15. ୧୫. ହ୍ର୍ମାଣ୍ କ୍ଲା ଦେଶ୍
ସ୍ରାସ୍ରି ହ୍ଚେ ସ୍ବୁବ୍ଳାର୍ ଦେଶ୍ କିଣାନ୍ ଲ୍ଗେ ଇସ୍ରାଏଲ୍ ଲକ୍ମ୍ନ୍ ହୁର୍ତାର୍ ଗଟେକ୍ ପ୍ରକୁଷ୍ଟ ସ୍ମୟ ରିଲି। ଦୁର୍ଳ ପ୍ରାଚୀର ଦ୍ବାରା ପରିବେଷ୍ଟିତ କିଣାନିୟ ସହର୍ ଯିରୀହର ଗାମା ବିଷୟେ କ୍ଜ୍ତାର୍ ଗିନେ ଯିହଶୁୟ ଦୁଇଲକ୍ ଲୁକ୍ଣେ ଚର୍ତା ଲକେ ହ୍ଟାଇଲା। ସେ ଗାମେ ରାହବ ନାଉର୍ ଗଟେକ୍ ବେସ୍ୟାରିଲା ଯେ ସେ ଲୁକ୍ଣେ ଚର୍ତା ଲକ୍ମ୍ନ୍କେ ଲୁକାମ୍ ହାରେ ସେମ୍ନ୍କେ ଲୁକିକ୍ରି ହ୍ଳାଉତାର୍ ଗିନେ ସାଇଜ କ୍ଲା। ସେ ଅନ୍କ୍ରି କ୍ଲା, କାଇତାକ୍ ସେ ଇଶ୍ୱରାର୍ ତ୍ଇ ବିଶ୍ୱାସ୍ କ୍ଲା। ସେମ୍ନ୍ ଯେ ରାହବ ଆର୍ ତାର୍ ପରିବାର୍କେ ସୁରକ୍ଯା ଦେତି। ଇସ୍ରାଏଲ୍ ଲକ୍ମ୍ନ୍ ଜ୍ଡେବ୍ଳ୍ ଯିରୀହକେ ନ୍ଷ୍ଟ କ୍ର୍ତି ବ୍ଲି ଇରି ହ୍ର୍ମାଣ୍ କ୍ଲାଇ।
ଇସ୍ରାଏଲ୍ ଲକ୍ମ୍ନ୍ ନିଜାର୍ ଦେଶେ ଜାତାର୍ ଗିନେ ଯର୍ଦନ ଗାଡ୍ ଲିଙ୍ଗୁକେ ହ୍ଳିରିଲି। ଇଶ୍ୱର୍ ଯିହଶୁୟକେ କଇଲା, “ଯାଜକ୍ମ୍ନ୍ ହ୍ର୍ତୁ ଜ୍ଅତ୍। “ଯାଜକ୍ମ୍ନ୍ ଜ୍ଡେବ୍ଳ୍ ଯର୍ଦନ ଗାଡେ ହାଦ୍ ଦେମ୍କେ ଆରମ୍ କ୍ଲାଇ, ସ୍ଡେବ୍ଳ୍ ଉହ୍ରେ ରିଲା ହାଣି ଜ୍ମ୍କେ ବ୍ନ୍ଦ୍ ଅଇଲି ଜ୍ନ୍କ୍ରି କି ଇସ୍ରାଏଲ୍ ଲକ୍ମ୍ନ୍ ଶୁକ୍ଲା ବୁଇଁଏ ଇଣ୍ତି ଇଣ୍ତି ଯର୍ଦନ ଗାଡ୍ ପାର୍ ଅଉତି।
ଲକ୍ମ୍ନ୍ ଯର୍ଦନ ଗାଡ୍ ଲାଙ୍ଗ୍ଲା ହ୍ଚେ, ଶ୍କ୍ତି ଶାଳି ଗାମ୍ ଯିରୀହକେ କ୍ନ୍କ୍ରି ମାରୁକେ ଅଇଦ୍ ସେରି ଇଶ୍ୱର୍ ଯିହଶୁୟକେ କଇରିଲା। ଲକ୍ମ୍ନ୍ ଇଶ୍ୱରାର୍ ଆଦେଶ୍ ମାନ୍ଲାଇ। ଇଶ୍ୱର ଜ୍ନ୍କ୍ରି କଇଲା, ସେଅନୁସାରେ ସେନାମ୍ନ୍ ଆର୍ ଯାଜକ୍ମ୍ନ୍ ଦିନ୍କେ ତରେକ୍ ଏନ୍କ୍ରି ଛ’ ଦିନ୍ ଯିରୀହ ଗାମେ ଚାରିଦିଗେ ବୁଲ୍ଲାଇ।
