Jacob kua topa apapö töna Tiosö japalonoi itö

I ulu kökö pata alöpamö, Jacob liki saiana a kupalo pi topa apa sisa pasioma, maike Esau namo ju pi topa apa pasitioma. Rebeca nö Jacob pi ipa pasia, Isaac nö Esau pi ipa pasia ina töpö kuatima.

Aitö wakalana Esau namo jutitasoma a oi ipi a waloa kokösolöma. Jacob naja: “Au ni töna wani ipi aitö pita.” Ina Esau kuiaja: “Ina wa ku salo, ulu patawa kötönö jaoaninö kauna tö pewö toto piale kamisana itö pewö tota paipa.” Ina Jacob ku sotama. Inatö kuanö, Esau nö kama itö pewö kupo piale i Jacob na itö pewö totoköma. Inatö kuaiaja, Jacob nö ai nitö tota jötököma.

Esau na Isaac nö kamani itö pewo kule itö pewö totoki, a kua topa apapö töna a japalo, ina a kua pi topa apama. Maike tö tama piataja, Rebeca nö Jacob liki Esau uni tapalönö Isaac mönamanöma. Isaac patasipö toti waiki kötönö tö mö ma apa waikioma. Inatö kuaiaja Jacob nö Esau jaloösö jalolönö, kama pewöna cabra ai saloa jilo wani kuawi a koiki wani sölaja sotamaköma.

Isaac na Jacob jua sotalolönö: “Kamisa liki Esau sa. Kamisana toita api tö kuapö töna wa japalopö töna sa ju köle.” Ina a ku sotama. Isaac nö saloa cabra koiki wani jöpa, jalo ösö jisiaö, ina tö tamanö Esau jatowö a pi kunö iana toita api tö kuapö töna a japalo sotasoma.

Kamani papala itö pewö kupo pianoi i Jacob nö itö pewö sua toma lölöiaja Esau nö Jacob nisi taö kuköma. Inatö kuanö, kamani jaoani nomasoiaja Jacob söa jaipalöpö töna a pi kupalo opama.

Maike Rebeca nö Esau pi kupalo pöle itö jinia jötölöma. Inatö kuanö, ia, Isaac ina kipi töpönö paipatamö kamani ai töpö kuo tasopa jacob kuo naio tasopö töna a simönöma.

Sateje epi inama töna Rebeca ai töpö kotöna Jacob kuo naitio tasoma. Ia a kupalo naitio tasopaja kamani pusupa sulönö doce (12) kamani ulu wano kökö sami (1) kamani patea, ina kamani ulu kökö ta takötasoma. Tiosö nö a pilapalo totio opawi a tapalöma.

Kamani Canaan tö uli jöko ma apapa tikiamö a kupaloti tasopa veinte (20) inamatö jasupalonö, Jacob nö iamö kamani ulu töpö, kamani i töpö simawi i töpö, kamani salopö wani, itö kai pewö jua sapa konasolöma.

Esau nö sa söpa pi topa apa soa jatolö kötö Jacob pi ku upa salo a kilipalo opama. Itö pina, Jacob nö Esau na sateje epi salo kökö wani sima tolejepalöma. Esau na salo kökö totoma jötölati i töpöki: “Kawa pina a tatamowi i Jacob nö kauna noami ipi ji salo kökö totoma köle. Jisimö ia ju koa kölati.” Ina töpö ku solöma.

Maike Esau nö Jacob ote ta ko waikilöma tö kuoma, töpö möpaso koa salo töpö pi mönajapalo totio opama. Inatö kuanö, Canaan tö ulina Jacob kua topa totia apa koköma. Itö nojana Isaac nomasoiaja, Jacob, Esau ina kipi töpönö a patilia koköma. Satö tama piasalo Abraham na Tiosö kunoi i Isaac na itö jasupalonö Jacob itö kua noma sotasoma.