4. अब्राहम के साथ परमेश्वर की वाचा

बाढ़ के कई साल्लां के बाद, संसार म्ह भोत से लोग रह्यां करैं थे, अर उननै फेर तै परमेसवर के अर एक दूसरयां के खिलाप पाप करया। क्यूकें वे सारे एक ए भाषा बोल्यां करैं थे, ज्यातैं वे एक साथ कठ्ठे होए अर संसार ताहीं भर देण के परमेसवर के आदेश के बजाए एक नगर ताहीं बणाया।

वे भोत घमंडी थे, अर उननै किसा जीवन जीणा चाहिए इस बारे म्ह वे परमेसवर के आदेश का पाळण करणा न्ही चाहवैं थे। उरै ताहीं उननै एक इसी मीनार ताहीं बणाणा शरू करया जो स्वर्ग ताहीं पोहचेगी। परमेसवर नै देख्या के जै कर वे एक साथ मिलकै बुराई करदे रहवैंगे, तो वे भोत से पापी काम्मां नै कर सकै सैं।

इस करकै परमेसवर नै उनकी भाषा ताहीं भोत- सी न्यारी-न्यारी भाषा म्ह बदल दिया अर उन माणसां ताहीं सारे संसार म्ह फैला दिया। जिस नगर ताहीं उननै बणाणा शरु करया था वो बाबेल कहलाया, जिसका अर्थ सै "गड़बड़ी"।

कई सौ साल्लां के बाद, परमेसवर नै अब्राम नाम के एक माणस तै बात करी। परमेसवर नै उसतै कह्या, "अपणे देश अर परिवार ताहीं छोड़ कै उस देश म्ह चला जा जो मैं तन्नै दिखाऊँगा। मैं तन्नै आशीष दयूंगा अर तेरे तै एक बड़ी जाति बणाऊँगा। मैं तेरा नाम महान करूँगा। जो तन्नै आशीष देवै मैं उननै आशीष दयूंगा, अर जो तन्नै श्राप देवैं उननै श्राप दयूंगा। तेरे कारण संसार के सारे कुल आशीष पावैंगे।"

आखर अब्राम नै परमेसवर की बात मान्नी। उसने अपणे सारे सेवकां अर अपणी सारी सम्पत्ति समेत अपणी घरआळी सारै ताहीं लिया अर उस देश म्ह, कनान देश ताहीं चला गया जो परमेसवर नै उस तै दिखाया था।

जिब अब्राम कनान पोहच्या तो परमेसवर नै उसतै कह्या, "अपनै च्यारू ओर देख। मैं तन्नै यो सारा देश दयूंगा अर तेरे वंशज सदा खात्तर इस पै हक रखैंगे।" फेर अब्राम उस देश म्ह बस ग्या।

मलिकिसिदक नाम का एक माणस था जो सर्वोच्च परमेसवर का याजक था। एक दिन जिब अब्राम युद्ध करण के बाद आ रह्या था तो वो और अब्राम मिले। मलिकिसिदक नै अब्राम ताहीं आशीष दी अर कह्या "सर्वोच्च परमेसवर जो सुर्ग अर धरती का स्वामी सै वो तन्नै आशीष देवै।" फेर अब्राम नै युद्ध म्ह जीती होई सारी चीज्जां का दशमांश मलिकिसिदक ताहीं दिया।

कई साल बीत गे, पर इब ताहीं भी अब्राम अर सारै के कोए बेट्टा न्ही था। परमेसवर नै अब्राम तै बात करी अर फेर तै वादा करया के उसकै एक बेट्टा पैदा होवैगा अर जिस तरियां अकास म्ह तारे सैं उसे तरियां ए उसके भोत से वंशज होंवैंगे। अब्राम नै परमेसवर के वादे पै विश्वास करया। परमेसवर नै घोषणा करी के अब्राम एक धर्मी जन था क्यूकें उसनै परमेसवर के वादे पै विश्वास करया था।

फेर परमेसवर नै अब्राम तै एक करार बाँध्या। सामान्य रूप तै, एक करार दो दलां के बीच म्ह एक दूसरे के खात्तर काम्मां ताहीं करण का एक समझौता होवै सै। परमेसवर नै अब्राम तै वा प्रतिज्ञा जिब करी थी जिब अब्राम सो रह्या था, पर वो तब भी परमेसवर ताहीं सुण सकै था। परमेसवर नै कह्या, "मैं तेरे शरीर तै पैदा करकै तन्नै तेरा एक खुद का बेट्टा दयूंगा। मैं तेरे वंश ताहीं यो कनान देश देऊं सूं।" पर इब ताहीं भी अब्राम कै कोए बेट्टा न्ही था।