ତାର୍ହ୍ଚେ ରଇବାର୍ ଦିନ୍, ଇସ୍ରାଏଲ୍ ଲକ୍ମ୍ନ୍ ସାତ୍ ତର୍ ବୁଲ୍ଲାଇ। ଜ୍ଡେବ୍ଳ୍ ସେମ୍ନ୍ ଗାମାର୍ ଚାରିଦିଗେ ସ୍ରାସ୍ରି ହାଇଁ ବୁଲ୍ଲାଇ, ସ୍ଡେବ୍ଳ୍ ସେନାମ୍ନ୍ ଜିତ୍ଲା ସ୍ର୍ଦା କ୍ଲାଇ ଆର୍ ଯାଜକ୍ମ୍ନ୍ ସେମ୍ନ୍କାର୍ ମରି ବାଜାଇ ଲାଇ।
ସ୍ଡେବ୍ଳ୍ ଯିରିହ ପ୍ରାଚିର୍ମ୍ନ୍ ଟଳି ଅଦୁର୍ଲି! ଇଶ୍ୱରାର୍ ଆଦେଶ୍ ଅନୁଜାଇ ଇସ୍ରାଏଲ୍ ଲକ୍ମ୍ନ୍ ଗାମା ସ୍ବୁ ଜିନିଷ୍କେ ନ୍ଷ୍ଟ କ୍ଲାଇ। ସେମ୍ନ୍ ମ୍ତର୍ ରାହବ ଆର୍ ତାର୍ ପରିବାର୍କେ ର୍କ୍ଯା କ୍ଲା, ଜୁଇଲକ୍ମ୍ନ୍ ଇସ୍ରାଏଲର୍ ବାଗ୍ ଅଇଲାଇ। କିଣାନ୍ ଦେଶେ ରେତିରଲା ବିନ୍ ଲକ୍ମ୍ନ୍ ଜ୍ଡେବ୍ଳ୍ ଶୁନ୍ଲାଇ ଯେ ଇସ୍ରାଏଳ୍ ଲକ୍ମ୍ନ୍ ଯିରୀହକେ ନାଶ୍ କ୍ଲାଇ ଆତ୍ତି, ସେମ୍ନ୍ ଡିର୍ଲାଇ ଯେ ଇସ୍ରାଏଲ୍ ଲକ୍ମ୍ନ୍ ସେମ୍କେ ହେଁ ମାର୍ତି।
କିଣାନାର୍ କୁଇ ଲକ୍ଦ୍ଳ୍ ସ୍ଙ୍ଗ୍ ଶାନ୍ତି ଚୁକ୍ତି ନ୍କେର୍ତାର୍ ଗିନେ ଇଶ୍ୱର୍ ଇସ୍ରାଏଲ୍ ଲକ୍ମ୍ନ୍କେ ଆଦେଶ୍ ଦେଇରିଲା। ମ୍ତର୍ ଗିବିୟନ ନାଉର୍ ଗଟେକ୍ କିଣାନାର୍ ଲକ୍ଦ୍ଳ୍ ଯିହଶୁୟକେ ମିଚ୍ କଇଲାଇ ଯେ ସେମ୍ନ୍ କିଣାନେ ହ୍ଣି ବେଶି ଦୁରିରିଲା ଗଟେକ୍ ଜାଗାଇ ହ୍ଣି ଆଇଲ ଆତ୍ତି। ସେମ୍ନ୍ ଯିହଶୁୟକେ ସେମ୍ନ୍କାର୍ ସ୍ଙ୍ଗ୍ ଗଟେକ୍ ଶାନ୍ତି ଚୁକ୍ତି କ୍ର୍ତାର୍ ଗିନେ କଇଲା।
