28. धनी जवान शासक

एक दिन, एक साहूकार जवान शासक नै यीशु के धोरै आकै उसतै पूच्छ्या, "हे उत्तम गुरु, अनन्त जीवन पाण के खात्तर मन्नै के करणा चाहिए?" यीशु नै उसतै कह्या, "तू मन्नै 'उत्तम' क्यू कहवै सै? सिर्फ एक ए उत्तम सै अर वो परमेसवर सै। पर जै तू अनन्त जीवन पाणा चाहवै सै तो परमेसवर की व्यवस्था का पालन कर।"

मन्नै कौण कौण से हुकमां का पालन करण की जरुरत सै? उसनै पुच्छ्या। यीशु नै जवाब दिया, "हत्या ना करिये। व्यभिचार ना करिये। चोरी ना करिये। झूठ ना बोलिये। अपणे पिता अर माता का आदर करिये, अर अपणे पड़ोसी तै अपणे समान प्यार करिये।"

पर उस जवान माणस नै कह्या, "मैं अपणे बाळकपण तै ए इन सारे हुकमां का पाळन करदा आया सूं। मन्नै सदा के खात्तर जिन्दा रहण ताहीं इब भी के करण की जरुरत सै?" यीशु नै उस पै नजर करी अर उसतै प्यार करया।

यीशु नै जवाब दिया, "जै तू सिद्ध होणा चाहवै सै तो जाकै अपणा सारा किमे बेच दे अर वा धन गरीबां म्ह बाँट दे, अर तन्नै सुर्ग म्ह धन मिलैगा। फेर आकै मेरे पाच्छै हो ले।"

जो यीशु नै कह्या जिब उस जवान माणस नै सुण्या तो वो भोत उदास हो ग्या, क्यूकें वो भोत धणी था अर उसनै अपणी सारी सम्पत्ति ताहीं देणा न्ही चाह्या था। वो मुड़ कै यीशु के धोरै तै चल्या गया।

फेर यीशु नै अपणे चेल्यां तै कह्या, "परमेसवर के राज्य म्ह धणी लोगां का जाणा घणा मुशकिल सै! हाँ, एक धणी माणस के परमेसवर के राज्य म्ह जाण की तुलना म्ह किसे ऊँट का सूई के नाके म्ह तै होकै लिकड़ जाणा आसान सै।"

जो यीशु नै कह्या जिब चेल्यां नै सुण्या तो वे हैरान थे। उननै कह्या, "जै यो इसा सै तो परमेसवर किसनै बचावैगा?"

यीशु नै चेल्यां पै नजर करी अर कह्या, "लोगां के खात्तर खुद का उद्धार करणा अणहोणा सै। पर परमेसवर के खात्तर कुछ भी करणा अणहोणा न्ही सै।"

पतरस नै यीशु तै कह्या, "हम चेले अपणा सारा किमे छोड़कै तेरै पाच्छै हो लिए सां। तो हमारा इनाम के होवैगा?"

यीशु नै जवाब दिया, "हर एक माणस जिसनै मेरै कारण घर, भाई, भाण, पिता, माता, बच्चे, या जायदाद ताहीं छोडया सै, वो उसतै 100 गुणा ज्यादा पावैगा अर अनन्त जीवन ताहीं भी पावैगा। पर भोत से जो पहले सैं वे पिछले होंवैंगे, अर भोत से जो पिछले सैं वे पहले होंवैंगे।"