Jesus ju kota piasalo

Jesus, a Saipalönoi ia kuawi Sanöma töpö pewönö itö jini jötöpo soa paja 2,000 inamatö kupo toitia köle. Pitilita töpö pi kuwi i töpö pala toitia köle. Ji masitatö uli pata mapo ko pölati ita sa ju kota piasalo ina Jesus kuma. A juko paio mi ipö maike, A kunoi itö tama toita piasalo.

Jesus ma walo tako pölanö, toita api makö kua totiki, I ma kili taö totio opaö ina makö kuapö töna Tiosö nö tö pi ipa köle. Ia pata Kaikanamowi ai tiko töpöna i matö wösö naiopö töna tö pi ipa naia köle. Ji masitatö ulina Jesus ju naia solanö: "Kamisana ipa töpö sötapalowi i töpönö itö uli pewönamö Tiosö kaikanamowi itö wöa jötöja toitaköia, itaja, jitö uli pata mapaso piasalo." Ina a kuma.

Sateje epi ai töpö ulina Jesus kuawi itö jini pasio paio mi ipö. Jutumösököna a ösöpö ko pialanö, sanöma töpönö tö Toita api itö jini taimi ipi i töpöna matö wösö totio opa pökö, kamani wapamawi i töpöna ina Jesus kuma. “¡Makö ju jötöponö sanöma ma töpö wapama totio opa pökö!” “¡Jikaliana ni matö suapö töna nitö pewö pata apö waikiwö!” Ina Jesus kuma.

“Kamani kaikana töna a simawi ia toleja maikötö. Jitö ulina töpö kaikanamowi i töpönö sa nisi taö öpa köle manukule, i töpönö makö wasisama apaö, makö sö öpaö Kamisa pina ina makö tama piasalo. Jitö ulina Satanas wani kaikanamo pöle i sa wani utitia waikipalöma kötönö jitö ulina makö wasisama pölata makö kasijapalo satia apa pökö. Kamisana makö sötapalo sotiopa makö nomaso könaja, ¡Tiosö nö makö löa konö kötö!” Ina Jesus ku naioma.

Kamani wapamawi i töpönö jitö uli pata mapasoiaja sanöma töpö kua piale itö jini saliliapö töna sutu upa tö kuanoi Jesus nö tö wösöma. “Ai sanöma tönö kamani jikaliana nitö toita api mo tököma. A mia pasilataja, ia nisi taö öpawi anö i mo kaina sikisiki mo töa tikilia nai jatokönö, a jua konasolöma.”

“I mo pewö patasoiaja, kamani simawi i töpö ki: ‘¡Kaikana, ji jikaliana nitö toita api wa mo sino tökö köpili. ¿Winatö kauiaja sikisiki tiki tikilia apa köle?´ töpö kuiaja, i kaikanatö ki: ’Sa nisi taö öpawi a waninö tiki töaja naiköma.’ Ina a kuma.”

“Inatö kuaiaja kamani kaikana tönaja: ‘¿I sikisiki samatö uka konanö? Simawi i töpö kuiaja: ‘Ma. I matö tama kukema ni ma tiki sai uka naipalö kötö. Pö opia paikö, tiki pewö pata paiso pökö, matö suako paja, i sikisikitö isimanöpö töna matö pa sokapa pasio ko sisa pökö, maike ipa nitö patawi ia ni matö papa totioko sisa solö pökö.’ Ina i kaikanatö kuma.”

Sutu upa itö kuanoi wapamawi i töpönö itö jini tomöpo mi ipö salo, tö wösö topa toita Jesus na töpö kuiaja. “Wano tönö nitö toita api mo tökönoi i a Saipalönoi ia. Jikalia liki ji masitatö uli pata. Nitö toita api i mo liki Tiosö i sanöma töpö pi ku toita api i töpö.”

“Sikisiki tiki pewö liki wanisanatö tamawi ia pina sanöma makö kua pasiowi i makö. Sikisiki mo töa tikilikönoi i Saia wani pasiwö. Nitö pewö patasowi itö liki jitö uli pata mapasopö itö. Nitö sua salekea ko piale i Tiosö nö töpö simötawi i töpö.”

“Jitö uli pata mapasoiaja, Tiosö nö töpö simötawi i töpönö Saia wani i sanöma töpö pewö soka kopalönö koataka pata jilipaja töpö kemakö piasalo, i töpö ökö totio opaö, töpö naköpö wötömo opanö töpö pepelo totio opaö ina ia töpö kua piasalo. Inatö kuanö, a Saipalönoi ia pina töpö kua topa apawi, pila motoko pata wakala apö kulena ina Tiosö kaikanamowi ia ina i töpö wakala kua totio opa piasalo.” Ina Jesus kuma.

Jitö uli pata mapo pialataja sa ju kota piasalo, ina Jesus ku naioma. A jua kua konasolönoi ina a ju kua kotapö tö, kötönö, sanömatö sai kuina ina a kui ölasi töna a ju ko piasalo. Jesus ju ko pöle itaja, pitilita sanöma töpö pi ku upawi töpö nomaponoi i töpö joka kopalonö jutumösököna Ia kotöna töpö kokamo kolaso piasalo.

Inatö kuaiaja, pitilita töpö pi ku upawi töpö toi ipi jutumösököna i töpö ösa naia kopalonö nomawö töpö toia kopasonoi i töpöna töpö kokamo naio kolaso piasalo. I töpö pewö liki, Jesus kaina töpö kokamo kolaso piasalo. Itö pewö kupasoiaja, Jesus nö toita api kamani sanöma töpö kai kua topa totikö piasalo.

Kamisana pitilita töpö pewö pi ku upawi i töpöna kaikanatö jena tö kutawi inisimö satö tota jötöja totikö piasalo ina Jesus kuma. Tiosö kotöna i töpö kukönö toita api töpö kaikanamo sötapalo naio sotio piasalo.

Maike pitilita Jesus na töpö pi ku pasio mi ipi Tiosö nö i töpö wasisama tötio opa piasalo. Pepalo mapo mi ipi ia töpö sösökö piasalo, ia töpö ökö totio opanö pi jonipowi tönö töpö naköpö wötömo totio sotio piasalo. Koataka luo ko mi ipi takanö töpö isima toitio piasalo, mosapö waninö pö wani oa mapoti ma apa piasalo.

Jesus ju kotale itaja, Ianö Satanas wani utitipalönö a kaikanamowi itö ma kopamanö piasalo. Ianö pepalo mapo mi ipi ia koatakanö Satanas wani isima toitiopö töna a wani sösökö piasalo, Tiosö simowi itö tama pölanö kunumai ia wanina töpö nokapalo pi topa apa pasionoi ia i töpö pewö titio koka naio sota piasalo.

Adan, Eva ina kipi töpönö Tiosö kili taö ma apanö jitö ulina wanisanatö walomaköma, itö pina Tiosö nö jitö uli wania kopalöpö töna a japaloma. Maike aitö wakalana Tiosö nö ai tute jutumösökö, ai tute masitatö uli inatö ta kopalö piasalo, itö pewö toita apako piasalo.

Tute masitatö ulina Jesus nö kamani sanöma töpö kai kua kokönö ia tö kuowi itö pewöna A kaikanamo totio sotio piasalo. Ianö i töpö mamuku pu pewö jasitia kopali, pepalowi itö mapamani, pi jonipowi itö mapani, ökö kota mi ipö, wanisanatö mapaso, nini kota mi ipö, noma kota mi ipö, inatö kua piasalo. Kamani itö ulina toita api Jesus kaikanamo topa totio piasalo, kamani Sanöma töpö kotöna A kuo sotio piasalo.