50. यीशु थौक्सिगै रायंग

लगभग निसे हजार यीन ची, दुनिया कौ जम्मा बंग कौ मथै चंग मथै मी मसीह यीशु गै बारै कौ बुदै जबाब यन्गै तातन्नौ, कलीसिया उन्नति सुगै तातन्न, यीशु सै वादा हुग्सौ की अती दुनिया गै अंत थौक्सियंग,यधपि अति इता थौक्सिगै मरायंग, तौभी अती अपीगै वादा पूरा सुगयंग,

जब कि इन यीशु गै थौक्सिगै रागंन लुकै रिन्चिगै निन्चौ, परमेश्वर इन तै अइना रीति गै जीवन टंग्म गै लिकंन, जई पवित्र लै हंग जइसै उगै आदर सुग्ता, जब यीशु पृथ्वी कौ बस्कै निसौ अतलंग उसै लुक्सौ, ‘जिगै ड़ग्मी दुनिया कौ जम्मा बंग गै मी मंग जा परमेश्वर गै राज्य गै बारे कौ बुदै जबाब प्रचार सुग्यंग हंग अतलंग अंत रायंग ,

मथै जातियों सै इता वासै यीशु गै बारै कौ मयन्दै इन्न, स्वर्ग कौ थौक्सिगै दैम चंग लरै, यीशु सै मसीहियों सै उसी मी मंग जा बुदै संदेश लौयो लुक्सौ जइ मंग सै अइजा खजा री मयन्दै निसौ , उसै लुक्सौ, दिनी हंग जम्मा जाति गै मी मंग जा डग्मी बनाम, ‘हंग’ गोंम गे दग्ची रै कमिन्त इन,

यीशु सै अइ री लुक्सौ, खमी मी गै सेवक अपीगै स्वामी चंग पौदै मलै, अइ दुनिया गै जरूरी मी मंग सै जितै नफरत हुग्सौ , हंग जिगै कारण उसै गनिजा री सतायंग हंग सतैयंग, अइ दुनिया कौ गनी क्गयगंनी, परन्तु तरथै लिनी, खव्की जिसै सिना जा हराक्सौ, जइ सै अइ दुनिया कौ शासन सुग्ता, गनि अंत वासै जितै विश्वास लायंक नियंगनी ता परमेश्वर सै गनिजा बचायंग,

यीशु सै अपीगै डग्मी मंग जा अइ समझाम दग्ची तिगै कथा सुनासौ की जब दुनिया गै अंत लिकंन ता मी मंग तै जौरौ खै लैयंग,उसै लुक्सौ, खमी मी सै अपीगै रैजा कौ बुदै पिजै यीब्सौ, जब अती लयंकतै निसौ ता उगै शत्रु रासौ हंग रजै गै पिजै गै गुन्दा कौ जगंल ची जरी गै पिजै मंग यिब्सौ, हंग अति दैसौ,

‘जब जरी अंकुरित लिच्चौ ता सेवक सै अती मी जा लुक्सौ, ‘ऐ स्वामी, गन्सै ता अपीगै रै कौ बुदै पिजै कयीब्तै निनिसौ, ता हंग अइकौ जगंली जरी खऊ इन; अती मी सै जबाब दासौ, केवल जिगै शत्रु मंग सै लंग यिब्यंगन्न, अइ जिगै अनई शत्रु लै जइसै अइना हुग्सौ,

‘उसी सेवक मंग सै अपीगै स्वामी जा जबाब दासौ, ‘खै इन्जा जगंली जरी जा पुबतिम लै, ‘अती स्वामी सै लुक्सौ’ मादै गन्सै अइना सुग्यंग्नौ ता गन्सै दुमा रजै री पुब तरखनौ, कटाई गै बकतर रिनचिनी, अतलंग जगंली जरी जा थुम्नी खव्की उसी मै पै तरसियंगनी, परन्तु रजै जा जिगै रेजा रकै रनी,

डग्मी सै अइ कथा गै मतलब जा मसमझसौ, अइदग्ची उसीसै यीशु सै उसीजा समझाम गै निवेदन हुग्सौ, यीशु सै लुक्सौ’ ‘बुदै पिजै यिब्म वाला मी मसीह गै प्रतिनिधित्व कसुग्दै इन, रे दुनिया गै प्रतिनिधित्व सुग्ता बुदै पिजै परमेश्वर गै राज्य गै मी मंग गै प्रतिनिधित्व सुग्दै लै,

“जगली ज़री अती दुष्ट जन, सिना गै मी मंग गै प्रतिनिधित्व सुग्तन्न, अती मी गै शत्रु सिना गै प्रतिनधित्व सुग्ता हंग कटाई सुग्दै वाला परमेश्वर गै स्वरगदूत गै प्रतिनिधित्व सुगतन्न|”

