Tiosö nö Moises nakanoi itö

Jose nomasoiaja, Egipto tö ulina kamani i töpö pewö kua jipasoma. Ia sateje epi inama töna, kamani i töpö, kamani ulu töpö ola ina kipi töpö kutiopaja, sateje epi kamani ulu töpö ola kua totipasoma. I töpö liki Israel töpö jilo kuo pasioma.

Sateje toti ipi inamatö jasua totipasonoia, Israel tili töpö pala totisoma. Jose nö tö pewö tamanoi i Egipto tili töpönö itö pewö taimio opama. Israel tili töpö pala totio opaiaja, i töpö kili ipama. Inatö kuanö, itaja Egipto tö ulina faraon kaikanamo pöle ianö noami ipi Israel tili töpö tatamowi töpö ta sotalöma.

Israel tili töpönö saipö pata lape toti ipi saipö pata öpamapö töna Egipto tili töpönö lotete toti ipi töpö sima totio opama, ai tiko somitö uli pata tama totio opa naioma. Tatamowi tö jatuku mi ipi tö tama totio opa kötönö töpö pi jonipo totio opama, maike Tiosö nö töpö pasiliapala jöto kötönö, kama töpö ulupö pala totio opa alöma.

Israel tili töpö ulu pala totiomati, i faraon kaikananö itö tapa totio opa salo, kama töpönaja, Israel tili töpö sunö wanoa oso tapalöiaja ma töpö oso sönö Nilo tu patana ma töpö oso sösaja soatalo pökö, ina a kuma.

Ai Israel tilitö sunö ai ula osowai tapalöma. Ia, kamani panopa ina kipi töpönö awai sosapalama jötötioma.

I ulawai pö töpönö awai sosapalamapö tö jatuka mapasoiaja, awai söpa ma apapö töna ai wöawai kalöwi toina awai titikönö Nilo tu kasö patana jitipö osowai kuo opapaja a piwai ka sotaköma. Kamani pasi pata wainö a piwai tapala jötötioma.

Faraon ai pateanö i wöawai talalönö tö osimöwai mö sotama. Ulawai talalönö, kamani ula saiwai kulena ina a wai ta sotalöma. Awai satiapalamapö töna ianö ai Israel tilitö su naka sotalöma, i sua liki i ulawai pöpöna kuo jatoma. Ula piwai patajapalonö kamani pöpöna paluku su pi kota ma apaiaja, faraon pateana awai tota koköma, ianö Moises a jilowai ta sotalöma.

Moises pata apö waikiiaja, aitö wakalana ai Egipto tilitönö ai Israel tilitö sötipaja tö talalöma. Moises nö kamani ai Israel tilitö noama jötoma.

Ai tönö sa ta jatoa maikötö Moises pi ku upa salo, i Egipto tilitö söpalönö a patilia sotaköma. Maike ai tönö Moises nö tö tama pöle itö ta pasio jatotioma.

Moises nö tö tamanoi i faraon nö itö jininönö, a söpa pi topa apama. Faraon löapalawi i töpönö a söpa ma apapö töna pölösa patanamö Moises toka sotasolöma.

Egipto tö uli paja apa tasopamö pölösa patana Moises nö oveja kökö totiapalawi a kupaso tasoma. Itö ulina ai sutö kuowi a sulönö polakapi kamani ulu kökö taköma.

Aitö wakalana Moises nö oveja kököwani totiapalatitaja, ai jiti waina koataka jili pölati itö talalöma. Maike i jitiwai isi ma apama. Moises nö itö mö jöka pi topa apa salo a öpa jöka toitakö tasoma. I jiti jili pöle ia a öpa jöka toitakö tasonoiaja, Tiosö japalo sotalonö: “Moises, wa amösökö jalole itökö jasupalö. Ipatö uli ausi ipapa wa öpa köle.” Ina a ku sotama.

Ia naja: “Ipa sanöma töpö wasiso totia apöle i satö tapa apa köle. Egipto tö ulina noami ipi Israel tili töpö tatamo toitile i wa töpö ta kopalöpö töna faraon kaikanana wa simöpa piaköle. Satö uli totokö piasalo Abraham, Isaac, Jacob ina kipi töpöna sa kutinoi, i Canaan tö uli liki, i töpöna i satö uli totokö piasalo." Ina Tiosö kuma.

Moises japalo jötonö: “Sa sima pöle sanöma töpönö ia taöpo pi topa apa könaja, ¿Wina sa ku jöto piasalo?” Ina a kuiaja: “KAMISA LIKI, I KAMISA SAI. Ina a kunö, i töpönaja: ‘KAMISA patanö kamakana sa simöpalö ke.’ Ina wa kunö: ‘KAMISA LIKI I Pata sa, kamaka i kolo pata töpö Abraham, Isaac, Jacob, i töpö i Tiosö sa.’ Ina sa jilo ku sotio piasalo.” Ina wa ku naio pökö, Tiosö kuma.

Sa japalo topa jato maikötö Moises pi ku upanö a kili ipa salo faraon na a ju kili ipa alöma, inatö kuaiaja, a pasiliapala jötopö töna Tiosö nö Moises papala Aaron sima naipalöma. Moises, Aaron ina kipi töpönaja, pitilitaja faraon ma pi tama jaöta maikötö, ina Tiosö ku sotasoma.