19. भविष्यद्वक्ता

परमेश्वर हमेशा इस्राएलो लोगनाऊन के जवर भविष्यद्वक्तानाऊन को भेजत होतीस। भविष्यद्वक्ता परमेश्वर से संदेशनाऊन को सुनत होतीन अऊर दुबारा ओको लोगनाऊन को बतात होतीन।

जब अहाब राजा इस्राएल राज्य पे राजा करत होतीस तो वा समय एलिय्याह भविष्यद्वक्ता होतीस। अहाब राजा एक बुरो मानुष होतीस। ओने झूठे बाल देवता की उपासना करवान के गुना लोगनाऊन को मजबूर करे होतीस। एकेगुना एलिय्याह ने अहाब से कहिस कि परमेश्वर उन लोगनाऊन को दण्ड देनेवालो हय। ओने ओके से कहिस, "जब तक मय दुबारा से बारिश होने के गुना नी कहूँ तब तक इस्राएल के राज्य में बारिश नी होये अऊर नी ओस गिडे।" या बात ने अहाब को इतना गुस्सा वालो कर देइस कि ओने एलिय्याह को मार डालन का फैसला करीस।

एकेगुना परमेश्वर ने एलिय्याह से कहिस कि हु जंगल में जायके अहाब से लुक जाए। एलिय्याह जंगल में वा सोता के जवर गइस जहाँ पे जाने के गुना परमेश्वर ने ओको बताए होतीस। हर सुबह अऊर हर शाम को पक्षी एलिय्याह के जवर रोटी अऊर मास लेयके आत होतीन। यो पूरा समय, अहाब राजा अऊर ओकी सेना एलिय्याह की ढूढत होतीन, मगर ही लोग ओको ढूढ नी सकीन।

बारिश नी होन के कुछ दिन बाद हु पानी का सोता सूख गइस। एकेगुना एलिय्याह जवर च के एक देश में चलो गइस। हु देश में एक गरीब विधवा रहत होती अऊर ओको एक टूरा होतीस। ओको जवर जेवन लगभग खतम भय गइतीस कायाकि वहाँ पे कोई फसल नी भय होती। मगर दुबारा भी, वा विधवा ने एलिय्याह की देखरेख करी, एकेगुना परमेश्वर ने ओकी अऊर ओके टूरा की जरूरतनाऊन को पूरा करीस, या कारण से ओके आटे का बर्तन अऊर ओके तेल की डपकी कभी खाली नी भइ। हु पूरे अकाल के समय ओके जवर जेवन को सामान होतीस। एलिय्याह कुछ साल तक वहाँ पे रहीस।

साढ़े तीन साल के बाद, परमेश्वर ने एलिय्याह से कहिस कि हु दुबारा बारिश भेजे। ओने एलिय्याह से वापस इस्राएल के राज्य में जायके अहाब से बातनाऊन करन के गुना कहिस। एकेगुना एलिय्याह अहाब के जवर गइस। जब अहाब ने ओको देखीस तो ओने कहिस, "अच्छा तो तूच आस, मुसीबत पैदा करन वालो!" एलिय्याह ने उत्तर देइस, "मुसीबत पैदा करन वालो तो तूच आस! तूने यहोवा को छोड़ देयेसस। पर हु खरो परमेश्वर आय, मगर तू बाल देवता की उपा उपासना कर रहेसस। अब तोको इस्राएल राज्य के सप्पाई लोगनाऊन को कर्मेल पहाड़ी पे लेके आनो हय।"

एकेगुना सप्पाई लोग कर्मेल पहाड़ी पे गइन। ही मानुष भी आइन जो कहत होतीन कि ही बाल देवता के संदेश को बोलतत। अऊर ही बाल देवता के भविष्यद्वक्ता होतीन। ही सप्पाई 450 होतीन। एलिय्याह ने लोगनाऊन से कहिस, "कब तक तुम अपने मन को दुसरे देवता की किना रखो? अगर यहोवा परमेश्वर हय तो ओकी आराधना करो! अगर बाल देवता परमेश्वर हय तो ओकी उपासना करो!"

फिर एलिय्याह ने बाल के भविष्यद्वक्तानाऊन से कहिस, "एक बइल को बली करके ओके मास को बलिदान होने को एक वेदी पे रखो, पर आगी मत लगाने। ओके बाद मय भी वसोच करूँ, अऊर एक दूसरी वेदी पे मय हु मास को रखूँ। तब अगर परमेश्वर वेदी पे आगी गिराते तो तुम जान लोने कि हुच खरो परमेश्वर हय।" तब बाल के भविष्यद्वक्तानाऊन ने एक बलि को तैयार करीन पर आग नी लगाइन।

तब बाल के भविष्यद्वक्तानाऊन ने बाल देवता से प्रार्थना करीन कि, "हे बाल देवता, हमारी सुन!" पूरे दिन भर हुनने प्रार्थना करीन अऊर चिल्लाइन अऊर यहाँ तक कि खुद को चाकु से काट लेइन, पर बाल देवता ने उत्तर नी देइन, अऊर हुनने कोई आगी नी गिराइन।