ଗିବିୟନୀୟମ୍ନ୍ କୁଇତି ହ୍ଣି ଆସି ରିଲାଇ ସେରି ଯିହଶୁୟ ଆର୍ ଇସ୍ରାଏଲ୍ ଲକ୍ମ୍ନ୍ ଇଶ୍ୱର୍କେ ହ୍ଚାରି ନ୍ରିଲାଇ। ସେତାକ୍ ଯିହଶୁୟ ସେମ୍ନ୍କାର୍ ସ୍ଙ୍ଗ୍ ଗଟେକ୍ ଶାନ୍ତି ଚୁକ୍ତି ତିଆର୍ କ୍ଲାଇ। ଗିବିୟନୀୟମ୍ନ୍ ସେମ୍ନ୍କେ ପ୍ରତାରଣା କ୍ଲାଇ ଆତ୍ତି ବ୍ଲି ଇସ୍ରାଏଲ୍ ଲକ୍ମ୍ନ୍ ଜ୍ଡେବ୍ଳ୍ ଜାଣୁକେ ହାଇଲାଇ ସେମ୍ନ୍ ରିସା କ୍ଲାଇ, ମ୍ତର୍ ସେମ୍ନ୍ ସେମ୍ନ୍କାର୍ ସ୍ଙ୍ଗ୍ କ୍ରିରିଲା ଶାନ୍ତି ଚୁକ୍ତି ର୍କ୍ଯା କ୍ରିରିଲା କାଇତାକ୍ ଇରି ଇଶ୍ୱରାର୍ ଗଟେକ୍ ଆଦେଶ୍ ରିଲି। ଅଳକ୍ ହ୍ଚେ, କିଣାନ୍ ଦେଶେରେତା ଅମରୀୟ ନାଉର୍ ବିନ୍ ଲକ୍ ଦ୍ଳାର୍ ର୍ଜାମ୍ନ୍ ଶୁନ୍ଲାଇ ଯେ ସେମ୍ନ୍ ଇସ୍ରାଏଲ୍ ଲକ୍ମ୍ନ୍କାର୍ ସ୍ଙ୍ଗ୍ ଗଟେକ୍ ଶାନ୍ତି ଚୁକ୍ତି ତିଆର୍ କ୍ଲାଇ ଆତ୍ତି, ସେତାକ୍ ସେମ୍ନ୍ ସେମ୍ନ୍କାର୍ ସେନାମ୍ନ୍କେ ଗଟେତ୍ଇ କ୍ରି ବେଶିବ୍ଡ୍ ସେନାଦ୍ଳ୍ କ୍ରି ଗିବିୟନ୍କେ ଆକ୍ରମଣ୍ କ୍ଲାଇ। ଗିବିୟନମ୍ନ୍ ଯିହଶୁୟାର୍ ଲ୍ଗେ ସାଇଜର୍ ଗିନେ ହଟେକ୍ କ୍ବର୍ ହ୍ଟାଇଲାଇ।
ସେତାକ୍ ଯିହଶୁୟ ଇସ୍ରାଏଲ୍ ସେନାମ୍ନ୍କେ ଗଟେତ୍ଇ କ୍ଲା ଗିବିୟନୀୟ ମ୍ନ୍କାର୍ ଲ୍ଗେ ହଚ୍ତାର୍ ଗିନେ ରାତି ସ୍ଗୁଳ୍ ଇଣ୍ତଲାଇ। ବର୍ ସ୍କାଳ୍ ସେମ୍ନ୍ ଅମରିୟ ସେନାମ୍ନ୍କେ କାବାକ୍ରି ସେମ୍ନ୍କେ ଆକ୍ରମଣ୍ କ୍ଲାଇ।
ଇଶ୍ୱର୍ ସେଦିନ୍ ଇସ୍ରାଏଲ୍ ଲକ୍ମ୍ନ୍କାର୍ ବାଟ୍ ଯୁଦ୍ କ୍ଲାଇ। ସେ ଅମରିୟ ସେନାମ୍ନ୍କେ ଦ୍ନ୍ଦାଇ ହ୍କାଇଲାଇ ଆର୍ କ୍ରା ଟେଡା ମାର୍ଲାଇ ଜୁଇରି ବେଶି ଅମରିୟମ୍ନ୍କାର୍ ଜୀବନ୍ ନେଇରିଲି।
