Isaac na Tiosö nö toita api tö totomanoi itö

Abraham patasipö toti waikiiaja, kamani ula Isaac patalonö patatö jisa kupasoma. Inatö kuaiaja, kamani ai töpö kulati iamö kamani ula Isaac pusupa sulötasopö töna, Abraham nö kamani simowi a simöpalöma.

Abraham ai töpö kulati iamö ia juulöpamö tö tatea totipaso noiaja, a simöpalönoi i Tiosö nö Rebeca kuomö kuopamö ia simamo talöma. Ia liki Abraham papala ula i patea kuoma.

Rebeca nö kamani ai töpö takölönö, a simöpalönoi iana a noka nailolönö, Isaac saiana a jua naia jötösolöma. Ia walotaköiaja Isaac nö kamani pusupa ta sotalöma.

Tö tatea totipaso noiaja Abraham nomasoma, inatö kuaiaja, satö tama piasalo Abraham na Tiosö kunoi i Isaac na itö pewö jasua noma sotaköma. Abraham naja au ulu töpö ola pata seteje totio opa piasalo Tiosö kuma maike, Isaac pusupa Rebeca sipinapiti ma apama.

Rebeca pina Tiosö na Isaac japalo jötoiaja, Tiosö nö polakapi ulupö waina a sipinapia jötömanöma. Rebeca osimöna i ulu kököwai titio paja kököwai söso totio opatima, inatö kuaiaja Rebeca nö Tiosö na itö jinima.

Rebeca naja: "Kawa osimöna ulu kököwai titile i kököna polakapi sanöma tiko töpö kua salekepaso piasalo. I kama töpö söso toitio piasalo, au ula patanö au ula osa simoiaja tö tamawi a kupaso piasalo." Ina Tiosö kuma.

Rebeca ulu kököwai kupasoiaja, kamani ula pata junuku janaja apö a pewö koi ipö, ina a kui a kupasoma, itö pina Esau a jilo ta sotalöma. Kamani ula osanö Esau amösökö tisana jupolata a kupasoma, Jacob ia jilo ta pasipalöma.