24. यूहन्ना यीशु को बपतिस्मा देते

एलीशिबा अऊर जकर्याह का टूरा यूहन्ना, बड़ो होके एक भविष्यद्वक्ता बन गइस। हु जंगल में रहत होतीस, अऊर जंगली शहेद अऊर टिड्डिनाऊन को खात होतीस, अऊर ऊँट के रोम से बने कपडा पहनत होतीस।

कई लोगनाऊन यूहन्ना की बात सुनन के गुना जंगल में चले गइन। ओने यो कहके हुनको प्रचार करीस, "कि अपने पाप को पछतावा करो, कायाकि स्वर्ग को राज्य जवर हय!"

जब लोगनाऊन ने यूहन्ना के प्रचार के वचन को सुनीन, तो हुनके में से बहुत लोगनाऊन ने अपने पापनाउन को पछतावा करीन, अऊर यूहन्ना ने हुनको बपतिस्मा देइन। यूहन्ना को देखन के गुना कई सारे धार्मिक अगवानाऊन भी आइन, पर हुनने अपने पापनाऊन को पछतावा या अंगीकार नी करीन।

यूहन्ना ने धार्मिक अगवानाऊन से कहिस, "हे जहरीले साँपनाऊन! पछतावा करो अऊर अपने चाल-चलन को बदलो। परमेश्वर हर एक हु झाड को काट डालते जो सजरो फल नी देय, अऊर हु हुनको आगी में झोंक देहे।" जो भविष्यद्वक्तानाऊन ने कहे होतीन, यूहन्ना ने ओको पूरा करीस, "देख, जल्दीच मय तोरे सामूर अपने संदेशवाहक को भेजूँ जो तोरे गुना रास्ता को तैयार करे।"

कई धार्मिक अगवानाऊन ने यूहन्ना से पूछीन कि का हु मसीह आय। यूहन्ना ने उत्तर देइस, "मय मसीह नी हम, पर मोरे बाद में जो आ रहीस हय। हु इतनो महान हय कि मय ओके जूता के लेस खोलन के भी लायक नीय्याम।"

दुसरे दिन, यीशु बपतिस्मा लेन के गुना यूहन्ना के जवर आइस। जब यूहन्ना ने ओके देखीस, तो ओने कहिस, "देखो! परमेश्वर को मेमना जो संसार के पापनाऊन को उठायके ले जाते।"

यूहन्ना ने यीशु से कहिस, "मय तोको बपतिस्मा देन के लायक नीय्याम। एके अलावा जरुरी यो हय कि तू मोको बपतिस्मा दे।" पर यीशु ने कहिस, "तोको मोको बपतिस्मा देनो पड़े, कायाकि करन के गुना सही काम योच हय।" एकेगुना यूहन्ना ने ओको बपतिस्मा देइस, जबकि यीशु ने कभी भी पाप नी करे होतीस।

बपतिस्मा देन के बाद जब यीशु पानी में से निकलके बहार आइस, तो परमेश्वर को आत्मा कबूतर के रूप में प्रकट भइस अऊर खले आयके ओके पे ठहर गइए। वाच समय, परमेश्वर ने स्वर्ग से बात करीस। ओने कहिस, "तू मोरो लाडलो टूरा आस। मय तोरे से प्यार रखतम अऊर मय तोरे से बहुत खुश हम।"

परमेश्वर ने यूहन्ना से कहे होतीस, "पवित्र आत्मा खले आयके कोई पे भी ठहर जाये जेको तू बपतिस्मा देबे।" हु परमेश्वर का टूरा आय परमेश्वर एकच आय। पर जब यूहन्ना ने यीशु को बपतिस्मा देइस, तो ओने परमेश्वर दादा को बात करते सुनीस, टूरा परमेश्वर को देखीस, जो कि यीशु आय, अऊर ओने पवित्र आत्मा को देखीस।