ଇଶ୍ୱର୍ ଆକାଶେ ବେଳ୍କେ ଗଟେ ଜାଗାଇ ତେବାଇ କ୍ରି ର୍କ୍ଲାଇ ଜ୍ନ୍କ୍ରି କି ଇସ୍ରାଏଲ୍ ବେଶି ସମୟେ ଅମରୀୟମ୍ନ୍କେ ପୁରାପୁରି ବାବେ ଆରାଉତି। ସେ ଦିନ୍ ଇଶ୍ୱର୍ ଇସ୍ରାଏଲ୍ ଗିନେ ଗଟେକ୍ ଚ୍ମତ୍କାର୍ ଉଦାର୍ ହାଇଲାଇ।
ଇଶ୍ୱର୍ ଇସ୍ବୁ ସେନାଦ୍ଳ୍କେ ଆରାଇଲା ହ୍ଚେ, ଆରେକ୍ କିଣାନ୍ ଦେଶାର୍ ଲକ୍ଦ୍ଳ୍ ଇସ୍ରାଏଲ୍ ଲକ୍ମ୍ନ୍କେ ଆକ୍ରମଣ୍ କ୍ର୍ତାର୍ ଗିନେ ଗଟେତ୍ଇ ରୁଣ୍ତଲାଇ। ଯିହଶୁୟ ଆର୍ ଇସ୍ରାଏଲ୍ ଲକ୍ମ୍ନ୍କେ ଆକ୍ରମଣ୍ କ୍ଲାଇ ଆର୍ ନ୍ଷ୍ଟ କ୍ଲାଇ।
ଇ ଜୁଜ ସ୍ରାଲ୍ ହ୍ଚେ, ଇଶ୍ୱର୍ ଇସ୍ରାଏଲ୍ ସ୍ବୁ ଜାତିକେ ସ୍ବୁ ଦେଶାର୍ ନିଜାର୍ ନିଜାର୍ ବାଗ୍ ଅନୁସାରେ ଦିଲା। ଇତାର୍ ହ୍ଚେ ଇଶ୍ୱର୍ ଇସ୍ରାଏଲ୍ ସ୍ନ୍ଦିଲ୍ଗେ ରିଲା ସ୍ବୁ ଦେଶାର୍ ଶାନ୍ତି ଦିଲା।
ଯିହଶୁୟ ଜ୍ଡେବ୍ଳ୍ ବୁଡା ଅଇଲା, ସେ ଇସ୍ରାଏଲ୍ ଦେଶାର୍ ସ୍ବୁ ଲକ୍କେ ଗଟେତ୍ଇ କ୍ରି କୁଦ୍ଲାଇ। ତାର୍ହ୍ଚେ ଇଶ୍ୱର୍ ଇସ୍ରାଏଲା ଲ୍କ୍ମ୍ନକାର୍ ସଙ୍ଗ୍ ସୀନୟ ଡଙ୍ଗ୍ରେ ଜୁଇ ନିୟମ୍ କ୍ରିରିଲାଇ ସେ ନିୟମର୍ ଗିନେ ଲକ୍ମ୍ନ୍କାର୍ ପ୍ରତିବନ୍ଧତା ବିଷୟେ ସେମ୍ନ୍କେ ଏତାଇ ଦିଲାଇ। ଲକ୍ମ୍ନ୍ ଇଶ୍ୱରାର୍ ଗିନେ ବିଶ୍ବାସି ରେମ୍କେ ଆର୍ ତାର୍ ନିୟମ୍ ସ୍ବୁ ବ୍ଯବହାର୍ କ୍ରୁକେ ହ୍ର୍ମାଣ୍ କ୍ଲା।
ବାଇବଲାର୍ ଗଟେକ୍ କ୍ତା:ଯିହଶୁୟ ୧-୨୪
Free to use, adapt, and share under an open license (CC BY-SA 4.0).