi ku totio opa pökö.

Jesus liki ipa kaikanatö, sanöma töpö kunö pitilita töpö pi ku upawi Tiosö nö i töpö löa ko sisa piasalo. Maike Iana pitilita töpö pi ku pasio mi ipi Tiosö nö i töpö löa ko pasio maikötö. Wa pilapalo pölataja, wa pepalo pölataja, wanowa pölataja, suwa pölataja, jisawa pölataja, wa patasipö pölataja, tikiamö wa kua pölataja,Tiosö nö wa pi ipa kötönö wa sötapalo jöka naiopö töna tö pi ipa salo Jesus na pitilita wa pi kupö, tö pi ipa köle.

Kamana pitilita makö pi kunö makö mai omonasopö Jesus nö tö pi ipa köle. ¿Jesus liki a Saipalönoi ia, Tiosö i Ula, wa pi ku totia apa köle? ¿Sa wanisana apawi sa kötönö Tiosö nö sa wasisamapö sa wa pi ku upa köle? ¿Sa wanisana apawi itö josa konöpö töna jitina Jesus nomasoma wa pi ku upa köle?

¡Jesus na pitilita wa pi ku upa, kawa pina a kuanoi itöna pitilita wa pi ku upa ina wa kua pöle i Cristo tiliwa! Mumimumi töna Satanas wani kaikanamowi ia Tiosö nö wa ta kopalönö wakala apapa kama kaikanamowi ia wa ta noma koköma wa. Kauna wanisanatö titikönö wa kua jiopa soa pöatalo opanoi Tiosö nö itö josa konönö wa kua topa pi topa apa nomo kopö töna tute wa ta noma kopalöma.

Cristo tiliwa könaja, Jesus nö tö tamanoi itö pina Tiosö nö wa ote ta konöma wa. Juki ipi Tiosö nö wa mö asöpo pölanö kunumai wa sötapalamako sisa köle.

Tiosö na wa sötapalowi wa, Kaikana Jesus simoiaja watö tamawi wa, i wa könaja Jesus nö wa wapamawi i watö tama pi topa apa kötö. Cristo tiliwa waiki pölata maike, wanisanatö tamapö töna wa wapama satia soa piasalo. Maike Tiosö nö wa josa maikötö, watö tama jiopawi i watö wösö kukema Ianö wa ote ta konö kötö. Wanisana töna wa kasijapalo jötopö töna Ianö tö totokö piasalo.

Kamisana a japalo, ipa wajeta tökö katea sotio, ai cristo tili töpö kaina wa kokamo naionö kamisana a japalo toita apa, kauna satö tamatiwi ai töpöna itö wösö naio, kauna ina Tiosö kuti köle. Ina wa kuati kukema Iana wa sötapalo jöka toitioolö piasalo