30. यीशु पाँच हजार लोगनाऊन को जेवन खिलते

यीशु ने अपने प्रेरितनाऊन को प्रचार करन अऊर लोगनाऊन को वचन की शिक्षा देन के गुना कई सारे लोगनाऊन को अलग-अलग गाँवनाऊन में भेजिस। जब ही वहाँ लौटीन जहाँ पे यीशु होतीस तो हुनने बताइन कि हुनने का करे होतीन। तब यीशु ने हुनको झील के दूसरे किना ओके संग एक शान्त जागा पे जायके कुछ समय आराम के गुना बुलाइस। एकेगुना ही एक डोंगा पे चढ़ गइन अऊर झील के दूसरे किना चले गइन।

पर वहाँ बहुत सारे असो लोगनाऊन होतीन जिनने यीशु अऊर ओके चेलनाऊन को डोंगा में जाते हुए देखीन। ही लोग हुनके से सामूर झील के दूसरे किना जान के गुना झील के किनारे-किनारे पे भागीन। एकेगुना जब यीशु अऊर कई चेलानाऊन को एक बड़ा झुण्ड हुनको इन्तजार करतो हुओ पहले से होतीस।

वा गर्दी में बाइनाऊन अऊर टूरानाऊन की गिनती को छोड़ के 5,000 से जादा मानुष होतीन। यीशु ने ही लोगनाऊन पे बडी दया करीस। यीशु के गुना ही लोग बिना चरवाहा की मेंढा के सारखे होतीन। एकेगुना ओने हुनको शिक्षा देइस अऊर हुनके बीच में जो लोग बीमार होतीन हुनको साजरो करीन।

दिन डूबते समय में, चेलानाऊन ने यीशु से कहिस, "अब देर भय गइन हय अऊर आसपास में कोई गाँव निय्या। ही लोगनाऊन को जान दे ताकि ही जायके खान के गुना कइ ले सके।"

पर यीशु ने चेलानाऊन से कहिस, "तुम हुनको खान के गुना कइ देव!" हुनने उत्तर देइन, "हम असो कसो कर सकतन? हमारे जवर सिरिफ पाँच रोटी अऊर दो छोटी मछलिनाऊन च हत।"

यीशु ने अपने चेलानाऊन से कहिस कि ही गर्दी के लोगनाऊन को गवत पे पचास-पचास के झुण्ड की कत्तार में बैठन के गुना कहिस।

तब यीशु ने पाँच रोटी अऊर दो मछली को हाथ में लेयके स्वर्ग की किना देखीस, अऊर हु जेवन के गुना परमेश्वर को धन्यवाद करीस।

फिर यीशु ने रोटी अऊर मछलीनाऊन को टुकडा-टूकडा करीस। ओने लोगनाऊन को देने के गुना अपने चेलनाऊन को ही टुकडा देइस। अऊर चेलानाऊन हु जेवन को बाँटत रहीन, अऊर हु कभी खतम नी भइस! अऊर ही सप्पाई लोग खायके संतुष्ट भइन।

ओके बाद, चेलानाऊन ने हु जेवन को जमा करीन जो खायके बाद बचे होतीस अऊर हु बारह टोकनी भरके जमा करीन! हु पुरो जेवन ही पाँच रोटी अऊर दो मछली से बचो होतीस।