Jose, kamani ai töpö, ina kapi Tiosö nö töpö nö löa konönoi itö

Sateje epi inamatö jasupasonoia, Jacob patasipö toti waikiiaja, kamani papala töpönö oveja kökö pewö totiapalati pölati i töpö mö tasopö töna iamö kamani ula Jose pi ipawi ia simönöma.

Jose manimoiaja, i töpö pewöna a mani kaikamoma tö kuoma, inatö kua naiataja kamani pöanö Jose pi satia apa asa, inatö kuaiaja kamani papala töpönö a nisi taö öpama. Kamani papala töpö kuo tasopa Jose walokö tasoiaja, i töpönö sotawö a uma apa pölataja a jua sotakönö, noami ipi sanöma töpö tatamopö töna töpö noa taöwi i töpöna a noa ta sotamanöma.

Saiana Jose papala töpö ju koonö piasalo, Jose jalonoi ösö kakapalönö saloa cabra iipö waninö ösö juluka sotalöma. Inatö kuanö, ai saloa wani waitili ipi a waninö Jose söa jatopalöma kamani pöa pi ku upapö töna i jalo ösö möma sotama. Jacob pi jonipo totio opama.

Noami ipi sanöma töpö tatamopö töna töpö noa taöwi i töpönö Egipto tö ulina Jose sulölöma. Egipto tö uli pilapalo totio opaö, tö uli pata pe epö inatö kuoma, Nilo matu jilo pata kuawi itu kasö patana itö uli kua. Jose noa tapalönoi i töpönö, kaikana töpöna a tatamo sötapalo naiowi ana Jose noa tapamanöma. Kamani kaikanatö simoiaja toita api Jose nö tö tama totiatalo opatima, ina a kuaiaja Tiosö nö Jose totiapalatima.

Jose na kamani kaikanatö pusupa mai saka pi topa apama, maike inatö kuawi töna Jose nö Tiosö na wanisanatö tapa wani ipama. Itö pina ia pi jisujupalonö, Jose julönö a pöka kasömaköpö tö pi ipa salo jolisi töna a namo sima sotaköma. A pöka kasöa pölata maike, Tiosö na pitilita a pi ku satia totio opaiaja Tiosö nö a totipala apama.

Jose nö ai wanisanatö tama pasio ma apa puo noia maike polakapi inamatö jasupasonoia, a pöka kaso soama. Faraon, ina Egipto tili töpönö kamani kaikana töpö jilo tatama, aitö mumina polakapi ia manimo pi kua jalupasoiaja pe epi a pi kupalo totio opama. Kamani i töpö pi tao opawi töpö kule i töpönö i manitö wösöpö tö jatuko ma apama.

Jose nö manimowi itö pewö wösö taö öpapö töna Tiosö nö tö totoköma tö kuoma, inatö kuaiaja, pöka kasötawi ia sai patana faraon nö Jose nakalö tasoma. Jose nö i manitö pewö wösö jötonö: “Tiosö nö nitö jaö topa apapö töna siete (7) inamatö simöpa piaköle, itö nojana nomö sotawö nitö jaö ma apapö töna siete (7) inamatö simöpa nomo sota piaköle.” Ina a kuma.

¡Jose na faraon pi mönaja totia apa salo Egipto tö uli pewöna a kaikanamowi a ta sotalöma!

Sanöma töpönaja i siete (7) inama töna nitö jaö toita api itö inama pewöna pe toti ipi nitö simoma totio opaje, ina Jose kuma. Itö nojana, siete (7) inama töna nitö jaö mi ipi itö inama waloköiaja, sanöma töpö nitö kuo jötopö töna, Jose nö nitö noa tama sotama.

Nitö mi ipi i Egipto tö ulina itö kuo sisa ma apama, Canaan tö ulina Jacob nö kamani i töpö kai pewö kule ia nitö ma apa naio tasoma.

Inatö kuaiaja, Egipto tö ulina nitö noa tapalö tasopö töna Jacob nö kamani ulu pata töpö simönöma. Kamani papala töpönö Jose na nitö noa taö köle maike, ji ipa poosa jatowö töpö pi ku ma apama. Maike, ji ipa papala töpö ina Jose pi upa asama.

Ipa papala töpö pi ku toita apö ko waikö jatö kötö a pi ku upa salo töpö wapa totio opa paionö, itö nojana i töpönaja: “¡Kamisa kamakö i pooso Jose sa! Pö kiliti. ¡Kamakanö kamisana wanisana matö tama pi topa apa salo noami ipi sa tatamotipö töna kamakanö sa noa tapamanö köpöli, maike Tiosö nö toita api tö tama piasalo i wanisanatö kuo puoma! Kamisanö kamaka, kamaka ai töpö, i makö pewöna ni satö totomapö töna jisa Egipto tö ulina pö kua naiköso.” Ina Jose kuma.

Kama töpö saipö namö Jose papala töpö jua kononönö kamani pöa Jacob na, Jose kua soa kölai töpö ku ko tasoiaja a pi mönaja totio opama.

Jacob patasipö toti pölata maike, Egipto tö ulina kamani i töpö kai pewö wasimö ikukönö, ia töpö pewö kukö tasoma. Jacob nomaso piasalo kamani ulu töpö kua topa jaiopö töna a japalo jötöja totipasoma.

Satö tama totio opa piasalo Abraham na Tiosö kunoi, itö liki Isaac na itö tota nomököma, itö nojana Jacob itö kua nomöpasoma, itö nojana doce (12) Jacob ulu töpö, kamani ai töpö pewö, ina kipi töpö itö kua noma sotasoma. I doce (12) töpö i ulu töpö ola pewö salekepalonö, doce (12) kamani itö uli pewö ta jötöja soköma.