12. निर्गमन

इस्राएली लोग मिस्र देश से निकलके बहुत खुश होतीन। ही लोग अब गुलाम नी थे, अऊर ही प्रतिज्ञा के देश में जात होतीन। जो कइ भी इस्राएली लोगानाऊन ने मागीन, मिस्री लोगनाऊन ने हुनके हु सप्पाई कइ देइन, यहाँ तक कि सोना अऊर चाँदी अऊर कइ किमती चीज भी। दूसरे देश नाऊन के कइ लोगनाऊन ने परमेश्वर पे विश्वास करीन अऊर जब इस्राएली लोग मिस्र देश से निकलीन तो ही भी हुनके संग हो लेइन।

दिन के समय बादल को एक बड़ो खम्बा हुनके सामूर-सामूर चलीस। अऊर रात के समय हु आगी को खम्बा बन गइस। परमेश्वर जो हु बादल के खम्बा में अऊर आगी के खम्बा में होतीस, हमेशा हुनके संग होतीस अऊर ओने यात्रा करते वक्त हुनकी अगुवाइ करीस। हुनको सिर्फ इतनो करनो होतीस कि ओके पीछे चलेत।

थोड़े समय के बाद, फिरौन अऊर ओके लोगनाऊन ने अपनो मन बदल देइन। ही इस्राएलीनाऊन को दुबारा से अपने गुलाम बनानो चाहत होतीन। एकेगुना हुनने इस्राएलीनाऊन को पीछा करीन। यो परमेश्वर च होतीस जेने हुनके मन को बदल देइतीस। ओने असो एकेगुना करिस कायाकी हु चाहत होतीस कि हर कोइ जान लेहेत कि फिरौन से अऊर मिस्रि लोगनाऊन के सप्पाई देवतानाऊन में से हु, यहोवाच, जादा शक्तिशाली हय।

जब इस्राएली लोगनाऊन ने मिस्र देश की सेना को पीछे आते देखीन तो हुनको मालूम भइस कि ही फिरौन की सेना अऊर लाल समुन्दर के बीच में फँस गइन। ही बहुत डर गइन अऊर रोने लगीन, "हमने मिस्र देश को काया छोडेन? हम मरनेवाले हन!"

मूसा ने इस्राएली लोगनाऊन से कहिस, "डरनो बंद करो! परमेश्वर आज तुमारे गुना लड़े अऊर तुमको बचाये।" फिर परमेश्वर ने मूसा से कहिस, "ही लोगनाऊन को लाल समुन्दर की किना सामूर बढ़न के गुना बोल।"

फिर परमेश्वर ने हु बादल के खम्बा को लेयके इस्राएली अऊर मिस्री लोगनाऊन के बीच में रख देइस ताकि मिस्री लोग इस्राएली लोगनाऊन को देख नी पायेत।

परमेश्वर ने मूसा से समुन्दर पर अपनो हाथ बढ़ान के गुना कहिस। फिर परमेश्वर ने हवा से समुन्दर के पानी को बाय अऊर डाए के किना करवा देइस, जिकेसे कि समुन्दर से होयके एक रास्ता बन गइस।

इस्राएली लोग अपने दोइ किना पानी की दीवार नाऊन के संग सूखी जमीन पे समुन्दर से होयके सामूर बढ़ गइन।

तब परमेश्वर ने हु रास्ता से बादल को उठा लेइस ताकि मिस्री लोग इस्राएली नाऊन को बचके जाते हुए देखेत। मिस्रिनाऊन ने हुनको पकड़न के गुना हुनको पीछा करन को फैसला लेइस।

एकेगुना हुनने समुन्दर के माध्यम से हु रास्ता पे इस्राएलीनाऊन को पीछा करीन, मगर परमेश्वर ने मिस्री लोगनाऊन को घबरा देइस अऊर हुनके रथनाऊन को अटका देइस। ही चिल्लान लगीन, "भगो! इस्राएली लोगनाऊन के किना से परमेश्वर लड़ रहीस हय!"

सप्पाई इस्राएली समुन्दर की दूसरे किना पहुँच गइन। तब परमेश्वर ने मूसा से कहिस कि हु फिर से पानी पे हाथ बढ़ाए। जब मूसा ने असो करिस, तो पानी मिस्री सेना पे आ पडीस अऊर अपनी साधारण दशा में हो गइस। सप्पाई मिस्री सेना डूब गइन।

जब इस्राएली नाऊन ने देखीन कि मिस्री लोग मर होतीन तो हुनने परमेश्वर पे विश्वास करीन। हुनने विश्वास करीन कि मूसा परमेश्वर की किना से भविष्यद्वक्ता होतीस।

इस्राएली लोग एकेगुना भी बहुत आनन्दित भइन कायाकि परमेश्वर ने हुनको मरन से अऊर गुलाम होन से बचा लेये होतीस। अब ही परमेश्वर की आराधना करन अऊर ओकी आज्ञा पालन करन के गुना आजाद होतीन। इस्राएली लोगनाऊन ने अपनी आजादी को उत्सव मनान के गुना अऊर परमेश्वर की प्रशंसा करन के गुना कई गीतनाऊन को गाइन कायाकि ओने हुनको मिस्री लोगनाऊन की सेना से बचाये होतीस।

परमेश्वर ने इस्राएली लोगनाऊन को हर साल एक त्योहार मनान को आज्ञा देइस। यो याद करन के गुना कि कसो परमेश्वर ने मिस्री लोगनाऊन को हराइस अऊर हुनको गुलाम होन से आजाद करीस। यो फसह को त्योहार कहलाए होतीस। एकमें हुनको असो त्योहार मनान के गुना एक भले-चंगे मेमना को बलीदान करनो होतीस, ओके भुजनो होतीस, अऊर ओको बिना खमीर की रोटी के संग खान को होतीस।