Ulu sa totokö piasalo Tiosö kunoi ia

Canaan tö ulina Abram, Sarai ina kipi töpö walokönoi i diez (10) inamatö kua waikia köle, maike kamani ula kupoti ma apama. Inatö kuaiaja, Abram naja: “Tiosö nö kamisana ai ula toto wani ipö kuataja ai ulu sa tapalöpö sa patasoma apö waikiwö inatö kua kötönö, sa simowi ji Agar kua köle. Iana wa mai sakata pökö, ianö ipa ai ula takö pökö.” Ina kamani pusupa Sarai kuma.

Inatö kuanö, Agar na Abram mai sakatatima. Agar nö ai ula wanoa wai tapalöma, Abram nö Ismael ia jilowai tapalöma. Maike Sarai nö Agar na kamani panopa noama sotama. Ismael na trece (13) inamatö kuataja, Abram na Tiosö japalo kotama.

Ianaja: "Kamisa liki Tiosö lotete epi i Sa. Makö japalo topamo piaköle." Ina Tiosö kuma. Ina a kuiaja masita töna Abram maiko pewö jitata sotaköma. Abram naja: "Kawa liki jitö uli pewö patana töpö kuowi i töpö i pöwa kupaso piasalo. Kawa, au ola töpö, ina kipi maköna Canaan satö uli tota totikönö kamisa liki i töpö Tiosö sa kuo sotio piasalo. Kauna au ulupö pewö kule i töpö, pata töpö, i töpö isi ola poke tolejele ia tö janönalö."

"Au pusupa Sarai nö ai ula tapalö piasalo, ia liki au ulu sa toto pianoi ia sai kupaso piasalo. Isaac i wa jilo tapalö pökö. Ia sola samakö japalo topamonaso piasalo, Isaac i ola sa töpö pala totimanö piasalo. Ismael i ola sa töpö pala totia naimanö piasalo, maike satö tama piale i Isaac na i satö tama totio asa piasalo." Ina Tiosö kuma. Inatö kuanö "sateje epi töpö i pöa" tö kutowi töna Tiosö nö Abraham a jilo ta noma kopalöma. Tiosö nö Sarai jilo tikoa naia kopalönö, "kaikanatö patea" tö kutowi töna Sara a jilo ta naia kopalöma.

Itö wakalana sotawö Abraham nö kamani saiana wano töpö pewö kule i töpö pewö isi olana wani ipi tö janö jötöpo sotama. Sami inamatö jasupaso noiaja, Abraham na cien (100) inama tö kua, Sara na noventa (90) inamatö kua, ina tö kulata Sara nö Abraham ula tapalöma. Isaac ma jilo tapalö pökö Tiosö kunoi ina a jilo ta jötöpalöma.

Isaac liki jisatö kupasoiaja, Tiosö nö Abraham wapa piasalo: "Sami ipi au ula Isaac kule, i wa söpalönö wa isimanönö kamisana a totopa". Ina a kuma. Tiosö simoiaja Abraham nö tö tama jöto kotanö, kamani ula isimanöpö töna tö pewö ta topapala sotama.

A isima piale itö ulina Abraham, Isaac ina kipi töpö ju ulöpamö: "Japa, matö isimapö töna talöka kua asa köle, ¿maike witia oveja wai pasiwö? Isaac kuiaja: "Ipa ula a pi kupaloti Tiosö nö oveja ma wai isimanöpö a wai totopö kötö." Abraham ku jötoma.

Isitamawi itö ulina i töpö walokö tasoiaja, Abraham nö kamani ula Isaac okapalönö isitamawi töna a pa sotaköma. Kamani ula söpa piataja: "¡Tamati! ¡Au ula söpa jatoti! Au ulawai sami ipi Kamisana i wa umapo ma apama kötönö, jukiki kaunö sa kili taö öpawi i satö tapa apa köle." Ina Tiosö ku löa konasoma.

Abraham nö ai jiti oso waina ai oveja wani ja talalöma. Isaac isima pianoi ia a isimanöpö töna Tiosö nö a totoköma. Abraham pi mönaja apölanö i oveja wani isia jötömanöma.

Inatö kuaiaja, Abraham naja: "Kamisana au ai watö umapo mi toti ipö, au ula sami ipö pölata maike wa umapo naio mi ipö ina wa kua kötönö, wa kua topa apapö töna satö tama piaköle. Sitikalipö pata sateje toti ipö maike, au ulu töpö ola sateje totio opa asa piasalo. Sa simoiaja watö tama totiatalo opa kötönö, au ai töpö pina sanöma töpö pewö pata kuo topa apa naio piasalo." Ina Tiosö kuma.