38. यीशु क पकड़वाओ जात ह

हर साल, यहूदी मनई फसह का पर्व मनाऊत रए हें। य एखे बारे म एकठे उत्सव रओ ह कि केतना शताब्दि पहिले परमातिमा उनखे पूर्वजन क मिस्र के गुलामी से छुड़ाय रए हें । लगभग तीन साल के बाद यीशु सार्वजनिक रूप से प्रचार करा अऊ शिक्षा दें क सुरु करीन। यीशु अपन चेलन क बताईन कि व उनखे साथ यरूशलेम म फसह के पर्व क मनामा चाहथें, अऊ य भी कि व हुन मार डालो जाए।

यीशु के चेला म एकठे यहूदा नाम के मनई रओ ह । यहूदा प्रेरितन के धन के थैली रखे के प्रभारी रओ ह, पर हमेशा व वहे थैली म से पईसा निकाल लए करत रओ ह । यीशु अऊ चेलन के यरूशलेम म पहुँचे के बाद यहूदा यहूदी अगुवन के पास ग। व धन के बदले म यीशु क उनखे हाथ पकड़वामा के लाने प्रस्ताव रखिन । व जानत रओ ह कि यहूदी अगुवा स्वीकार नई करत रए हें कि यीशु ही मसीह रए हें । ऊँ जानत रए हें कि ऊँ ओही मार डालां क चाहत रए हें ।

महायाजक के कहे म यहूदी अगुवा यीशु क उनखे हाथ म पकड़वामा के लाने यहूदा क तीस चाँदी के सिक्का दईन । य वइसे भ जइसा कि भविष्यद्वक्ता कहे रए हें कि होई । यहूदा मान ग अऊ धन लईके चलो ग। व यीशु क गिरफ्तार करे म उनखर सहायता करा के लाने कोनो मऊका के खोज करा लगो ।

यरूशलेम म, यीशु अपन चेलन के साथ फसह के पर्व मनईन । फसह क खाए के समय म, यीशु रोटी लईके टोरीन । ऊँ कहीन, "एही ल्या अऊ खा। य मोर देह आए जऊन मैं तुम्हरे लाने देत हों । एही मोरे याद म करे कर्या ।" वहेन तरह से, यीशु कहीन कि व उनखे लाने मर जई, अर्थ ह, ऊँ उनखे लाने अपन शरीर के बलि चढ़ा दईहीं ।

फिर यीशु एकठे दाखरस के प्याला लईन अऊ कहीन, "एही पी ल्या । य नई वाचा के मोर लहू आए जऊन कि मैं उंडेलीहों ताकि परमातिमा तुम्हरे पापन क क्षमा करी । हर बार एही पीयत समय मोर याद म एही करा जऊन मैं अभी कर रहे हों

तब यीशु अपन चेलन से कहीन, "तुम म से एक झन मोही पकड़वई ।" चेला चौंक गें, अऊ पूछा लगे कि को आईसा काम करी । यीशु कहीन, "मोर पकड़वामा वाला मनई व ह जेही मैं य रोटी के टुकड़ा देत हों ।" तब ऊँ व रोटी यहूदा क दईन ।

व रोटी क ले के बाद, यहूदा म शैतान समा ग। यहूदा निकल के यीशु क गिरफ्तार करे के लाने यहूदी अगुवा के सहायता करा क चलो ग। य रात के समय रओ ह ।

खाना के बाद, यीशु अऊ उन्खर चेला जैतून पर्वत क चले गें । यीशु कहीन, "तुम सब आज रात मोही छोड़ दईहा । य लिखो गा ह, 'मैं चरवाहा क मरीहो अऊ सारा भेड़ तितर-बितर होई जई ।'"

पतरस जवाब दईस, "भले बाकी सब तोही छोड़ दईहीं पर, मैं न छोड़ीहों !" तब यीशु पतरस से कहीन, "शैतान तुम सब क लई ले क चाहत ह, पर हे पतरस, मैं तोरे लाने प्रार्थना करे हों कि ते विश्वास से चूक न जए ।फिर भी, आज के रात, मुर्गा के बाँग दे से पहिले ते तीन बार इंकार करीहे कि ते मोही जानत भी नई हस ।"

पतरस तब यीशु से कहीस, "भले ही मैं मर जईहों, मैं कबहूँ भी तोर इंकार न करिहों !" बाकी के सब चेला भी अइसे ही कहीन ।

तब यीशु अपन चेला के साथ गतसमनी नाम के जगह म ग। यीशु अपन चेलन से प्रार्थना करे के लाने कहीन ताकि शैतान उनखर परीक्षा करा । तब यीशु खुद प्रार्थना करे के लाने चले गें ।

यीशु तीन बार प्रार्थना करीन, "हे मोर पिता, यदि सम्भव हो त कृपा करके य दुःख के प्याला पीएं के लाने मोही मत दे । पर अगर मनई के पाप क्षमा करे जाएं के लाने कोऊ अऊ मार्ग नई ह, त तोर ही इच्छा पूरी हो।" यीशु बहुत व्याकुल रए हें अऊ उन्खर पसीना लहू के बूँदन के समान गिरत रओ ह । ओही सामर्थ दे के लाने परमातिमा एकठे स्वर्गदूत क भेजिन।

हर बार प्रार्थना के बाद, यीशु अपन चेलन के पास वापस आओ, पर ऊँ सो ग रए हें । जब यीशु तीसर बार लऊटो त यीशु कहीन, "जाग जा! मोर पकड़वामा वाला हिन आऊत ह ।"

यहूदी अगुवा, सैनिक, अऊ एकठे बड़ी भीड़ के साथ यहूदा आओ । ऊँ तलवार अऊ लाठी लए रए हें । यहूदा यीशु के पास आके ओसे कहीस, "हे गुरु, नमस्कार," अऊ ओही चूम लईस । व गिरफ्तार करे जाएं वाले मनई क यहूदी अगुवा म परगट करे के लाने आईसा करे रओ ह । तब यीशु कहीस, "हे यहूदा, का ते एकठे चुम्बन से मोही पकड़वऊते हस ?"

जब ऊँ सैनिक यीशु क पकड़त रए हें, त पतरस अपन तलवार निकालीस अऊ महायाजक के एकठे सेवक के कान काट दईस । यीशु कहीन, "तलवार क दूर कर! मैं अपन पिता से मोरे बचाव करे के लाने स्वर्गदूतन के एकठे सेना के लाने विनती कर सकत हों । पर मोही मोरे पिता के बात माना क ह।" तब यीशु व मनई के कान क ठीक कर दईन । तब सारा चेला भाग गें।