बाल के भविष्यद्वक्तानाऊन ने बाल से प्रार्थना करन में लगभग पूरो दिन बिता देइन। आखिर में हुनने प्रार्थना करनो बंद कर देइन। फिर एलिय्याह ने दूसरे बइल के माँस को परमेश्वर की वेदी पे रखीस। ओके बाद, ओने लोगनाऊन से पानी के बड़े बर्तन को वा बलिदान पे तब तक रीचोन के गुना कहिस जब तक कि माँस, लकड़िनाऊन, अऊर यहाँ तक कि वेदी के आस-पास की जमीन पूरी तरिका से ओली नी हो जाए।

तब एलिय्याह ने प्रार्थना करीस, "हे यहोवा, अब्राहम, इसहाक, अऊर याकूब के परमेश्वर, हमाको दिखा कि तू च इस्राएल के परमेश्वर आस अऊर यो कि मय तोरो दास आम। मोको जवाब दे ताकि जेके कि से लोग जान लेहेत कि तू च सच्चो परमेश्वर आस।"

तुरन्त च, आकाश में से आगी गिडी अऊर ओने माँस, लकड़िनाऊन, चट्टाननाऊन, मिट्टी, अऊर यहाँ तक कि वेदी के आस-पास को पानी को भी जला देइस। जब लोगनाऊन ने देखीन, तो ही जमीन पे गिड पडीन अऊर बोलीन, "यहोवा च परमेश्वर हय! यहोवा च परमेश्वर हय!"

तब एलिय्याह ने कहिस, "बाल देवता को एक भी भविष्यद्वक्ता बचके नी जाये पाइजे!" एकेगुना लोगनाऊन ने बाल देवता के भविष्यद्वक्तानाऊन को पकड़ लेइन अऊर हुनको वहाँ से दूर ले गइन अऊर हुनको मार देइन।

तब एलिय्याह ने अहाब राजा से कहिस, "जल्दी से अपने घर को चले जा, कायाकि बारिश होनवाली हय।" जल्दी च कारो बादल भय गइस, अऊर बडी बारीश शुरू भय गइ। यहोवा हु सूखे को खतम करत होतीस। एकेसेच मालूम भइस कि यहोवा च सच्चो परमेश्वर हय।

जब एलिय्याह ने अपने काम को खतम कर देइस, तो परमेश्वर ने एलीशा नाम के एक मानुष को अपनो भविष्यद्वक्ता होन के गुना चुनिस। परमेश्वर ने एलीशा के जरिया से कई सारे चमत्कार करीस। एक चमत्कार नामान के संग भइस। हु एक दुश्मन की सेना को सरदार होतीस, पर ओको चमड़ी को एक भयंकर रोग होतीस। नामान ने एलीशा के बारे में सुने होतीस, एकेगुना हु एलीशा के जवर आइस अऊर ओने ओको साजरो करन की बिनती करीस। एलीशा ने नामान से कहिस कि तू जायके यरदन नदी के पानी में सात बार डुपकी लगा ले।

नामान गुस्सा भय गइस। ओने असो करन से इंकार कर देइस, कायाकि यो ओको मुर्खता को काम लगत होतीस। पर बाद में ओने अपनो मन बदल लेइस अऊर जायके यरदन नदी के पानी में सात बार डुपकी लगाइस। जब आखरी बार हु पानी में से बाहर निकलीस तो परमेश्वर ने ओको साजरो कर देइस।

परमेश्वर ने इस्राएल के लोगनाऊन के जवर कइ दुसरे से भविष्यद्वक्तानाऊन को भेजिस। हुन सप्पाई लोगनाऊन ने मूर्तिनाऊन की उपासना करन बंद कर देन के गुना कहिन। एके बजाए, एक-मेक के संग न्याय से व्यवहार करे पाइजे अऊर एक-मेक पे दया करे पाइजे। हुन भविष्यद्वक्तानाऊन ने लोगनाऊन को चेतावनी देइन कि हुनको अपने बुरे कामनाऊन को करनो बंद कर देये पाइजे अऊर एके बजाए परमेश्वर की बातनाऊन को पालन करे पाइजे। अगर उन लोगनाऊन ने असो नी करीन तो परमेश्वर हुनको दोषी मान के हुनको न्याय करे, अऊर हुनको दण्ड देहे।

जादा समय, ही लोगनाऊन ने परमेश्वर की आज्ञा को पालन नी करीन। हमेशा हुनने भविष्यद्वक्तानाऊन के संग बुरो व्यवहार करीन अऊर यहाँ तक कि कभी कभी हुनको मार डालीन। एक बार, हुनने यिर्मयाह भविष्यद्वक्ता को सूखे कुआ में डाल देइन अऊर ओको वहाँ मरन के गुना छोड़ देइन। हु कुआ के खल्ले चिखल में फस गइस। मगर तब राजा को ओके पे दया आई अऊर ओने अपने सैनिकनाऊन को हुकुम देइस कि यिर्मयाह को मरन से पहले हु कुआ में से बहार लेवो।

भविष्यद्वक्तानाऊन ने परमेश्वर की किना से बोलनो शुरु रखीन भले ही लोगनाऊन ने हुनके से बैर करीन। हुनने लोगनाऊन को चेतावनी देइन कि अगर हुनने पाप से पछतावा नी करीन तो परमेश्वर हुनको नाश कर देहे। हुनने लोगनाऊन को यो भी याद करीन कि परमेश्वर ने हुनके जवर मसीह को भेजन को वादा करीस हय।