जब दुनिया गै अंत लियंग ता स्वर्गदूत उसी जम्मा मी मंग जा तिगै जोरौ थुम्गै तायंग जइ सिना गै लै, अती स्वर्गदूत उसीजा तिगै मथै लुग्दे मै कौ क्चगंतै,अतकौ उसी मी मंग भयंकर सताव कौ तैयंगन्न हंग अपीगै सौ यीय्गंन्न, परन्तु जई मी धर्मी इन, जइ मंग सै यीशु गै अनुसरण कसुग्दै इन, उसै उसीगै परमेश्वर पिता गै राज्य कौ नी गै रोकतै ड़ौयंगन्न,

यीशु सै अइना री लुक्सौ की उसै दुनिया गै अंत सुग्म चंग लरै पृथ्वी कौ रायंग, औ अती ठुम सै थौक्सिगै रायंग जसौ औ पुदैदै निसौ, अर्थात, उगै तुतौ वास्तविक शरीर नियंग, हंग अती तिम्बु कौ कसा कौ हुक्सीगै रायंग, जब यीशु थौक्सीगन, ता हर तिगै मसीही जइ पंज्यंग्तै इन पज्यंग्तै कौची टग्यंगन्न हंग अतीतै तीम्बु कौ छैयंगनै,

जइ मसीही इता री टग्दै इन औ तीम्बु कौ अगंतैयंग हंग अती निसै मसीहियों तै जोरौ शामिल लैयंगन्न जइ पज्यंतै कौची टग्यंग,अती जम्मा अतकौ यीशु तै जोरौ नियंगन्न, अतीकै निग्म, यीशु अपीगै मी मंग तै जोरौ नियंगन्न, जब उसी तै जोरौ बस्कन्न, ता उसीजा हमेशा दग्ची पूरौ शान्ती लियंग,

यीशु सै अती जा विश्वास सुग्दै वाला जम्मा तिगै जन जा तिगै मुकुट दाम गै प्रतिज्ञा कसुग्दै इन, औ हमेशा दग्ची परमेश्वर तै जोरौ जम्मा तिगै बत्थौ कौ शासन सुगयंग, उसीगै नैरौ सिद्ध सन्ति लैयंग,

परन्तु परमेश्वर अती जम्मा गै न्याय सुग्यंग जइ सै यीशु गै विश्वास मुसुग्तन्न, उसै उसीजा नरक कौ मौक्तैयंग, अतकौ उसी तैयंगन्न हंग अपीगै सौ यीलयंगन्न, हंग उसी राज्यारी कंगयंगन्न, खजा री मुबुझतै वाला मै उसीजा लगातार चिगै तायंग, हंग निबु उसीजा जाम सै खजा री मुरूकयंग,

जब यीशु थौक्सीयंग ता अती जम्मा रीति सै सिना जा उसीगै राज्य जा नष्ट सुग्तैयंग, अती सिना जा नरक कौ मौक्तैयंग, अतकौ सिना राज्यारी दग्ची लुखै नियंग, उसी जम्मा तै जोरौ जइसै परमेश्वर गै कथा मान्म गै बजाय सिना गै निम्फन यन्सिम गै चुनाव कसुग्दै इन,

खव्की आदम हंग हव्वा सै परमैश्वर गै अनाज्ञाकारी कसुग्दै निसौ, हंग पाप जा अइ दुनिया कौ रकै पिरादै निन्चौ, परमेश्वर सै अतीजा श्राप दासौ हंग उजा न्ष्ट सुग्मौ गै निर्णय हुग्सौ, परन्तु खज्या निछै परमेश्वर तिगै नुदै स्वर्ग हंग तिगै नुदै पृथ्वी गै रचना सुग्यंग जइ सिद्ध लैयंग,

यीशु हंग उसीगै मी मंग अती नुदै पृथ्वी कौ बसयंग, हंग औ राज्यारी दग्ची जम्मा बथ्थौ कौ शासन सुग्यंग, अती मी मंग गै मिकौ ची तिगै मित्ती जा सितैयंग, थन खमी री क्गथै या दु खी मुनीयंग, उसी मितैयंगन्न, उसी मक्यंगन्न या मिहिचियंगन्न, हंग अतकौ खइ री यदै कथा मलैयंग, यीशु अपीगै राजु जा न्यायपूर्क हंग शान्ती तै जोरौ शासन सुग्यंग, अती हमेशा गै दग्ची अपी मी मंग तै बसैयंग,