23. यीशुर जनम

यूसुफ नामर गोटक धरमी माने संगे मरियमर मांगनी होई रहूआय। जेबे हाय सुनु आय कि मरियम पेटे आचे हाय जानते रहूआय कि हाय हातार बेटा नुआय। मान्तर, हाय मरियम के बदनाम ना करबार चाहते रहूआय, एकाचे हाय हातार उपरे कृपा करबार आउरी हाके चुपचाप तलाक देबार सोचु आय। मातर एतार ले पोयलेकि हाय अमता करता, गोटक सरग दूत हातार सपना ने आई करी हातार ले गोटाउ आय।

हाय सरग दूत बोलुआय, "हे युसूफ, मरियम के खुदर बायलेर रुप ने आनबा कचे ना डर। हातार भीतरे जोन पीला आचे हाय पवित्र आत्मा बाटले आय। हाय गोटक बेटा के जनम देयसी। हातार नाम यीशु सोंगाव (जार मतलब आय’यहोवा बाचाउ आय’),कायकाचे कि हाय लोग मनके तिकर पाप ले बाचायसी।"

अतः यूसुफ मरियम ले बिया करूआय आउरी हाके खुदर बायलेर रुप ने घरे आनुआय, मांतरहातार पीला के जनम देबा तक हाय हातार संगे ना सोउआय।

जेबे मरियमर जनम देबार बेरा लगे रहूआय, तो हाय आउरी यूसुफ बैतलहम जीबा काचे गोटक लम्बा यात्रा करूआत। हाय मनके हाय थाने जीबाच टा रहूआय कायकाचे कि रोमी अधिकारी इस्राएल ने रेबा लोगर सबु लोग मनर गिनती करबार चाहते रहूआय। हाय मन चाहते रहूआत कि सबु लोग मन हाय थाने जाओत जोन थाने तिकर पूर्वज मन रेयते रेलाय राजा दाउदर जनम बेतलहम ने होई रहू आय। आउरी हाय मरियम आउरी यूसुफ दुनोर पूर्वज रहूआय।

मरियम आउरी यूसुफ बैतलहम जाऊआत, मांतरहाय थाने जानवर मन के सोंगायबा जागार अलावा तिकर ठेब्बा काचे कोनी जागा ना रहूआय। हाई जागा रहूआय जोन थाने मरियम खुदर पीला के जनम देउआय। हाय हाके चरनी ने सुआउ आय काय काचे कि हाय थाने हातार काचे कोनी बले बिस्तर ना रहूआय। हाय मन हातार नाम यीशु सोंगाउआत।

हाय राती ने, लगर बेड़ा थान खिनिक मा धोरी मन खुदर मेंडा मनर राशीर राका करते रहूआत। अचानक ले, गोटक चमकदार सरगदूत हाय मन उपरे प्रगट होऊआय, आउरी हाय मन डरी जाऊआत। हाय सरग दूत बोलुआय, "ना डरा, काय काचे कि मोर लगे तोमर काचे शुभ संदेश आचे। बैतलहम ने मसीह, स्वामीर जनम होयला आचे!"

जाई करी हाय पीला के डगरा, आउरी तोमी हाय पीला के फोटी थाने लिपटला दाय आउरी चरनी थाने सोयाबा दाय पायबास।"अचानक ले बादरी सरग दूत ले भरी जाऊआय। हाय मन मापरुर स्तुति करते रेलाय। हाय मन बोलुआत, "सबु महिमा सरग ने विराजमान मापरु के मिलो। पृथ्वी ने हाय मन लोग थाने शांति हो जार हाय चिंता करूआय!"

तेबे सरग दूत मन चले जाऊआत। हाय धोरी मन बले खुदर मेंडा के छाडी करी पीला के दखके जाऊ आत। हाय मन झोपके हाय जागा नए खेटू आत जोन थाने यीशु रहूआय आउरी हाय मन हाके चरनी ने सोयबा दाय पाउआत, जसन कि हाय सरग दूत बोली रहूआय। हाय मन खुबे हरिक रहूआत। तेबे हाय धोरी मन वापिस लेवटू आत जोन लगे तिकर मेंडा मन रहूआत। हाय मन जोनटा बले सुनु आत आउरी दखु आत हाय सबु काचे मापरुर स्तुति करते रहूआत।

पूर्व ने गोटक देश ने खिनिक मा माने मन रहूआत। हाय मन तारा मनर अध्यन करी रहूआत आउरी हाय मन खुबे बुद्धिमान रहूआत। हाय मन गोटक असामान्य तारा के बादरी ने दखु आत। हाय मन बोलुआत कि एतार मतलब आय कि यहूदि मनर नगर ने गोटक नुआ राजार जनम होयला आचे। एकाचे हाय मन हाय पीला के दखबा काचे खुदर देश ले यात्रा करबार निर्णय करूआत। गोटक लम्बा यात्रार पाचे हाय मन बैतलहम आउआत आउरी हाय घर के मिलाउ आत जोन थाने यीशु आउरी हातार आया बुआ मन ठेबी रहूआत।

जेबे ए माने मन यीशु के खुदर माँ संगे दखुआत तो हाय मन मांडीखुटा टेकी करी हातार आराधना करूआत। हाय मन यीशु के कीमती उपहार देउआत। पाचे हाय मन घरे लेवटुआत।