33. एकठे किसान के कहानी

एक दिन, यीशु झील के किनारे के पास रए हें । व मनईन के एकठे बहुत बड़ी भीड़ का शिक्षा देत रए हें । उन्हीं सुना के लाने एतना सारा मनई आए कि यीशु के पास ऊँ सब से बात करा के लाने जगह न बचो । एहीसे व पानी म खड़े नाव म चढ़ गें । वहाँ ऊँ बईठ गें अऊ मनईन क शिक्षा दईन ।

यीशु उन्ही य कहानी सुनाईन, "एक किसान बीज बोम के लाने बाहर निकलो । जब व हाथ से बीजन क बिखेरत राओ ह त कुछ बीज मार्ग म गिरो । पर पक्षि आके सब बीजन क खा लईन ।"

"दूसर बीज पथरीली भूइयाँ गिरो जहाँ बहुत कम माटी रओ ह । पथरीली भूईयाँ म गिरे बीज बहुत जल्दी अंकुरित होई ग, पर उनखर जड़ भूईयाँ म गहराई म जाएं म सक्षम नई रहो । जब सूर्य निकलो अऊ गर्मी भ त ऊँ पऊधा मुरझा गें अऊ मर गें ।"

"दूसर बीज झाड़ी के बीच म गिरो । ऊँ बीज बढ़ा का आरम्भ करीन, पर काँटा उनही दबा दईन । एसे काँटादार भूईयाँ म गिरो बीज म से निकलो पऊधा म से कोनो भी अनाज पईदा नई कर पाईस ।"

"दूसर बीज अच्छा भूईयाँ म गिरो । ऊँ बीज बढ़ीन अऊ जेतना बीज बोओ ग रओ ह उनमन से 30, 60, अऊ यहो तक कि 100 गुना अनाज उत्पन्न करीन । जऊन कोऊ भी परमातिमा के पीछे चला का चाहत ह, व य बात म ध्यान दे जऊन मैं कहत हों!"

य कहानी चेला क उलझन म डाल दईस । एसे यीशु व्याख्या करीन, "व बीज परमातिमा के वचन हबा । व मार्ग एकठे आईसा मनई ह जऊन परमातिमा के वचन क सुनत ह, पर ओही समझा नई । तब शैतान ओखे पास से वचन क चुरा लई जात ह । अर्थात शैतान ओही वचन क समझा से दूर रखत ह।"

"वह पथरीली भूईयाँ आईसा मनई ह जऊन परमातिमा के वचन क सुनत ह अऊ आनन्द के साथ ओही स्वीकार कर लेत ह। पर जब मुश्किल समय आऊत ह, या जब दूसर मनई ओही सताऊत ह, त व परमातिमा से दूर चलो जात ह । अर्थात व परमातिमा के ऊपर भरोसा करा क बंद कर दे था ।"

"व काँटादार भूईयाँ अईसा मनई ह जऊन परमातिमा के वचन क सुनत ह । पर व बहुत सारा बातन के बारे म चिन्ता करा क आरम्भ कर दे था, अऊ व बहुत से धन कमाए के परयास करत ह, अऊ व बहुत से चीजन क पामा क परयास करत ह । कुछ समय के बाद, अब व परमातिमा क प्रेम करे म सक्षम नई रहत ह । एहीसे जऊन व परमातिमा के वचन से सीखे रओ ह व ओही परमातिमा क प्रसन्न करे म सक्षम नई करा था । व गेहूँ के डंठल के समान ह जऊन कोऊ अनाज उत्पन्न नई करत ह ।"

"पर अच्छा भूईयाँ व मनई ह जऊन परमातिमा के वचन क सुनत ह, ओखे ऊपर विश्वास करत ह, अऊ फल उत्पन्न करत ह।"